Isayā 1
1
1Ngam maheuṅk Isayā kikōnyö kūön Amôs, ngam maheuk ò, lāinyngen Yūtā Yērusalem inrē, hē nuk sakāmö Usiyā, Yôtam, Ahas, Hēsikiā inrē rācha aṅ Yūtā.
Kunyāhalōn Ngam Tēv Tö Më Tarik Re
2Ō yī-ö halīöngö, hangihtöre, kētö elnang re inrē, Ō me-eṅ tumlat, tön ngaich an ngam Mā Tēv nö ṙô-òv: pōyö tī chin haruklö kūön inrē, ngaich cha-a nö lā-al chu ahôngen chu inrē.
3Akahakūö ön ngòh kōiny nuā tö yōm re, akahakūö inrē ngòh köttö tö chūökre nö ip yōm re; hö-ö pöri Israĕl nö akahakūö, hö-ö vē tarik chu nö ngëicha.
4Pumnāmö tarik tötööḵlö tö tökööl, tarik tölangan tö ötlanöökö, kūön töt löökö la-en nyīö töchōichö la-en: ngaich yin nö ṙāngö ngam Mā Tēv, öt chūmkūöṙen yin tö ngam töhet in Israĕl, aṅ tahëng yin nö ngaich, ngaich yin nö heūlritre.
5Kūöyòh öyih ṙòngmö chökngöre, töp lökten yīö höng hēkö kūöre ahôngen? Keuheūtngöre an ngam elkui nö vahavö, keuheūtngöre ngam fanöinylö inrē nö cheingö.
6Löktökūö kintāl elröön söl kūi nö öt lanöökuṙen nö in e; höng vah, pinṙôkö, tötōngu vah inrē: hö-ö nun nö pēt, öt rēhĕn nö haṙūngö, öt rēhĕn nö sôhòkūö tö tavī-i.
7Ngaich an ngam panam meh nö öt aṅhaṅvkūö; ṙāpngö nuk elpanam meh nö ngaich tökūö tameūyö; keuheūt yip nö ngaich aṅ tahëng nö ngeūktö ngam panam meh nö i kūö meh, ngaich an nö öt aṅhaṅvkūö, sā tö tiṙöli nö ngaich tö yip aṅ tahëng.
8Ngaich an ngam kikānö kūön Sīyôn nö ṙā-ayö nöng sā sanrā el panô-òṅ vāin sā elyöngö el panô-òṅ kiukömpör/pantīaka sā elpanam tökayīngö nö havīlöng.
9Yē ngam Mā Tēv yip tömaṙôngö öre nö öt rahëichyen ṙahāti nö in hī tö chööḵṙen, ngaich öre ayī-ö höng sā. Sôtöm, ngaich öre ayī-ö höng sā Kômòra.
10Hang ngih ṙô ngam Mā Tēv, yī-ö mahayöng i Sôtöm: kētö elnang re in ngam chöngö ngam Tēv hī, yī-ö tarik aṅ Kômòra.
11Suh chööḵnyi nö tö ngatī ṙôken tökētu tö yīö nö in chu? ṙô ngam Mā Tēv: Tööḵngen chin tö töföngö tökētu kūön sīṅp, tö tösangöö nup töha-òknyu alaha töṙeūla inrē, rö-ö chin kuchīkölōn i mahām kōiny nuā, i mahām kūön pököre hēk i mahām kōiny pököre.
12Yē yīö yih hameuktöre i kūö chu, achiāp töhōḵ tö ngih nö eltī yīö, öi rööntö ël ngam patī chu?
13Uh yin kumtö töng töl tökētu; sā-òkkūö chin ngaich tö lōpān, tö ayöö chingëṅt töhet sakāmö inrē, tö ngam invëtö manūlö ötkô chin īnu tö tötlöök töp tö-ūnngen inrē inmūlö.
14Kunyahalōn chin i nup ayöö chingëṅt yīö i nup tökiröng nyinā-aṅ inrē tölēnö hē: kanihngen chu nun anū-ö; chei chin keūnö u inrē.
15Yē yīö hanyāknyö kël re tilupngö matre chū-ö min tö yīö: hôṅ, yē yīö pōyen ṙô vë-ekūötēv, öt hòṅ hang chū-ö min; tööḵlö nun minë eltī yīö tö mahām.
16Söichöre yin ahëtöre yin; ṙāngö ngam tötlöök vahīṙen yīö nö ṙā-ang i kūö chu; ṙāngenre kēken tötlöök: 17Harūnöre vahī-ivṙen tö tölöök; chöh inkaha fālen, meukṙen töhakihtuṙen akah fālen kūönyōich, ve-elkui tafīösi.
18Tā-ih, töi ve-ekūöre, ṙô ngam Mā Tēv: pòrô nup tökööl yīö nö sā töngāṅvö elmat, ngaich anū-ö min nö isoh sā tökënngöre tacham; pòrô anū-ö min nö turë sā tököinyö mat laturë, sā sanôi sīṅp min anū-ö.
19Yē yīö töhōḵ hamang chöngö inrē, ngaich yī-ö min nyā-aṅvkūö tö tölöök aṅ im panam:
20Yē yīö pöri sōḵ ahôngen inrē, ngaich keuheūtngöre vah yī-ö min tö kūö fël: pòn ngam elvāng ngam Mā Tēv tö ṙôten e.
Tötlöök Panam
21Sitih ang ngam elpanam tökô-en nö vītöre nö kikānö mī-inyihköre, ngam tötööḵlö tö inkaha fālen! Iyöng ël e lanöökö, ngaich pöri töngamuh nö chūök famëlngö tarik.
22Yëichu nuk nö ngaich rupīö meh, katēhĕ nuk vāin meh tö mak.
23Ma-ahôngen yip kūön rācha meh, mahanôl mū-ulaya inrē; ṙòkhöre nö hāngenlōn tö rineushö, ngaich fachūrit raneushö: hö-ö cha-a nö akah fālen kūönyōich, öt rēhĕn nup fālen tafīösi nö yih nö in cha.
24Lökten ṙô ngam Mā, ngam Mā Tēv yip tömaṙôngö, ngam tökalēḵ aṅ Israĕl, Hāöö, hòṅ heūheul alaha re chin tö vē tökunyaha-elmat tö chu, havahalre inrē tö vē lā-al re:
25Havöötökūö eltī re chin min inrē in meh, ngaich ahetngö nup yech in meh inrē, kēngö nup kôpöre inrē in meh:
26Ngaich chū-ö min inrē havantöre kamhôṅka in meh nö sā lā-urĕh, mahalēnö meh inrē nö sā ik ranehlö: ngaich unôich min më-eṅ havëkö ngam elpanam lanöökö, ngam tökô-en elpanam.
27Havānö an min Sīyôn nö holtö inkaha fālen, yip mahavan min nö in e inrē nö holtö lanöökö.
28Ngam tinṙōlngö tököölö fālen pöri tö yip tötôichlen inrē min nö holre, cha-a inrē yip ṙamāngö ngam Mā Tēv nö keuheūtngöre vah min.
29Pò cha min nö sirōngkūö tö nup ōk nup lōn yīö, ngaich yī-ö min kalūöchöre el kui tökūö nup panô-òṅ tö-atöllöng tö yīö.
30Pò yīö sā ōk öp tönyangngö rōi, sā öp panô-òṅ inrē töt māku.
31Ngaich yip tö kalēḵ min nö sā tö tūökö, öp la-en ò inrē sā linròklö kūö tameūyö; ngaich nëtre anū-ö min nö ökngö, ngaich öt hĕng tak min mahanyangngökūö u.
Currently Selected:
Isayā 1: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
