INCHŌḴ-OṘÔ 1
1
Ṙāi Minë Inchōḵ-oṙô
1Inchōkoṙô Sòlòmön, ök kikōnyö kūön Tāvit, rācha aṅ Israĕl:
2Hinôtö tarik nö akahakūö tö mikah inköphöti inrē, akaha elnang tö ṙô öp lamātuhēt mineukö,
3Kē inköphöti ip tölöök tölöökö alaha, lanöökö, kinṙôka tötmichūṙen, töṙong inrē;
4Hòṅ ngam mikah nö kētu nö i töt-akaha, inkaha mikah elmat inrē nö i tö-ayal
5Hòn hang inrē tö-akaha tarik ngaich ṙūölö alahare i inköpö, hòn huveū-en inrē tö-akaha elmat tarik,
6Nö akaha el mat tö inchōḵoṙô kaha ṙô inrē tö nup ṙô tö-akaha kinlah huneū-eu elmat inrē.
Inlēnö Tö Ayal Tarik
7Ranehlö an ngam inkaha i pin hë-eṅkūö tö ngam Mā Tēv; ahūöngö mikah vē tökulō-ov inköphöti inrē.
8Kūön chu, hang inköptöre tö yöng re kikānö;
9Tön tövai nun nö tachöklö kui meh, neūmö likeun meh inrē.
10Kūön chu, yē tötlöök nö haṙöingen meh, um hōḵ.
11Yē cha nö ngö ṙô, Tā-a in ih, töi höng finël tarik, tā-a töi tölngenre hayun töt akaha,
12Tā-a töi sā kūö Chūök Tökapah mīktö tö-aṅ nöng nòngre, sā cha yip chamuh el Anūlö;
13Kôtökūö in min tö töpōi ṙāi chehen hatöö-öl patī re min ayī-ö tö tökīlö tö hī;
14hamūltöre man in ih, hòṅ hī höng hēngö inyul pësa
15Kūön chu, uh man lök el talöökö cha, um vāngtöre el talöökö cha;
16Tön i tötlöök nup kalröön cha nö fal, kurāten yin nö kitaknyö mahām.
17Chök alaha öp inhāṅl nö hanyāknyu nö i kūö chehechōn;
18Ngaich pöri vē tarik nöng höng mahām re, ṙātö inyun nômö re yin.
19Ngatī talöökö yin nö ṙòkhöre vē töteūngen tö kanôlò re lökten i chanökhuṙen; kēngö nômö ngam yōm re an.
Havë-a Ngam Mikah
20El talöökö ngam mikah pōitô nö hū-a; el chūök mī-inyih angū-ö nö hachônglöṙô re;
21Hū-a an nö i kui kinlōngö; ṙô-òv an nö i lökhöt inkūp elpanam;
22Iṙôktören Ō yī-ö töt-akaha, hāngenlōn öm, öm öt akah? Iṙôktören min maha-āichngen nö kumchikngenre ip nāichngen tö cha, tökulō-ov inrē surīkhö mikah?
23Kūötenre tö ngam vinëköre tö chu; yĕh meuk, ṙösnyö ellōn re chin in meh; hòṅ mikahtölōn meh chin tö në ṙôre.
24Pò chu havë-a ngaich sō me-eṅ hang, hateutnyö kël re chū-ö ngaich öt hĕng tak tökūötenre,
25Ngaich me-eṅ inrē sō-o nup inlēnö tö chu sō inrē öm vëka tö chu.
26Hayīölngen öt kanôlò meh chin min inrē; ha-öinyngö vah meh chin min yĕm chök tökūö pinhë-eṅ kūö,
27Yē öp pinhë-eṅkūö nö sā chanôcha panam nö chökhutī tö meh, sā lamfeui kuföt inrē ngam öt kanôlò meh nö yih, yē ngam kanihngen mirivlōn inrē nö yih nö in meh.
28Ngaich havëken chu min cha-a, hö-ö pöri min chū-ö sapṙô; haṙēmngenre yip min nö chöhö chu hö-ö pöri chū-ö min kôti.
29Pò cha nö surīkhö mikah öt atöllö ngam pinhë-eṅkūö inrē tö ngam Mā Tēv,
30Sōḵ tö inlēnö aṅ in chu, hayëḵngen vinëköre tö chu inrē,
31Lökten yip min nö nyā ṙòng aṅ el talöököre ngaich tööḵngen tö aṅ i vahītenre.
32Pò öp töt akaha nö fëli tökūö ngam invöökūö cha, ngam tanöö-öng lōn tökulō-ov inrē nö fëlngen cha; anga-aṅ pöri öp hamang ṙô chu köp min nö iyöng kuchīken min inrē, öt pa-ekūö tö tötlöök.
Currently Selected:
INCHŌḴ-OṘÔ 1: CANIBSI
Highlight
Share
Compare
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
