Salmai 115
115
Töng Hĕng Nö Tökò-en Tēv
1Öt in ih, Ō Mā Tēv, öt in ih, ngam mine-eny Meh pöri tö ha-öinyö: kūö ngam miṙēlōn Meh, kūö ngam kanô-en Meh inrē.
2Kūöyòh ṙöng min vē pumnāmö tarik nö ngö ṙô: Isuh ap Tēv cha töngamuh?
3El halīöngö An pöri ngam Tēv hī: keuheūten An ip töng sitih lōn re.
4Rupīö, humlum inrē insā tēv cha: vahīṙen kuntī tarik.
5Elvāngu nup, rö-ö pöri anū-ö nö ṙô-òv: mātu nup, rö-ö pöri anū-ö nö meuk;
6Nāngu nup, rö-ö pöri anū-ö nö hang: elmëhevö nup, rö-ö pöri anū-ö nö tong;
7Këlu nup, rö-ö pöri anū-ö nö ṙāpa: kalröönu nup, rö-ö pöri anū-ö nö kiröönngöre; öt rēhĕn anū-ö nö löknyö el kilööp ṙô nö ṙô-òv.
8Höng sā u yip vamī-i u: hòṅ, ṙòkhöre yip mahayönglenre nö in u.
9Ō Israĕl, hayönglenre im Mā Tēv: Anga-aṅ An holṙen cha, lanaklö cha inrē.
10Ō patī Āròn, hayönglenre yin im Mā Tēv: Anga-aṅ An holṙen cha, lanaklö cha inrē.
11Yī-ö tö pa-ekūö tö ngam Mā Tēv, hayönglenre im Mā Tēv, Anga-aṅ An holṙen cha lanaklö cha inrē.
12Kūötenre An ngam Mā Tēv tö hī; hakôlò hī An min: hakôlò patī Israĕl An min; hakôlò patī Āròn An min.
13Hakôlò cha An min yip tö pa-ekūö tö ngam Mā Tēv: hĕnghöre tö kiröng tö pōyö inrē.
14Ṙūölö ṙôken yīö An ngam Mā Tēv öi pōi pōilöreṙen: yī-ö, tö yip kūön yīö.
15Tökôlò yin i ngam Mā Tēv: ngam vamī halīöngö tumlat inrē.
16Halīöngö ngam Mā Tēv nun minë halīöngö: kētö ngih tumlat pöri Anga-aṅ nö i vē kūön tarik.
17Rö-ö yin vē kupah nö Ha-öiny ngam Mā Tēv: öt rēhĕn nö hĕngtak tö cha yip chamuh el chūök töt ṙô-òv.
18Hakôlò ngam Mā Tēv pöri min ayī-ö: töngamuhöten, sölmôkö örheūheu inrē; Ha-öiny ngam Mā Tēv yin.
Currently Selected:
Salmai 115: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
