Salmai 119
119
Chöngö ngam Tēv
1Tökôlò yin vē tö teung nö el talöökö: vē lamök im chöngö ngam Mā Tēv.
2Tökôlò yin vē mahaköp në chöngö Ò: vē chamöhan nö keuheūttö ellōn re.
3Hôṅ, rö-ö yin cha-a nö la-en tö töchōich: lök el minë talöökö Ò yin.
4Tölṙô ih Man ngaich i në chöngö: pò ih hōtu haköpö u pētngen.
5Mah, haköpi nun öre në talöökö chu: nö inköpkö minë chöngö Meh.
6Ngaich öt sirōngkūö öre chū-ö: yē chu milēḵ tö në chöngö Meh.
7Ha-öinyö Meh chin min hol tö tö chiplö ellōn: yē chu haköp ngam tö chip inkaha aṅ in Meh.
8Haköpkö minë chöngö Meh chin min: uh chin yēḵ keuheutngöre ṙa-ayö.
Hināngö Minë Chöngö Ngam Tēv
9Aṅtī tö yòh ang ngòh ṙāl tarik nö ahetlö el talöököre? Höng ngam inṙēmngen nö sā ngam ṙô meh.
10Chöhö Meh chin keuheūttö ellōn re: Ō, uh chin yēḵ kānngöre tö minë chöngö Meh.
11Halinngen ngam ṙô Meh chin ellōn re: pò chu sōḵ köölö fālen in Meh.
12Ō Mā Tēv, Tökôlò Man: haköpten chu Man tö minë chöngö Meh.
13Vënyö nup inkaha fālen chin nö ṙòkhöre, aṅ elvāng Meh: nö löknyö në minuh chu.
14Ṙāmölōn chin i talöökö minë chöngö Meh: sā re tö kanôlò.
15Piṙūtkö minë chöngö Meh chin min: milēḵ inrē tö minë talöökö Meh.
16Kumchikngenre chin min i minë chöngö Meh: öt hō öich vaichngö töm ṙô Meh.
Ṙanāmölōn I Minë Chöngö Ngam Tēv
17Pōyen tī Man i ngòh kūön re, hòṅ chu aṅ: hòṅ chu min haköp ngam ṙô Meh.
18Löpnyökūö në mat chu: hòṅ chu meuk nup pinngangkūö aṅ im chöngö Meh.
19Töt ngöhaka chin ing panam: un hanyāti minë chöngö Meh nö in chu.
20Lakuk ön ngih ellōn chu: tö kūö mineūka nö i minë inkaha fālen aṅ in Meh, nö marô-òten.
21Vëkö yip mahakeūlenre Man ngaich, yip tö ngaich nö ötkôlò: yip kamānngöre tö minë chöngö Meh.
22Kēngö ngam minṙēngö nö ṙā-ang in chu: tön haköp në chöngö Meh chin.
23Ūichhak inrē yip kūön rācha ngaich chōchô nö lā in chu: piṙūtkö minë chöngö Meh pöri ngòh kūön Meh.
24Ööi chu inrē minë chöngö Meh: mahalēnö chu inrē.
Kalah I Linökö Minë Chöngö Ngam Tēv
25Tanti ön ngih nômö chu nö el tumlat: ha-aṅhaṅ chu Man sā ngam ṙô Meh.
26Vënyö në talöököre chin, ngaich Me-eṅ sapṙô chu: haköpten chu tö minë chöngö Meh.
27Vīten chu akaha-elmat tö talöökö minë chöngö Meh: hòṅ chu min piṙūtkö nup pinngangkūö la-en Meh.
28Paṙööyi nômö chin tö kūö lumngan: hangëken chu Man yēḵ sā ngam ṙô Meh.
29Kēnyen chu ṙā-ang i minyôiny: aheūkölōn kētö ngam chöngö Meh nö in chu.
30Atöllö ngam talöökö kanô-en chin: i kūö re tī chin tö minë inkaha fālen aṅ in Meh.
31Haköpngö re chin i minë chöngö Meh: Ō Mā Tēv, uh chin yēḵ sumrōngikūö.
32Lök el talöökö minë chöngö Meh chin min fal: yē Meh min ṙūönyö ṙôktö ellōn chu.
Invëkö Mikah Elmat
33Ō Mā Tēv, haköpten chu tö talöökö minë chöngö Meh: ngaich chū-ö min haköpö e söl ip manā-aṅ.
34Kētö mikah elmat chu, ngaich haköp ngam chöngö Meh chū-ö min: hôṅ, haköpken e chin min keuheūttö ellōn re.
35Kiröönngen chu el kanröönö minë chöngö Meh: tön in e chin ööire.
36Hachōtö ellōn chu i minë chöngö Meh: un im yinikhanga.
37Havööngökūö chu ṙā-ang i nginëichkö chanök alaha: ha-aṅhaṅ chu el minë talöökö Meh.
38Haköpngö ngam ṙô Meh i ngòh kūön Meh: ngòh tö pa-ekūö tö Meh.
39Havööngökūö ngam minṙēngö chu, ngam pinhe-eṅ kūö chu: tön tölöök an ngam inkaha fālen aṅ in Meh.
40Yĕh meuk, yīkölōn chin tömrit minë chöngö Meh: ha-aṅhaṅ chu im lanöökö Meh.
Im Chöngö Ngam Tēv Ṙinātö Ellōn
41Ō Mā Tēv, hökngen minë neūkölōn Meh yēḵ nö yih nö in chu: ngam inyööken aṅ in Meh, sā ngam ṙô Meh.
42Hòṅ chu min sapṙô ò, ngam mumṙēngen chu: tön hayönglenre chin in Meh.
43Un kē-ĕyö nö ahāti ngam ṙô kanô-en nö elvāng chu: tön maheūṅku chin im inkaha fālen aṅ in Meh.
44Ngaich ngati chū-ö min iṙūhen höng örheūheu: haköpkö në chöngö Meh.
45Lök im chunhëṅṙen röön re chin min kiröönngöre: pò chu chöh minë chöngö Meh.
46I kūö rācha chin min inrē kakkö në chöngö Meh:
47Hanyamngen re chin min i në chöngö Meh: në hanāngen chu.
48Hachônglö në kël re chin inrē i në chöngö Meh, në hanāngen chu: piṙūta chin min i në chöngö Meh.
Im Chöngö Ngam Tēv Inyönglen
49Köpölōn tö ṙô re i ngòh kūön re: tön vīten chu Man meūka.
50Angū-ö ön inṙamlōn chu hē el kanihngen chu: pò ngam ṙô Meh nö ha-aṅhaṅ chu.
51Pōyen pinhe-eṅkūö tī yip mahakeūlenre tö chu: hö-ö pöri chū-ö kānköre töm chöngö Meh.
52Ō Mā Tēv, köpölōn chin tök misī inkaha fālen aṅ in Meh: ngaich öich haṙamkölōn re.
53Pinhe-eṅkūö öp in chu: pò yip tötlöök ṙamā-ang chöngö Meh.
54Höng tinkökö chu nun minë chöngö Meh: el öp patī chu chöh töhet.
55Ō Mā Tēv, köpölōn chin tö ngam mine-eny Meh tö el hatööm: ngaich öich haköpkö ngam chöngö Meh.
56Angū-ö inkôlò in chu: pò chu haköpkö minë chöngö Meh.
Hanāngelōn Tö Minë Chöngö Ngam Tēv
57Minchööḵö chu An ngam Mā Tēv: ngāchô chin tö re min öich haköpkö në ṙô Meh.
58Keuheūttö ellōn re chin havëkö inṙētöre in Meh: aheūkölōn yēḵ tö chu, sā ngam ṙô meh.
59Fēkö el talöökö re chin: ngaich kētö re i minë chöngö Meh.
60Kurāten chin, öt ahāṅken re: öich haköpkö në chöngö Meh.
61Vinngö vinöönö chin tö në tökuvaha vē tötlöök: hö-ö pöri öich vaichngö tö ngam chöngö Meh.
62Choholre chin tö chūölhatööm öich ha-öinyö Meh: pò ngam tö chip inkaha fālen aṅ in Meh.
63Nôlö yip tö pa-ekūö chin tö Meh nö ṙòkhöre: acha-a inrē yip mahaköpkö chöngö Meh.
64Ō Mā Tēv, tööḵlö ön ngih panam tö neūkölōn Meh: haköpten chu Man tö minë chöngö Meh.
Kamngö Minë Chöngö Ngam Tēv
65Löökö tī Man i ngòh kūön re, Ō Mā Tēv: sā ngam ṙô Meh.
66Haköpten chu tö ngam tölöök inkaha fālen, mikah inrē: tön ṙātö-ellōn re chin i në chöngö Meh.
67Urĕh chin sin kihten ngaich lōngen: ngaich chin töngamuh haköpkö në chöngö Meh.
68Tölöök Man Me-eṅ, tölöökö tī inrē: haköpten chu tö minë chöngö Meh.
69Vī minyôiny yin vē mahakeūlenre nö lā in chu: keuheūttö ellōn re pöri chū-ö haköp në chöngö Meh.
70Sā inpūöṙö ta-öng nup ellōn cha, tö sumngöö re: tö ööire pöri chū-ö tö ngam chöngö Meh.
71Tölöök an nö in chu öch hakihten re sin: hòṅ chu haköp në chöngö Meh.
72Mötlö an ngam chöngö ngam elvāng Meh nö in chu: tö tököṅnyu humlum, rupīö inrē.
Ngam Lanöökö Minë Chöngö Ngam Tēv
73Vī-i chu nun minë kël Meh, hachōḵngö inlaha chu inrē: kētö mikah-elmat chu hòṅ chu haköp në chöngö Meh.
74Meūkö chu min yip tö pa-ekūö tö Meh, ngaich ṙāmölōn: pò chu maheūṅkku im ṙô Meh.
75Ō Mā Tēv, akahalōn chin tö minë inkaha fālen aṅ in Meh nö tö chip: tö Meh inrē im kanô-en re hakihten chu.
76Ve-ekūö Meh chin, hökngen ngam hanāngen neūkölōn Meh nö inṙamlōn chu: sā ngam ṙô Meh i ngòh kūön re.
77Hökngen minë miṙēlōn Meh nö yih nö in chu, hòṅ chu aṅ: tön ööi chu aṅ ngam chöngö Meh.
78Hökngen yip mahakeūlenre yēḵ nö sirōngkūö; tön kavalngen chu yip nö vaich: piṙūtkö minë chöngö Meh pöri chū-ö min.
79Hökten cha yip tö pa-ekūö tö Meh nö havöötöre nö in chu: hòṅ cha min nö akahakūö tö minë chöngö Meh.
80Hökngen ngih lōn chu nö teung nö i minë chöngö Meh: hòṅ chu öt sirōngkūö.
Invëkö Ṙinānyö
81Tayēṙö el lōn chin tö kūö lōn re töm inyööken: im ṙô Meh pöri chū-ö meūka.
82Paṙeūmi elmat chū-ö tö kūölōn re töm ṙô Meh: yē chu ngö ṙô, Ĕhē Öm min haṙamlōn chu?
83Pò chu vītöre sā uk chūök mak el lul: hö-ö pöri chū-ö vaichngö tö minë chöngö Meh.
84Am nup sakāmö ngòh kūön Meh: ĕhē Öm min akah fālen cha vē töt mahakôlò chu?
85Ul anūlö chu yin vē mahakeūlenre: vē töt tamömrit ngam chöngö Meh.
86Ṙòkhöre nun minë chöngö nö tö kô-en: vaich cha-a nö öt hakôlò chu; holṙen chu Me-eṅ yēḵ!
87Öhtö keuheūt yin tö chu, nö i kūö ngih panam: hö-ö pöri chū-ö ṙāngö minë chöngö Meh.
88Ha-aṅhaṅ chu, sā ngam hanāngan neūkölōn Meh: hòṅ chu min haköp minë chöngö nö elvāng chu.
Mikah I Minë Chöngö Ngam Tēv
89Ō Mā Tēv, örheūheu an ngam ṙô Meh: nö köpngö nö el halīöngö.
90Ngam kanô-en Meh nö i vē tumkölchap nö ṙòkhöre haköpngö ngam tumlat Man, ngaich köp angū-ö.
91Köp nun tö töngamuh sā minë chöngö Meh: pò në taṙòkhöre nö kūön Meh.
92Yĕn öt ööi chu öre ngam chöngö Meh: ngaich chū-ö öre ötkôlò i kanihngen re.
93Öthō chin vaichngö min tö në chöngö Meh: pò Meh aṅtī tö u ha-aṅhaṅ chu.
94Me-eṅ meh chin, hayööken chu: tön chöh minë chöngö Meh chin.
95Höngöre yin vē tötlöök nö hòṅ fëlngen chu: ngëichkö minë chöngö Meh pöri chū-ö min.
96Ngaich chin meuk manāngen nup tö teung: pōiti pöri ngam chöngö Meh.
Hanāngenlōn Tö Minë Chöngö Ngam Tēv
97Ō, Yöng hanāngen chu töm chöngö Meh! Angū-ö an piṙūtkö chu i el në sakāmö nö ṙòkhöre.
98Akaha chin tö vē lā-al re tökūö tī minë chöngö Meh: pò u nö örheūheu nö in chu.
99Mööḵlö mikah elmat chin tö vē haköptöre nö ṙòkhöre: pò minë chöngö Meh nö anū-ö piṙūtkö chu.
100Mötlö mikah elmat chin tö vē tö köiny: pò chu haköp në chöngö Meh.
101Ṙā-ang röön re chin el nup talöökö: pò chu haköp ngam ṙô meh.
102Hö-ö chin kānköre ṙā-ang minë inkaha fālen aṅ in Meh: pò Meh haköpten chu.
103Iṙôkö kumchikkūö öich tö pinchākö minë ṙô Meh: hôṅ, mötlö pinchākö tö höni nö elvāng chu.
104Lökten i minë chöngö Meh chin teūngen tö mikah elmat: lökten chin surīkhö tö minyôiny talöökö.
Hanātö Ṙamā-ang In Minë Chöngö Ngam Tēv
105Ëāṅvö röön chu an ngam Ṙô Meh: hanātö inrē nö el kanröönö chu.
106Kilēḵngô re chin, ngaich haköpngö e: tö chu min haköp minë tö chip inkaha fālen aṅ in meh.
107Kiröngö inkihten chin: Ō Mā Tēv, ha-aṅhaṅ chu sā ngam ṙô Meh.
108Ō Mā Tēv, ve-ekūö Meh chin, hō Man yēḵ tö në tökētu kanahanglōn chu: haköpten chu inrē tö në inkaha fālen aṅ in Meh.
109Örheūheu an ngam nômö chu nöng eltī chu: ngaich sön öich öt vaichngö töm chöngö Meh.
110Ṙātö tinngöp chu ön ngòh tötlöök: sönen chū-ö ötlō-ongkūö ṙā-ang i minë chöngö Meh.
111Kē minë chöngö Meh chin nö amin chu nö örheūheu: pò u nö anū-ö ṙanāmölōn chu.
112Harôntö ellōn re chin öich hateung në chöngö Meh: örheūheu, söl ip manā-aṅ.
Kumchikṙen I Minë Chöngö Ngam Tēv
113Surīkhö yip tö nët kang ellōn chin: hāngenlōn pöri chū-ö tö ngam chöngö Meh.
114Chūök chu Man Me-eṅ hayunngöre; lanaklö chu inrē: im ṙô Meh chin meūka.
115Kē-ĕngre yin tö chu, yī-ö tö la-evṙen tö tötlöök: hòṅ chu haköp në chöngö ngam Tēv chu.
116Ṙapken chu sā ngam ṙô Meh, hòṅ chu aṅ: uh öich hökiṙen sirōngkūö töp maheūṅkkö re.
117Kichöötlen chu lātulöng hòṅ chu öt palā-aiṙen: ngaich iṙuhen öich milēḵṙen tö minë chöngö Meh.
118Töng ranö-ö yin tö tī Meh, vē tö vaich nö i minë chöngö Meh: pò nup michīl cha nö minyôiny.
119Ṙòkhöre yip tötlöök nö ṙā-aiṙen tö Meh nö ing panam sā sīk vët: lökten chin hangenlōn tö minë chöngö Meh.
120Kichëyöre ön ngih alaha chu kūö pinheṅ-eṅkūö tö Meh: ngaich chū-ö pa-ekūö tö minë inkah fālen aṅ in Meh.
Hināngö Minë Chöngö Ngam Tēv
121Keuheūten chin im inkaha fālen, kinṙôka inrē: uh chin hökiṙen i më mahakihten chu.
122Me-eṅ yēḵ ṙënngö ngòh kūön re im tölöök: un hökiṙen ngam mahakeūlenre nö hakihten chu.
123Öt meuk nun në mat chu kūö ngam inyööken aṅ in Meh: kūö ngam tölöök ṙô Meh inrē.
124Sā ngam miṙēlōn re tī Man i ngòh kūön re: haköpten chu inrē tö minë chöngö Meh.
125Kūön Meh chin, kētö mikah elmat chu: hòṅ chu akahakūö tö minë chöngö Meh.
126Ngaich an nö ṙētak ngam Mā Tēv nö kētöre: pò cha nö harööḵngen ngam chöngö Meh.
127Lökten chin hāngenlōn tö minë chöngö Meh: tulöng tö humlum, hôṅ, tulöng tö tövai humlum.
128Lökten chin pōilö lōn tö minë chöngö Meh, i nup töng chip nö ṙòkhöre: surīkhö nup talöökö minyôiny chin.
Kuilōn I Hināngö Minë Chöngö Ngam Tēv
129Pinngangkūö nun minë chöngö Meh: lökten ön ngih lōn chu nö haköpö u.
130Kētö hanātö an ngam kanaknyö ṙô Meh: kētö mikah elmat töt akaha inrē.
131Pōiti elvāng chin vā-ainykūö re: uhā-a nômö ngaich, pò chu yīkölōn tö minë chöngö Meh.
132Havöötökūö re Man yēḵ in chu, aṙē-ĕlōn inrē tö chu: sā tī Meh ṙung in cha yip tö hāngenlōn tö ngam mine-eny Meh.
133Halēntö vāngö chu im ṙô Meh: un höktu öt lanöökö nö hayöngö chu.
134Ṙānyen chu ṙā-ang el inkihten tö tarik: hòṅ chu min haköp në chöngö Meh.
135Hayangtö kūö re Man yēḵ i kui ngòh kūön re: haköpten chu inrē tö minë chöngö Meh.
136Sā röön mak tahël nun në mak mat chu: pò cha nö öt haköp në chöngö Meh.
Ngam Lanöökö Minë Chöngö Ngam Tēv
137Ō Mā Tēv, tö chip Man Me-eṅ: chiplö inrē ngam inkaha fālen nö in Meh.
138Hachöngten minë chöngö Man nö im lanöökö: im kanô-en takô inrē.
139Keuheūt chin ngaich kā-ayö, tö kūö ngam kumlēḵ lōn re: pò vē vē lā-al chu nö vaichngö tö minë ṙô Meh.
140Töhet takô an ngam ṙô Meh: lökten ngam Kūön Meh nö hāngen tö e.
141Kūönö chin, ha-āchiṙen inrē: hö-ö pöri öich vaichngö tö minë chöngö Meh.
142Ngam lanöökö Meh: töt chanuhuvṙen an nö lanöökö: kanô-en ngam chöngö Meh inrē.
143Lökö chin tö kanihngen ellōn, chanökö inrē: söönen minë chöngö nö ööi chu.
144Örheūheu nun minë chöngö Meh nö chip: kētö mikah elmat chu, ngaich aṅ chū-ö min.
Invëkö Ṙinānyö
145Ō Mā Tēv, sapṙô chu; havëken Meh chin keuheūt tö ellōn re: haköp minë chöngö Meh chin.
146Havëken Meh chin: hayööken chu, hòṅ chu min haköp në chöngö Meh.
147Urēhĕkūö minlīlö peuheū chin, öich havë-a: i minë ṙô Meh chin meūka.
148Urēhĕlmat chin tö amahtö hatööm: pò chu hòṅ piṙūtkö ngam ṙô Meh.
149Hang ṙô chu, sā ngam hanāngen neūkölōn: Ō Mā Tēv, ha-aṅhaṅ chu, sā ngam inkaha fālen aṅ in Meh.
150Ṙūötöre yin vē tamömrit öt lanöökö: marôvat yin tö ngam chöngö Meh.
151Ō Mā Tēv, röhta Man Me-eṅ: ṙòkhöre inrē në chöngö Meh nö tö kô-en.
152Misī-iten chin akahalōn, lökten i minë chöngö Meh: tö Meh Öm vīten u nöng örheūheu.
Invëkö Hinòlṙen
153Ngëichkö në kanihngen chu, ngaich ṙānyen chu: tön öt vaichngö chin tö ngam chöngö Meh.
154Ve-elkui chu, ṙānyen chu inrē: ha-aṅhaṅ chu sā ngam ṙô Meh.
155Marôvat an ngam inyööken tö ngam tötlöök; pò cha nö öt chöh minë chöngö Meh.
156Ō Mā Tēv, kiröng nun në miṙēlōn Meh: ha-aṅhaṅ chu sā minë inkaha fālen aṅ in Meh.
157Maṙôngö yip mahakihten chu, yip lā-al chu inrē: sönen pöri chū-ö öt kānköre ṙā-ang i minë chöngö Meh.
158Ngëichken vē tö tī tö öt kanô-en chin, ngaich haṙivlōn: pò cha nö öt haköp ngam ṙô Meh.
159Ngëichkö hanāngen chu, tö minë chöngö Meh; ha-aṅhaṅ chu, Ō Mā Tēv: sā ngam hanāngen neūkölōn Meh.
160Kanô-en an ngam ṙôken ngam ṙô Meh: ṙòkhöre nup inkaha fālen aṅ in Meh nö örheūheu nö köp.
Hōltö Ellōnre I Minë Chöngö Ngam Tēv
161Öt chööḵnyu vē kūön rācha nö hakihten chu: sökhak pöri ngih ellōn chu nö pa-ekūö tö minë ṙô Meh.
162Ṙāmölōn chin im ṙô Meh: sā öp tö kôtökūö tö pôḵ re tö töpōyen.
163Surīkhö minyôiny chin; sa-òkhö e inrē: hāngen pöri töm chöngö Meh.
164Satköti heuh chin ha-öinyö Meh i töhĕng sakāmö: pò minë tölöök inkaha fālen aṅ in Meh.
165Kirööngen lanāmö yin vē töhāngen töm chöngö Meh: ngaich öt hētu cha-a nö kavē-ĕre.
166Ō Mā Tēv, meūkkö ngam inyööken chin: ngaich keuheūten i në chöngö Meh.
167Haköpkö në chöngö Meh ön ngih ellōn chu: sāṙaklöng hanāngen chin tö u.
168Haköpkö minë chöngö Meh chin: pòn i kūö chu minë talöökö Meh nö ṙòkhöre.
Invëkö Hinòlṙen
169Ō Mā Tēv, hökngen ngam ṙô chu havë-a nö röhta nö i kūö Meh: kētö mikah elmat chu, sā ngam ṙô Meh.
170Hökngen nup ṙô chu ve-elkui nö sölta nö in Meh: ṙānyen chu sā ngam ṙô Meh.
171Hökngen në minuh chu nö ṙô tö nöinyö Meh: tön haköpten chu Man tö minë chöngö Meh.
172Hökngen ngam litāk chu nö tikökngö ngam ṙô Meh: pò minë chöngö Meh nö tölöök.
173Höngöre an yēḵ ngam kël Meh nö holṙen chu: tön atöllö minë chöngö Meh chin.
174Yīkölōn chin tö inyööken aṅ in Meh, Ō Mā Tēv: ngam chöngö Meh an ööi chu inrē.
175Hökngen ngam nômö chu nö aṅ, ngaich ha-öinyö meh min angū-ö: hökngen minë inkaha fālen aṅ in Meh nö holṙen chu inrē.
176Lō-ongkūö chin sā tö chatngen sīṅp: chöh ngòh kūön re Man yēḵ tön öt vaichngö chin tö në chöngö Meh.
Currently Selected:
Salmai 119: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
