Salmai 31
31
Ṙô Inyönglen Re Im Tēv
1Ō Mā Tēv, in meh chin hayönglenre: uh chin yēḵ hētu sirōngkūö, ṙānyen chu im lanöökö meh.
2Asītö elnangre in chu; hēṙen yēḵ ṙānyen chu: me-eṅ man yēḵ ihong chu töngëḵ, inyöö-len chu, patī lanaklö chu.
3Pò meh më-eṅ ihong chu, kinlēḵngô chu inrē: lökten ip minë-eny meh yēḵ urēhĕ-kūö chu, hachōkūö chu inrē.
4Tūöknyen chu ṙā-ang el öp inhāṅl, ap inhāṅl chu ṙahātö cha nö ulāitö tīre: tön më-eṅ man chūök, töngëḵ chūök chu.
5Eltī meh tī chin kētö ngòh ma-alahare: Ō Mā Tēv, ṙānyen chu man më-eṅ ngaich, më-eṅ Tēv kanô-en.
6Surīkhen cha chin yip tömi-kūöṙen tö minyôiny, yip tötöl: hayönglenre pöri öich im Mā Tēv.
7Ṙāmölōn chin im miṙēlōn meh: pò meh ngaich meuk kanihngen chu; akahalōn tö öp tökunyahaṅvṙen nö ellōn chu.
8Ngaich rö-ö më-eṅ löpngökūö chu eltī ngam tökunyahaṅ-elmat: ṙātö röön chu më-eṅ el töpōiti chūökö.
9Ō Mā Tēv, aṙē-ĕlōn tö chu, tön el kanihngen chin: lënyi mat chin ngaich tö miṙiv-lōnre, hôṅ, ngih ellōn chu, töng alaha chu inrē.
10Pòn keuheūt ngih nômö chu nö i miṙivlōn, nuk samyeū-heu chu inrē nö i unhômö: chuhngöre kumlēḵ chū-ö i ötlanöököre, në tangëḵ chu inrē nö hūöinyngö.
11Minṙēngö chin tī yip tökunya-haṅ elmat tö chu, hòṅ, pōilö in yip ranghö chu: pinhë-eṅkūö inrē in yip hol chu; falngöre tö chu yip mameūkö chu.
12Vāchiṙen chin sā kupah töt ōtre nö ellōn: sā tö lakuk chin tanīöyö.
13Pò chu hang ṙô tömaṙôngö nö hachōichngö minë-eny: keuheūtngöre lā-a pinhë-eṅkūö; vī talöökö tīre cha-a nö kēḵngö ngih nômö chu.
14Ō Mā Tēv, hayönglenre pöri chū-ö in meh: ngö ṙô chin, Më-eṅ man Tēv chu.
15Eltī meh nun minë ṙētak chu: ṙānyen chu ṙā-ang eltī yip lā-al chu: ṙā-ang in cha inrē yip mahakihten chu.
16Yang an yēḵ ngam kūö meh nö i kui ngòh tarik meh: hayöölen chu im hanāngen neūkölōn meh.
17Ō Mā Tēv, uh chin sirōngkūö; sā chu havëken meh: hök-ngen yip tötlöök nö sirōng-kūö, hökngen cha nö chēv nö el Chūök Kupah.
18Hökngen nup töminyôiny-aṅ minuh nö un huveū-euṙô: nup töchōchö ṙô nö chökhu-ṙô tö tölöök, nö hol tö inkeūṙö, mināich inrē.
19Ō yöng ṙôkö ngam lanöökö meh, ngam ṙahāḵtö meh, lumnööṙö yip tö pa-ekūö tö meh: ngam tī meh pòkūö cha yip mahayönglenre nö in meh, nö i kūö vē kūön tarik!
20Hanyatngen chu man min el nyat ngam kūö meh, ṙā-ang i nup tī tarik nö halēnngövah tīre; hayūni yip min tö meh nö el rūkui nö ṙā-ang i nup litāk lamā-alkūö.
21Tökôlò an yēḵ ngam Mā Tēv: pò ò nö hameukhömat chu tö ngam pinngangkūö hanāngen neūkölōn ò, nö el ngam töngëḵ elpanam.
22Ngö ṙô pöri chū-ö tö pinhë-eṅkūöre, Rökiṙen chin ngaich ṙā-ang i mat meh: hang ngam ṙô chu pöri më-eṅ vinë-elkui yē chu vë-ekūö meh.
23Ō hāngen yin tö ngam Mā Tēv, ṙòkhöre yī-ö töhet ò! Aṅten yip tökô-en an ngam Mā Tēv, pōyen tī inrē nö reushö yip mahakeūlen la-enre.
24Hangë-eṅre hökngen ngam ellōn meh nö un pa-ekūö: ṙòkhöre yī-ö mameūka im Mā Tēv.
Currently Selected:
Salmai 31: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
