T. MËTIV 2
2
Yik Chamöha Lamöktö Lā Chūhöt
1Ngaich hē Yēsū nö fötnyuvö nö i Petlihem, nö i Yūtā, hē sakāmö ök rācha Hērôt; yihtöre yik tö-akaha tarik, nö i Yērūsalem, nö löktö lā chuhöt; nö ngö ṙô: 2“Isuh Ap töfötnyu Rāchakūö Yahūti? Tön meuk ngam taneūsömat Ò in, lā chuhöt; ngaich yihtöre öi salāman.” 3Ngaich hē ngam rācha Hērôt nö hāngö e; pa-ekūö ngaich anga-aṅ, yik taṙòkhöre aṅ Yērūsalem inrē; 4Hamūlhöti anga-aṅ töyik mākūö kūönṙô yik kamūich inrē mi-i yik tarik; ngaich hatönö cha, tö chūök finötnyö Kristū.
5Ngaich ngö ṙô cha-a tö ò, “I Petlihelm, ap i Yūtā; pôn ngö kinūichngö tö ngam pròfĕt, 6Me-eṅ Petlihem, panam Yūtā; rö-ö man tökūönö öm i yip mahayöng, ap amahtö vē tarik Chu min, Israel?” 7Ngaich Hērôt nö ulāikenre nö havëtö yik tö-akaha tarik; nö mikahtölōn re nö in cha, tö hēten ngam taneūsömat nö meūkö. 8Ngaich anga-aṅ nö tīnngen cha nö i Petlihem; nö ngö ṙô, “Kuṙòh; haṙēmngenre yin chöh ap kun Nyīö. Yē yīö pöchö kôtökūö tö Ò, vë-eny tö nang chu; hòṅ chu chu-ö inrē yihtöre salāman.” 9Ngaich cha-a nö kiröönngöre, tökinheūṅtö ṙô ngam rācha. Ngaich ngam taneūsömat nö kiröönngöre nö urēhĕkūö cha, ngam maheuṅk cha nö lā chuhöt; hanöng saha e nö yihtöre, ngaich sökngöre nö i kui ök chūök ök Nyīö. 10Ngaich hē cha nö meuk ngam taneūsömat, ṙāmölōn cha-a ngaich, nö pōyen ṙānāmölōn. 11Kuhēthötre cha-a ngaich nö el ngam patī ngaich meuk ngam Nyīö, nö holten Marīa ök yöngnyīö, sōntökūöre cha-a ngaich nö salāman. Löphönyi cha-a tö kūö nuk chehen, ngaich kēḵĕkūö Ò tö raneushö, tö humlum, lōpan, ane inrē mūr. 12Ngaich kūöre nö vë-evkūö töm Tēv, nö i heūvö, tö cha nö sōḵtu nö havantöre nö in Hērôt, tahëngö talöökö cha-a ngaich nö chuh panamre.
Fanalngö Chinūhu Aikup
13Chuhhë cha-a hĕng taka ök ma-ahānga aṅ im Mā Tēv, tömeūkö tö Yôsĕf nö i heūvö, töngö ṙô, “Choholre man; kēḵ ngam Nyīö, ngam yöngnyīö inrē; öi Chuh Aikup. In e me-eṅ höngngöh, hanöng saha ṙô chu tö meh; tön chöh ngòh Nyīö ap min Hērôt, nö hòṅ fëlngen Ò.” 14Choholre anga-aṅ ngaich; ngaich kēḵ ngam Nyīö, ngam yöngnyīö inrē, tö hatööm, ngaich chuh Aikup. 15In e cha-a ngaich nöngngöh, hanöng saha kinpaha Hērôt; hòn kinheūṅtngen e ngam ṙô ngam Mā Tēv, nö ip pròfĕt, nö ngö ṙô, “Ṙā-ang i Aikup ṙô Chin havëkö ngam Kūön re.”
Finëlngö Yik Nyīö
16Höng meuktöre anga-aṅ Heròt töre nö hayëḵeiṙen tö yik tö-akaha tarik, ngaich pōi lanīnö; tīnngö tarik, ngaich, ngaich fëlngö yik kikōnyö nyīö nö ṙòkhöre, yik mi-i Petlihem I nuptöng ranghö e inrē, yik tönët höiny samyeūhö yik ṙanëtcha inrē sā rò-angen ök ṙētak ò, nö hatön yik tö-akaha tarik. 17Ngaich teungten ngam ṙô ngam pròfĕt Yarimiā, nö ngö ṙô, 18Hĕng ap pööinyṙô pameuiny, töhāngö nö i Rāmā, pineūinyö, ane inrē töpōitô inrāmöre; peuiny ap Rākēl tökūö yik kūön ò; sōḵ ap nö inṙāmulōn pò cha nö rö-övö.
Invānö Ṙā-ang Aikup
19Hē kinpaha Hērôt pöri hĕng taka ök ök ma-ahānga aṅ im Tēv. Maheuṅk Yôsĕf, nö i heūvö, nö i Aikup; töngö ṙô, 20Choholre; kēḵ ngam kun Nyīö, ngam yöngnyīö inrē; kuṙòh, chuh i panam Israel; tön kapah yik nö ngaich, yik töhòṅ fëlngö ngam kun Nyīö.” 21Ngaich choholre anga-aṅ; ngaich kēḵ ngam kun Nyīö, ngam yöngnyīö inrē, ngaich yihtöre nö i panam Israel. 22Höng hangtöre pöri anga-aṅ tö Arkelās nö hayöng nö i Yūta: nö i chūök ök yöngre Hērôt; sōḵ ngaich anga-aṅ nö chuh in e; ngaich kūöre inrē nö vënyu nang tö ngam Tēv, nö i heūvö, ngaich hĕng lā chahuhu anga-aṅ nö i Keletī. 23Yihtöre ngaich, ngaich iyöng ip panam, tö Nāsaret invëka; hòn kinheūṅtngen ngam ṙô yip pròfĕt, tö Ò min nö havëka nö aṅ Nāsaret.
Currently Selected:
T. MËTIV 2: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.