Isayā 41
41
Kinlēḵngô Ngam Tēv Nö I Yik Israel
1Ō yī-ö kun panam höng hangihtöre yin tö ṙô chu ui ṙô-òv; hökngen yip tarik nö tumfömlö kumlēḵre; hökten cha nö söntöre, ngaich möl yĕh nö ṙò-òv: tā-a töi hol re ṙūötöre im inkaha fālen.
2Achīö apa mahachohlö öp töhĕng tak aṅ lā chuhöt, öp töteūngen tö minhôinyö i tum vanāngöre? Kēngö pumnāmö tarik an nö ṙā-ang i kūö ò pò ò nö hòṅ rööntö kui yip rācha nö elkatòh röön re; vīten cha anga-aṅ nö sā pitung i kūö öp sanët ò, sā nup kaṙālö afō töheuilö nö ip linreny ò.
3Lū-u cha anga-aṅ, ngaich iṙūöhngö röön nö öt fëhevṙen; lök im talöökö anga-aṅ tötha-eh nö röönka tö ò.
4Achīö ap vamīken e nö tökeuheūten tö e, öp mahavëkö tumköl chap tarik nö löktökūö ik raneh? Chū-ö chin, Öich Mā Tēv, mu-uṙĕh, ngaich hol öp manā-aṅ, öich chū-ö Anga-aṅ.
5Meuk minë kun panam, ngaich pa-ekūö; kayīna nup manā-angkūö ngam tumlat; ṙūöltöre ngaich anū-ö nö yihtöre.
6Kö holṙen hanöng kisānöre cha-a; ngaich kö ngö ṙô tö hol re, Ui pa-ekūö.
7Lökten ök vamī chōn nö hangë-eṅl alaha öp ramöm humlum, anga-aṅ inrē öp mahamën nö aṅtī tö mūngöre nö röm nö i kui ngam rūlö, ngö ṙô töp pirum inpanngökūö, Vāi ana: ngaich haköpngö e anga-aṅ nö aṅtī tö kīny lökten e nö öt halöinyköre.
8Me-eṅ pöri, Israĕl, tarik chu Yāköp ngam katöllö chu, ngam kūön Aprahām ap hol chu.
9Me-eṅ töṙapka tö chu löktökūö manā-angkūö ngih tumlat, ngaich ṙā-ang kūö sinkeukngö e öich havëken meh, öich ngö ṙô tö meh, Tārik chu man me-eṅ, katöllöng man tö chu rö-ö öm kavāliyö;
10Uh man pa-ekūö, tön in meh chin; um ngangngökūö, tön chū-ö chin Tēv meh: hangëṅlen meh chin min; hôṅ, holṙen meh chin min; hôṅ, ṙapken meh chin min aṅtī tö lahāmö kël ngam lanöökö chu.
11Yĕh meuk, ṙòkhöre yip töföinyö ellōn nö lā-al meh min nö sirōngkūö kalūöchöre el kui inrē: cha-a yip kamlahare nö lā-al meh min nö sā töng rö-övö ngaich payāyi min.
12Chöhöh cha man min, ngaich öt kôtökūö tö cha, cha-a yip töhòṅ lā-al meh: cha-a yip kumyung nö lā-al meh min nöng sā töng rö-öv, sā töng hö-övö inrē.
13Pò chu Mā Tēv öich Tēv meh ṙamapkö lahāmö meh, öich ngö ṙô tö meh, Um pa-ekūö; holṙen meh chin min.
14Um pa-ekūö, Me-eṅ kamlökö Yāköp! Yī-ö inrē tarik Israĕl; holṙen yīö chin min ṙô ngam Mā Tēv; ngam Töhĕng tak Töhet aṅ Israĕl ṙamānyen meh.
15Yĕh meuk, vīten meh chin min öm tufömngöre pinṙongnyö ṙòng sāiny öm keut öm kanāpuvö: ngaich me-eṅ min piṙöhngö minë rôngö, ngaich sōngö u öm kiṙöpö u nö kūöṅnö, vīten minë rung inrē nöng sā uk nëlö.
16Heūyö u min me-eṅ, ngaich ngam kuföt min nö kumten u nö marô-òlkūö, pirātngen u min inrē ngam lamfeui kuföt: ngaich me-eṅ min ṙāmölōn im Mā Tēv, eū-eure min me-eṅ im Töhĕng Töhet in Israĕl.
17Chöh mak öp yāich öp tö hāṅten inrē ngaich rö-övö angū-ö, kavôṙa litāk cha-a ngaich kūö yanālöre; ngaich chū-ö min samap ṙô cha öich Mā Tēv, chū-ö Tēv Israĕl min öich öt ṙāngen cha.
18Löpnyö kūö tahël chin min i kui nup töngasnyi lātulöng, töhëmnyi mak inrē löknyö ellōn nup achāṙö: vī ngam tönyalnyi chin min nö chūök törūḵngö mak, ngam tönyô panam inrē nö chūök töpöklö mak.
19Ul tö sītör chin min el tönyalnyi, tö akasīa chōn martil inrē, tö chōn tavī-i; el tönyalnyi tī chin min tö för chōn, tö pāin, chōn kasòng inrē nö holre:
20Hòṅ tarik nö meuk, nö akahalōn, nö ngëicha, ngaich holre nö akaha elmat, tö e nö ngam kël ngam Mā Tēv tötī-iv tö e, tö ngam Töhĕng Töhet inrē aṅ Israĕl nö vīten e.
21Hameuktö ngam chööḵnyöre man, ṙô ngam Mā Tēv; kētö öp inmeuktö kanô-en ngam chööḵnyö meh, ṙô ngam rācha Yāköp.
22Hökngen cha nö kēnyö u, vënyö öp lāinyngen u min inrē nö in hī: ve-eny nup lamā urĕh yin, asuh nūpa, hòṅ hī mikahtö elmat re tö u, ngaich akahakūö töp manāngen u nö lā-unôich; hēk inrē hameukhöti in ih tö nup yamih.
23Vë-eny nuk yamih nö unôichrit ngih, hòṅ ih akahalōn tö yīö öi tēv: hôṅ, la-evṙen tö tölöök, hēk la-evṙen tö tölöök, hēk la-evṙen tö tötlöök hòṅ ih ngònglökūö, ngaich holre inrē öi hatīönkö e.
24Yĕh meuk, aṅ i töng rö-öv yin yī-ö höng ranö-ö inrē ngam la-en yīö, sin-òkkūö ngam kamtöllen yīö an.
25Ngaich chin hĕng tak hachōhlö ṙā-ang lā kapā, ngaich an nö yih, löktö lā maneutlö ngam tavūöi hĕng tak öp mahavëkö minë-eny chu: yih ap min nö i kui yip mahayöng nö sā sanông, sā tī öp vamī tanīöyö inrē tö ngam tilin.
26Achīö ap vamënyö e nö ngaich nö löktökūö ik raneh, hòṅ ih akahalōn, ök lamā urĕh inrē, hòṅ ih ngö ṙô, Anga-aṅ an tölöök, hôṅ, öt hĕng tak töṙô-òvö, hôṅ, öt hĕng tak mahameukhöti, hôṅ, öt hĕng tak hamang nup ṙô meh.
27Ngö ṙô chin min tö Sīyôn, Yĕh meuk, ngëichken cha; hĕng tak kahëti chin min i Yērusalem töp tö kumtö tölöök inhānga.
28Ngaich hē chu ngëicha, öt hĕng tak tarik umuh; öt rēhĕn cha-a nö īnu tö mahalēn, lökten, hē chu hatönö cha, öt hĕng tak tökô nö hĕng milôhò sahap tö ṙô.
29Yĕh meuk, ṙòkhöre yip nö la-evṙen tö chanök alaha ranö-övö inrē: kuföt kinlūöchöre el kui inrē nup insā tēv cha töhaṙöichö.
Currently Selected:
Isayā 41: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
