Salmai 33
33
Tinkökö Nöinyö
1Ō yī-ö tölöök, ṙāmölōn yin im Mā Tēv: tövai an ngam nöinyö tö yip töchiplö.
2Ha-öinytö tī ngam Mā Tēv aṅtī tö hārp: tiköknyö nöi-nyö ò i nup tösömö inröt ranöng.
3Tiköknyö tufömngöre tinkö-kö in ò: pōitô öi nyamtô hol tö huneū-enre.
4Pò ngam ṙô ngam Mā Tēv Tēv nö töchip: ṙòkhöre nup la-en ò nö aṅ i kanô-en.
5Hāngenlōn an tö lanöökö inkaha fālen inrē: tööḵlö ön ngih panam tö hanāngen neūkölōn ngam Mā Tēv.
6Kūö ṙô ngam Mā Tēv minë halīöngö nö vīlöngö: kūö unhômö ngam elvāng ò minë töpōyen in u.
7Hamūlngö minë mak ngam mai anga-aṅ nö holre nö hēngömūlö: ṙātö ngam tö-aṙū anga-aṅ nö patī chūök inlinhangen.
8Ṙòkhöre ön yēḵ ngih panam nö pa-ekūö tö ngam Mā Tēv: hökngen yip aṅ ngih panam nö ngāngö alaha tö ò nö söklöre.
9Pòn ṙô-òv anga-aṅ, ngaich keuheūten angū-ö: chöngu anga-aṅ, söklöre ngaich a-ngū-ö nö köp.
10Rööḵngen tī an ngam Mā Tēv, tö inlēnö aṅ i tarik: vītö nup chanöhlōn tarik anga-aṅ nö öt kô-òlkui.
11Köp an nö örheūheu ngam inlēnö aṅ im Mā Tēv: in yip tumkölchap nö ṙòkhöre öp chanöh ellōn Ò.
12Tökôlò öp pumnāmö tarik, öp tö Tēvu tö ngam Mā Tēv: yip tarik katöllö ò nö amin ò.
13Ngëicha an ngam Mā Tēv nö el halīöngö: meuk vē kūön tarik nö ṙòkhöre.
14Ṙeū-eung ip chūökre mat an: nö ngëichkö yip aṅkūö ngih panam.
15Anga-aṅ ngam vamī ellōn tarik nö ṙòkhöre: ngam nga-mëichkö nup vahīṙen cha.
16Öt lökten i yip kumyungre ön ngòh rācha nö hayöö-kaṙen: öt lökten i tökiröng kumlēḵre ön ngòh tökalēḵ tarik nö ṙānyuvö.
17Höng tötöl ön ngòh kōra nö inyönglen: öt rēhĕn anga-aṅ nö lökten i kumlēḵre nö hĕng tak ṙahāḵnyi.
18Yĕh meuk minë mat ngam Mā Tēv nö i kui cha yip töpa-ekūö tö ò: i kui cha yip mameūka nö i miṙēlōn ò;
19Nö ṙānyö nômö cha ṙā-ang im kinpaha: ha-aṅhaṅ cha inrē hē el inyāchö.
20Im Mā Tēv nun në nômö hī nö höka: anga-aṅ an holṙen hī, lanaklö hī inrē.
21Ṙāmö ellōn in min in ò: pò hī hayönglenre im töhet minë-eny ò.
22Ō Mā Tēv, hökngen ngam miṙēlōn meh yēḵ nö i kui ih: sā ngam maheūṅkkö ih in meh.
Currently Selected:
Salmai 33: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
