Isayā 5
5
Tinkökö Panò-òṅ Vāin
1Höknyô chu tikökṙôre im hanāngenlōn chu tö tinkökö ngam hanāngenlōn chu tö inlahen öp panô-òṅ vāin ò. Hĕng öp panô-òṅ vāin öp hanāngenlōn chu nö ip rung töpōyen ṙòng aṅkūö:
2Ngaich anga-aṅ nö ul talöökö mak nö havīlö e, ngaich hamūl nup ihong umuh ngaich teūchtö aṅ e tö tö atöllöngö vāin, ngaich vīlö chūök chamônga nö ellōn e ngaich ël e inrē nö hulhöt kinrān vāin: ngaich meūkken re anga-aṅ tö e min nö ṙôngu aṅ, ngaich angū-ö nöng ṙòng tö tötkôlò.
3Yĕh pöchö Ō yī-ö aṅ Yērusalem tarik Yūtā inrē, vë-ekūö yīö chin, akah fālen yin in chu tö ngam panô-òṅ vāin chu inrē.
4Asuh öp tö ngaich tī chu i ngam panô-òṅ vāin chu, öp tö-öl töre nö tī chu in e? Hē chu meūkken e nö ṙôngu, kūöyòh ngaich angū-ö nö ṙòngtö töng öt kôlò?
5Yĕh ngaich kuṙòh; töich ve-enynang meh töp tī chu min tö ngam panô-òṅ vāin chu: hòṅ ṙòngngö ngam kinlōngö e chin min, ngaich nya-aṅyö min angū-ö; likölngö ngam kinlonglö e chin min ngaich angū-ö min nö rööntu kui:
6Piyāingö e chin min; ngaich angū-ö min nö öt kamöpka rōi aṅ öt rēhĕn nö fūngö tumlat; sīöplö pöri min nö umuh vòk nūötö töchökhu kūö inrē: ngaich tölṙô minë taṙul chū-ö min nö kumṙah nö i kui e.
7Pò ngam panô-òṅ vāin ngam Mā Tēv yip tömaṙôngö nö ngam patī Israĕl, yip tarik Yūtā inrē nö tölöök nö chōn: ngaich anga-aṅ nö ngëichkö inkaha fālen ngaich höng meuk pineūnyö.
Ngam Tökööl kahëken ngòh tarik
8Tötkôlò yip cha-a yēḵ tamaptö patī re nö im tahëng patī, tamap tö taṙeū re nö im tahëng taṙeū, hanöng saha tö rö-ö chūökö, ngaich yī-ö vītuṙen höng hĕngtöṙah ellōn ngam panam!
9Elnang chu ṙô an ngam Mā Tēv yip tömaṙôngö, nö ngö ṙô, Kô-en nup patī nö ṙōl min nö öt kôlò, tökiröng tövai, nöng öt aṅhavö.
10Pòn söm kamnāchö öp panô-òṅ vāin nö hĕng kinlaha aṅ, ngaich hĕng hōmör (10 hectores) nö kulöl ngaich pöri nöng hĕng efa (8 Ltrs) min.
11Tötkôlò yip cha-a yēḵ töka-euilökūö nö choholre tö el peuheū, pò cha nö hòṅ ka-eūt tököiny ka-eūt; cha-a inrē yip tösöl aṙū hatööm nö ngöh, hanöng saha öp vāin nö kalēḵ nö in cha!
12Ngaich hāp lūt inrē, tapret fanöö inrē, tö vāin inrē, in nup tökiröng nyinā-aṅ tö cha: hö-ö pöri cha-a nö kūötenre tö la-en ngam Mā Tēv, öt rēhĕn cha-a nö ngëichkö vahīṙen minë kuntī ò.
13Lökten yip tarik chu nö chuh el inkövö, pòṅ hāṅten tö mikah: yip mā tarik cha inrē nö takngö nö aheuk, yip ṙôngö cha inrē nö nyôngö el kilööp nö yal.
14Lökten an ngam anūlö nö ṙūönyö ṙôktö lōn re, vā-anykūöre inrē nö pōitī kūö: ngaich ngam ineū-eu cha, ṙôngö cha inrē, tö ngam inkeūlen kanôlò cha, anga-aṅ inrē ngam töṙāmölōn nö in cha, nö meutti min nö ël e.
15Ngaich öp yāich tarik nö sōnngöre, hayāichngöre inrē öp tökiröng tarik, nup mat öp tömarô-òl chūök inrē nö hayāichi:
16Hapōilöng pöri ngam Mā Tēv yip tömaṙôngö nö im inkah fālen, ngam Tēv inrē ngam Tönghĕng nö Töhet nö ahetlöngö im lanöökö.
17Ngaich min nup kūön sīṅp nö nyā-aṅvkūö i nup nyā-aṅkūö re kiyôp, ngaich min nup töt aṅhavkūö chūök nup tö-alahavö nö nyā-aṅkūö nup aṅ tahëng min.
18Tötkôlò yip cha-a yēḵ yip tamūök tö öt lanöökö nö aṅtī tö tökuvaha chanök alaha, aṅtī tö tökööl inrē nö sā rehen kūö inröl:
19Yip tö ngö ṙô, Hökngen ò nö haveūtöre, hökngen ò nö kurāten nö ip la-enre, hòṅ hī meūkö e: ngaich hökngen ngam inlēnö aṅ im Töhĕng Töhet i Israĕl nö ṙūötöre yih inrē, hòṅ hī meūkö e!
20Tökôlò yip cha-a yēḵ yip tölööku ṙô tö tötlöök, yip tötlööku ṙô inrē tö tölöök; yip ṙamātö sinngūlö nö hanātö, hanātö inrē nö sinngūlö yip ṙamātö tö-angūṅövö nö töpachāka, töpachāka inrē nö tö-angūṅövö!
21Tötkôlò yip cha-a yēḵ yip tö-akaha nö i mat re, tö-akaha inrē i mat re nö meūköre!
22Tötkôlò yip cha-a yēḵ yip tö kalēḵ nö òk vāin, tö kalēḵ inrē tarik nö katĕh tökalēḵ òk re:
23Yip hamôten tötlöök nö ineū-euvö, ngaich kēngö ngam lanöökö ngam tölöök nö ṙā-ang in ò!
24Lökten sā ngam litāk tameūyö nö ṙāpngö kūö tö kaṙālö afō, sā tönyô kiyôp inrē nö tahömköti nö el tö hūkūö tameūyö, ngatī min öp ṙĕh cha nö sā tö chahū-uyö, öp sēt cha min inrē nö sā pintūilö pitung nö lātulöng: pò cha nö sō-o ngam chöngö ngam Mā Tēv yip tömarôngö, ha-āichngen ṙô ngam Töhĕng Töhet i Israĕl inrē.
25Lökten ngam lanīnö ngam Mā Tēv nö hūlökūö nö in yip tarik ò, ngaich anga-aṅ nö hateutnyö kël re nö lā-al cha, ngaich hachökö cha, ngaich minë rung nö kayīna inrē, ngaich nup tökapah alaha cha nup sin-òkkūö nö ellōn minë talöökö. Pòrô anū-ö në, ngaich rö-ö ngam tanānyö ò nö havööṙikūö, sönen pöri ngam kël ò nöng teuthakaṙen.
26Ngaich anga-aṅ min nö hachônglö ngam pantēra nö in yip tömarôvat pumnāmö tarik, hisngen cha min inrē ṙā-ang i manā-angkūö ngih tumlat: yĕh meuk, yih yip min nö veut:
27Öt hĕng tak min töchei öt rēhĕn nö kavē-ĕre yip in cha; öt hĕng tak min mahaṙòhlö öt rēhĕn nö haṙòh; öt rēhĕn min nup inmöpṙat cha nö tiyōlnyu, öt rēhĕn nup yanòhkūö kunröpö cha nö latòk:
28Yip tökeūtö chòk, sōnhaka inrē nup linreiny cha; sā töngëḵ ihong nup kinsòh kōra cha nup kalröön inröl cha inrē sā lamfeui kuföt.
29Sā ṙô lāyön nup tinrōlöṙô cha, sā ṙô kūön lāyön cha-a nö taṙōla ṙô: hôṅ, tiṙōl ṙô re yip min, ngaich kētö tīre nö ip pôḵre, ngaich kēḵngen e min nö halīniṙen, ngaich öt hĕng tak min umuh öp ṙamā-any.
30Ngaich cha-a min nö tiṙōl ṙô re nö lā-al cha ip sakāmö angū-ö sā tinṙōlö ṙô ngam mai: ngaich yĕn hĕng tak öp ngamëchkö ngam panam ngaich meuk sinngūlö kanihngen inrē; sinngūlö ngaich ngam töhat nö el minë taṙul.
Currently Selected:
Isayā 5: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
