Salmai 109
109
U-yëkö Tarik hē el Kanihngen
1Uh Man ṙāngôre, Ō Tēv: tö ha-öinyö tö chu.
2Pòn vā-ainykūö re ngam tötlöök, ngam tömichīl inrē, nö lā-al chu: ve-ekūö chu yin nö hol tö litāk töminyôiny-aṅ.
3Havīlen chu yin inrē tö ṙô sunrīkhö: kilöönö chu inrē nöng öt chööḵnyu.
4Lā-al chu cha-a kūö ngam hanāngenlōn chu: kētöre pöri chū-ö i vinë-eṅkūötēv.
5Reushu chin tö cha tö tötlöök, nö invahal tötlöök: sunrīkhö, invahal hanāngenlōn.
6Ṙātö tötlöök tarik Man yēḵ nö i kui Ò: hökngen satān nö lahāmö ò.
7Yĕn akaha fālen anga-aṅ, hökngen ò nö kôti nö fāluṙen: hökngen öp ṙô ò vinë-eṅkūötēv nö havöötu, nö tökööl.
8Hökngen nup sakāmö ò nö un pōyen: hökngen ap tahëng nö kē ap chūök ò.
9Hökngen yip kūön ò nö kūön yōich: ap pihö ò inrē nö tafīösi.
10Hökngen yip kūön ò nöng katūöyaṙen, icheūḵa inrē: hökngen cha nö chöh nya-aṅkūöre nö marôvat chūök.
11Hökngen ap tö mileūchen kamë nö keuheūtlöre tī tö nup in ò: hökngen yip aṅ tahëng nö kē nup lumrāḵ ò.
12Hökngen ò nö un hĕngtak ma-aṙēti: un rēhĕn nö hĕng tak tö aṙē-ĕlōn tö yip kūönyōch kūön ò.
13Hökngen yip kūön mu-unôich nö rökiṙen, ip tumkölchap, unôich tö e: hökngen nup mine-eny cha nö sīchiyö.
14Hökngen tökööl yik muvöhngö ò nö haköpka nö im Mā Tēv: hökngen nuk tökööl ök yöng ò kikānö nö un sīchiyö.
15Hökngen u nö i kūö ngam Mā Tēv nö örheūheu: hòṅ ò nö rökngen inköpkölōn tö cha nö ing panam.
16Pòn öt fēkö inmeuktö neūkölōn anga-aṅ: öt hakôlò yāich pöri yip tötkôlò tarik inrē, yip töhaṙīvölōn inrē nö fëli tö ò.
17Hôṅ, hangenlōn anga-aṅ tö rinūtngövah, ngaich teungtöre angū-ö nö i kui ò: öt ööire anga-aṅ tö inkôlò, marôvat angū-ö tö ò.
18Hayutlöre anga-aṅ tö rinūtngövah, nö sā re tö inyut; ngaich meuthöt angū-ö nö ellōn ò nö sā mak, sā nup tavī-i el tangëḵ ò inrē.
19Hökngen e yēḵ nö in ò nö sā öp hilā kinṙumngö ò: nyanëkṙat ò ngam nyanëkṙat ò nöng örheūheu!
20Angū-ö ön ngih raneushö yip la-al chu, aṅ im Mā Tēv: acha-a inrē yip töng chōchöṙô töng nômö chu.
21In chu tī pöri Me-eṅ, Ō Tēv, Mā; kūö ngam mine-eny Meh: kūö ngam neūkölōn Meh nö tölöök, ṙānyen chu Man yēḵ.
22Tön yāich chin tötkôlò inrē: ngaich ngih ellōn chu nö nyahav nö latuhēt.
23Ngaich chin sā chanuhu tö rūöngö nyat: tasòklöng chin, tasòkköti inrē sā mufākö.
24Öt kalē-en nun në kui kinmônö chu, kūö insô-òng aich: öt sangööṙu ngih alaha chu.
25Minṙēngö cha chin inrē: kichinykūöre cha-a yē cha nö meūkö chu.
26Holṙen chu, Ō Mā Tēv, Tēv chu: Ō hayööken chu, sā öp neūkölōn Meh.
27Hòṅ cha nö akahalōn tö ngih nö kël Meh: tö Meh Öm Me-eṅ tö tī-iv tö e.
28Hökngen cha nö rūtngövah, hakôlò pöri Me-eṅ: sirōngkūö cha-a min yē cha nö choholre, ṙāmölōn pöri min ngòh kūön Meh.
29Hökngen yip lā-al chu nö hayūtö tö minṙēngö: hökngen cha nö kahūmöre tö sumrōngkūöre, nö sā kinṙum hilā.
30Holtö elvāng re chin min Ha-öiny ngam Mā Tēv: hôṅ, ha-öinyan chin min in yip tömaṙôngö.
31Pòn söklöre min Anga-aṅ nö lahāmö yip tötkôlò: nö mahayööken ò nö in cha yip ma-akaha fālen nômö ò.
Currently Selected:
Salmai 109: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
