Isayā 6
6
Invëkö Īsayā Nö Prôfēt Tö Ngam Tēv.
1Im samyeūheu ök rācha Usāya nö kapah meuk ngam Mā chū-ö nö el kantēra nö ūichhaka, lātulöng hatāilöng inrē, tööḵlö ël ngam töhet chūök tö kanôlò ò tö aṅ në töhĕng chuvi panam. 2Sökhak nö lātulöng tö ò yip seraf: nö kö tafūölö saneòk; nëtö innyatngö kūö anga-aṅ, ane inrē nëtö innyatngö kalröön, nëtö kinteū anga-aṅ inrē. 3Ngaich kö ṙô-òvö cha-a tö höö, nö ngö ṙô,
Töhet, töhet, töhet an ngam Mā Tēv yip tömaṙôngö: tööḵlö an ngam panam tökanôlò ò. 4Ngaich nuk chūök röön tö kanëchkūö nö kē-ĕng re i ṙô ò öp hamū-a, ngaich ngam patī nö löpngö ël tö lul. 5Ngaich ngö ṙô chū-ö, Töt kôlò chin chū-ö! Pò chu öich tököölö fālen; pò chu öich tarik töthëtö minuh, ngaich iyöng ellōn vē tarik chū-ö töt hëtö minuh: pò në mat chu nö ngaich nö meuk ngam Rācha, ngam Mā Tēv yip tömaṙôngö.
6Ngaich hĕng tak ök aṅ i seraf kumteūtöre nö in chu, aṅhav eltī tök ihong töṙāch, ök tahôpnyö ò nö ṙā-ang ël ök tahāklö 7Suöhtö e anga-aṅ nö i minuh chu, nö ngö ṙô, Yĕh meuk ngaich man suöhtöre minuh tö e; ngaich öp kanöölö meh nö kē-ĕyö, ahëti nö ngaich öp tökööl meh. 8Ngaich chū-ö hang ṙô ngam Mā, nö ngö ṙô, Chiāp min tahīnngö chu, achīö min inrē kumröönngöre tahölṙô ih? Ngaich ngö ṙô chū-ö, Ihih chin chū-ö; tīnngen chu. 9Ngö ṙô ngaich anga-aṅ, Kuṙòh, ve-enynang vē tarik,
Iṙūöhen yin hang, öt akaha elnang pöri; iṙūöhen yin meuk, öt akaha elmat pöri.
10Vītö tösangöö nö ellōn vē tarik, vīlö lumngan elnang cha inrē, tilupngö mat cha inrē; hòṅ minë mat cha nö öt meuk minë elnang cha inrē nö öt hang, hòn öt akaha ellōn cha-a, ngaich havantöre nö hēk, ngaich lööken.
11Ngaich ngö ṙô chū-ö, Mā, i ṙôktören? Ngaich sap ṙô anga-aṅ nö ngö ṙô, Hanöng saha në elpanam nö piyāyi nö öt aṅhavkūö, öt aṅhavö inrē nup patī tö tarik, ngaich ngam panam inrē nö lëlngö nö keuheūtngöre,
12Ngam Mā Tēv inrē nö marôvat tī nö kēngö tarik, ngaich pōyen nup tö ṙā-ayö chūökö ellōn ngam panam.
13Ngaich yē e nö umuh nö ṙòngmö hĕng tit i tösöm in e, nyā-aṅyö min angū-ö nö hēk: sā öp tarpin sā ōk, öp töng ōtre yĕn pòrô nö sukngö re rōi, ngatī öp töhet kulöl nö aṅhav-in töp töhet alaha re.
Currently Selected:
Isayā 6: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
