T. MËTIV 3
3
Ngam Minkahten Tö Yôhān Ök Vamôk,
(Mk 1.1-8; Lk 3.1-18; Jn 1.19-28)
1Hē e, nö yihtöre ang Yôhan ök Vamôk mumkahten nö el-inchōn i Yūta; nö ngö ṙô, 2Havöötö ellōnre yin; tön röhta an ngam pūlnga ngam halīöngö.” 3Anga-aṅ an, ṙô, ngam pròfĕt Isayā, nöngö ṙô, “Ngam pööiny ṙô ap hamūḵa nö el-inchōn, Halēnkö talöökö ngam Mā Tēv yin; hachipkö nup kanröönö ò.”
4Sanôi ūṅt ök hilā Yôhan; uk inrē ök inmöpṙat ò. Mufākö nuk nya-aṅkūö ò, tö pachāka inrē aṅ el-inchōn. 5Ngaich chuh in ò nö ṙòkhöre yik aṅ Yērusalem, aṅ Yūta, ṙòkhöre inrē yik aṅ ranghö Yôtön. 6Vënyötököölre cha-a, ngaich vōkö tö ò nö ël ap tahël Yôtön.
7Ngaich hē Yôhan nö meuk yik tömaṙôngö aṅ i yik Feresī, aṅ i yik Satuki inrē, nö yihtöre nö hòṅ vōkö; ngaich ngö ṙô anga-aṅ tö cha, “Yī-ö kūön pēch; achīö ap hamôten yīö falgöre, tö ngam yamih lanīnö? 8Hökngen nup inlahen yīö yēḵ, nö hameuktö invöötö ellōn yīö. 9Uh yin ngölōn in re, Muvöhngu in īhö tö Aprahām; tön ngö ṙô Chin tö yīö, tö ngam Tēv nö kô-òren nö ha-aṅ aṅ i në ihong, nö kūön Aprahām. 10Ngaich an ngam hanīöng nö ṙātu nö i rööntö nup chōn ṙòkngöre nup chōn tötṙôngu tö tölöök nö kūöltu, ngaich kavalhötvö nö i kūö tameūyö. 11Kô chin chū-ö, aṅtī tö mak vōkö yīö, nö invöötö ellōn. Ap mu-unôichrit chu pöri, tömööḵlö kanô-òṅ tö chu; ötrēhĕn chin kô, kēḵ nuk kunröpö Ò, Anga-aṅ min vamôkö yīö nö aṅtī tö ngam Töhet Fanöinylö, tameūiyö inrē. 12Eltī Ò ap haneui; ngaich Anga-aṅ min nö ahetlö el ap chūök sāiny. Ngaich hamūl nup sāiny nö el chūökre; föngngö nup uk nëlö pöri min Anga-aṅ, nö i kūö töt nyangngö tameūiyö.”
Ngam Vinôkö Yēsū
(Mk 1.9-11; Lk 3.21-22)
13Yihtöre ngaich Yēsū nö i Yôtön, in Yôhan, nö ṙā-ang Kelelī; nö hòṅ vōkö tö ò. 14Tahngen Ò pöri lang Yôhan, nö ngö ṙô. “Chu-ö chin öre töhòṅ vōkö tö Meh; ngaich yihtöre hòng Me-eṅ in chu?”
15Ngö ṙô pöri Yēsū nö sapṙô ò, “Hökngen Chu yēḵ; tön tö hōḵtu an angū-ö nö inteūngngö taṙòkhöre tölöök.” Ngaich halöngten Ò anga-aṅ.
16Hē kinheūṅten Ò nö vōkö, iṙūö yôklö ngaich Yēsū nö ṙā-ang el mak ngaich ngam halīöngö nö löpnyörekūö; ngaich meuk ngam Töhet Fanöinylö ngam Tēv Anga-aṅ, nö sā nyö-öṅ, nö yônti; ngaich teungtöre nö i kui Ò. 17Ngaich ök töngöṙô, lamöktö el halīöngö, “Hanāngenlōn Chu ön ngòh, nö Kūön Chu. In Ò Chin ṙāmölōn takô”
Currently Selected:
T. MËTIV 3: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.