Salmai 25
25
Invëkö Inchō-okūö Hěnghöre Linaklö
1Hachohlö ellōnre chin in meh: Ō Mā Tēv.
2In meh chin hayönglenre, Ō Tēv chu: un hökiṙen yip lā-al chu nö mihôiṅ tö chu, uh chin hökiṙen sirōngkūö.
3Hôṅ, öt hĕng tak min tösi-rōngkūö yip hamöktöre nö in meh: sirōngkūö yip min acha-a yip tö löknyu chööḵ-nyi nö ulāingövah tīre.
4Ō Mā Tēv, hameukhömat chu tö nup talöökö meh: haköpten chu tö nup talöökö meh.
5Hachōkūö chu im kanô-en meh, haköpten chu inrē: tön më-eṅ man Tēv inyööken chu; in meh chin höka i rò-òtö nômö chu.
6Ō Mā Tēv, köpölōn man yēḵ tö nuk miṙēlōnre: nuk hanāngen neūkölōn meh inrē; pò u nöng sāre i tö misī.
7Uh man yēḵ köpölōn tö nuk tökööl nyinī-ö chu, un rēhĕn tö nuk tanôichngen chu: fēken chu asā ngam hanāngen neūkölōn meh, chööḵnyö tö ngam lanöökö meh, Ō Mā Tēv.
8Tölöök an ngam Mā Tēv töchiplö inrē: lökten an min nö haköptö tököölö fālen nö el ngam talöökö.
9Hachōkūö ngam tömöi min anga-aṅ nö im inkaha fālen: ngaich haköptö ngam tömöi min anga-aṅ nö el ngam talöökö ò.
10Ṙòkhöre nup talöökö ngam Mā Tēv nö hanāngen neūkö-lōn, kanô-en inrē: nö in yip tököp tö nup kinlēḵngô, chöngö ò inrē.
11Ō Mā Tēv, chööḵnyö tö ngam minë-eny meh: aṙēlen chu tö ngam tökööl chu, tön pōyen an.
12Öpyòh ap tarik töpa-ekūö tö ngam Mā Tēv? Haköpten ò anga-aṅ nö el ngam talöökö ngam atöllö ò.
13Iyöng lanööṙen min ap nômö ò: ngaich öp kūön ò min nö amīnu tö panam.
14In cha an ngam inlēnö aṅ im Mā Tēv, yip töpa-ekūö tö ò: ngaich anga-aṅ min nö hameukhö mat cha tö ngam kinlēḵngôre.
15Örheūheu nun në mat chu nö lā im Mā Tēv: pòn filösnyö röön chu min anga-aṅ nö ṙā-ang el öp inhāṅl.
16Havöötöre man in chu, aheū-kölōn inrē tö chu: tön öt hōlu chin, kihngen inrē.
17Ṙūönyöre kanihngen ellōn chin: Ō yĕh kēnyen chu ṙā-ang i në kanihngen chu.
18Ngëichkö kanihngen, inlöi-nyö chu inrē: ngaich aṙēlö në tökööl chu.
19Ngëichkö vē lā-al chu, tön maṙôngö yin: surīkhen chu nö i ötmilēḵre.
20Ṙapkö ngih nômö chu, ṙā-nyen chu inrē: uh chin yēḵ hökiṙen sirōngkūö, sā chu hayönglenre in meh.
21Hökngen lanöökö yēḵ, cha-niplö inrē, nö aṅten chu: tön in meh chin höka.
22Ō Tēv, ṙānyen Israĕl: ṙā-ang i nup kanihngen ò.
Currently Selected:
Salmai 25: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
