Salmai 118
118
Nöinyö Kūö Minhòiṅyö
1Ō Ha-öiny ngam Mā Tēv; tön tölöök An: pò ngam neūkölōn Ò nö köp nöng örheūheu.
2Hökngen Israĕl nö ngö ṙô tö Meh: Tö ngam neūkölōn Ò nö köp nöng örheūheu.
3Hökngen ngam patī Āròn nö ngö ṙô töngamuh: Tö ngam neūkölōn Ò nö köp nöng örheūheu.
4Hökngen cha töngamuh, yip tö pa-ekūö tö ngam Tēv, nö ngö ṙô: Tö ngam neūkölōn Ò nö töng örheūheu.
5Havëkö ngam Mā Tēv chin i kanihngen re: sapṙô chu ngaich ngam Mā Tēv, asöklen chu ngaich nö el tö pōiti chūökö.
6Lā in chu An ngam Mā Tēv; öt hō chin min pa-ekūö: suh kanô-òṅ tarik nö in chu?
7Lā in chu An ngam Mā Tēv, nö in yip holṙen chu: lökten chin min meuk lōn re in cha yip tö sumrīk tö chu.
8Ĕhten an ngam inyönglen nö im Mā Tēv: tö ngam nyanatlö i tarik.
9Ĕhten an ngam inyönglen nö im Mā Tēv: tö ngam nyanatlö i kūö rācha.
10Ṙòkhöre yin vē pumnāmö tarik nö havīlen chu: i mine-eny ngam Mā Tēv pöri chū-ö rökngen cha.
11Havīlen chu yin, havīlen chu yin: i mine-eny ngam Mā Tēv chū-ö min rökngen cha.
12Havīlen chu yin sā nup kilamta-ō; hanyāngi yin sā nup tameūyö tö öktikūö i kūö chōn: i mine-eny ngam Mā Tēv chū-ö min rökngen cha.
13Kalē-ētī me-eṅ kuringten chu, pò chu hōtu fukngö: holṙen chu pöri ngam Mā Tēv.
14Ngam Mā Tēv pöri kumlēḵ chu, tinkökö chu inrē: vītöre An inrē nö inyööken chu.
15El inrūkui yip tölöök ap ṙô ṙanāmölōn, inyööken inrē: tī tö öt pinhe-eṅkūö an ngam lahāmö ngam Mā Tēv.
16Hapōilöng an ngam lahāmö ngam Mā Tēv: tī tö öt pinhe-eṅkūö an ngam lahāmö ngam Mā Tēv.
17Öthō chin min kapah, aṅ pöri: ngaich ve-eny nup la-en ngam Mā Tēv.
18Chökhutī An ngam Mā Tēv, nö chökṙen chu: hö-ö pöri Anga-aṅ nö kēten chu im kinpaha.
19Löpnyökūö minë inkūp lanöökö in chu: hòṅ kuhēthötre chin ël u, hòṅ Ha-öiny ngam Mā Tēv chin.
20Ngih ön yih inkūp ngam Mā Tēv: kuhēthötre yip tölöök min nö ël e.
21Ha-öinyö Meh chin min, pò Meh sap ṙô chu: ngaich Öm inyööken chu.
22Ngam ihong tö so-òv tö yip mamānö: vītöre nö yöngkūö sinkeukngö.
23Tī ngam Tēv an angū-ö: pinngangkūö elmat hī An.
24Angū-ö an sakāmö vahī ngam Mā Tēv: ṙāmölōn in min in e.
25Ve-ekūö Meh in, Ō Mā Tēv, hayööken ih töngamuh: vē-ekūö Meh in Ō Mā Tēv, Öm tīntö kanôlò töngamuh.
26Tökôlò An ngam yamih nö i mine-eny ngam Mā Tēv: hakôlò Meh in tö aṅ el patī ngam Mā Tēv.
27Ngam Mā Tēv An Tēv, kētö hanātö An nö in hī: nyëk ngam tökētu tökuvaha, i sinrōl ngam tahāklö tī.
28Me-eṅ Man Tēv chu, ha-öinyö Meh chin min: Me-eṅ Man Tēv chu, hapōilen Meh chin min.
29Ō Ha-öiny ngam Mā Tēv; pò Ò nö tölöök: pò ngam neūkölōn Ò nö örheūheu nö köp.
Currently Selected:
Salmai 118: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
