Salmai 22
22
Inyôkö Chanökö Tö Ngam Tinkökö Nöinyö
1Tēv chu, Tēv chu, kūöyòh öm ṙāngen chu? Kūöyòh öm marôvat töm hinòlṙen chu, i minë ṙô chu ayôṙa inrē?
2Ō Tēv chu, havë-a chin tö el sakāmö, hö-ö pöri më-eṅ sapṙô: öt chēv chin inrē tö el hatööm.
3Töhet pöri më-eṅ: Ō më-eṅ, mī-iyöng el chūök töha-öinyö tö Israĕl.
4Hayönglenre yik yöng ih nö in meh: hayönglenre cha-a, ṙānyen cha më-eṅ.
5Havëken meh cha-a, ngaich ṙānyuvö: hayönglenre nö in meh, ngaich öt sirōngkūö.
6Höng kamlökö pöri chū-ö, öt tarik: minṙēngö tarik, töt hakūökaṙen tö tarik.
7Ṙòkhöre yip mahatīönken chu nö hayīölngen chu: kunyòk-nyö minuhre, kileung kuire nö ngö ṙô;
8Hayönglenre an nö im Mā Tēv; hökngen ò nö ṙānyen ò: hökngen ò nö ṙānyen ò, tön tö kuchīkölōn an nö in ò.
9Më-eṅ pöri kamënyen chu ṙā-ang el chūök kanūönö: ngaich vīten chu më-eṅ ha-yönglenre hē chu ṙòngmö pōḵ ap yöngre.
10Löktökūö el chūök kanūönö chin kavaltu in meh: lök tö ellōn yöng chu man öm Tēv chu.
11Um man yēḵ marôvat tö chu; tön röhta ap kanihngen: öt hĕng tak mahayööken.
12Havīlen chu nun në kōiny nuā; tökalēḵ kōiny nuā aṅ Pāsan nö havīlen chu.
13Vā-alkūöre nun nö in chu: sā töyal, ap mamū-a ṙô lāyön.
14Ṙösnyu chin sā mak, ṙòkhöre në tangëḵ chu nö öt taptöre kūö: sā paröm an ngam ellōn chu; ayëri an nö ellōn chu.
15Nyôngö an ngam kumlēḵ chu sā raktit tanīöyö; panta inrē ngam litāk chu nö i samā chu: ngaich më-eṅ kēten chu el pitung kinpaha.
16Havīlöng chin tö në am kalōngi kūö chin tö vē töla-evṙen tö tötlöök: tufunngö eltī chu yin, uk röön chu inrē.
17Ṙòknyöre ṙô chin tö në tangëḵ chu: Ngëicha yin, hat-ēltö matre inrē tö chu.
18Michööḵöre yin tö në inyut chu: ngaich kalah taneū-ngenre cha-a tö ngam tö-aṙū-uti inyut chu.
19Uh pöri yēḵ më-eṅ marôvat tö chu, Ō Mā Tēv: Më-eṅ holṙen chu, hēṙen man yēḵ holṙen chu.
20Ṙānyö ngih nômö chu im kūö sanët: ngam töng hĕng in chu ṙā-ang i minhôiṅyö ngam am.
21Hayööken chu ṙā-ang elvāng ngam lāyön: hôṅ, ṙā-ang i sinrōl nup hanchōn kōiny nuā; më-eṅ samap ṙô chu!
22Ve-eny ngam minë-eny meh chin min in yip holre: ha-öinyö meh chin min el ṙôngö yip tömaṙôngö.
23Ha-öinyan yin yī-ö töpa-ekūö tö ngam Mā Tēv: hapōilen ò ṙòkhöre yī-ö kūön Yāköp; ṙòkhöre yī-ö kūön Israĕl söklöre in ò öi pa-ekūö.
24Pò ò nö öt höhölōn, ane inrē öt pa-ekūö tö kanihngen töhakihtuṙen: öt rēhĕn anga-aṅ nö hanyatngö kūöre tö ò; yē ò pöri nö havëken ò, hang anga-aṅ.
25Ṙamā-ang in meh ap nöinyö tö chu in vē tömaṙôngö: i kūö cha chin min yip töpa-ekūö tö ò öich kētö nup töchūöku kinlēḵngô chu.
26Nyā yip min nö tööḵngen yip töyāchö ellōn: Ha-öiny ngam Mā Tēv cha-a min, yip chamöhan; aṅ an yēḵ ngam fanöinylö meh nö örheūheu!
27Ṙòkhöre i manā-angkūö ngih panam min nö köpölōn, ngaich havöötöre nö im Mā Tēv: ngaich ṙòkhöre min aṅ në pumnāmö tarik nö salāmö meh.
28Pò ngam pūlngö nö pūlngö ngam Mā Tēv: anga-aṅ an inrē mahayöng nö i kui pumnāmö tarik.
29Ṙòkhöre yip tökiröng alaha ing panam min nö nyā-av-kūö, salām inrē: ṙòkhöre cha-a inrē yip chamuh el tumlat nö sōntöre nö i kūö ò, anga-aṅ inrē öp tötkô nö haköp nômöre nö aṅ.
30Hĕng tak öp min kūön lamök la-en ò: ngaich eūka min angū-ö tö ngam Mā ip tahëng tumkölchap.
31Yih min cha-a ngaich vënyö lanöökö ò: nö in yip tarik tökayôḵnyu min, tö ò nö anga-aṅ tö tī tö e.
Currently Selected:
Salmai 22: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
