1 KINṘÖTNGÖ 12
12
In Tāvit Ellōn Yik Penyāmin
1Cha-a yin vē tarik yamih nö in Tāvit nö i Siklek, hē ò nö öt chuhēṙen nö havötköre cha-a yin inrē aṅ in yik tökalēḵ tarik hamòlṙen ò el kinyūngö. 2Lumreny yik nö tarik tömihôin nö lirenyngö chòk, chu-vīl ihong inrē nö aṅngöre lā-a, hāmö tavē inrē; aṅ Penyamin yik, mak alaha Sôl. 3Haī-esör ök yöngkūö, ngaich hēk Yô-as, nak kikōnyö kūön Semē-ah aṅ Kīpī-a; Yēsī-ĕl inrē tö Pēlĕt nak kikōnyö kūön Asmavet; Përaka, Yēhū aṅ Anatòt, 4Ismayā aṅ Kipīön tökalēḵ nö tarik aṅ in yik tölūöi anāi yöngṙen inrē nö i kui yik tölūöi anāi; Yarimiā, Yahasī-el, Yōhanan, Yōsapat aṅ Këtīrah, 5Elusai Yērimòt, Pī-ali-a, Semarīyā, Sefatīyā aṅ Haruf; 6Elkāna, Isīyā, Asaril, Yō-esör, Yasōpē-am inrē aṅ in Kōra; 7Yô-elā inrē tö Sĕpatīya, kikōnyö kūön Yērōham, aṅ Kitōr.
In Tāvit Ellōn Yik Kāt
8Aṅ in yik Kāt yik umuh mahavāngtöre nö in Tāvit ik töngëḵ chūökö elnyalnyi tökalēḵ töha-eh inrē nö kumyung, töhuveū nö i lanaklö vöi inrē, yih tösā arëkūö lāyön, töveut inrē sā vaneūtö kēsöl nö i kui rôngö: 9Ĕsör ök yöngkūö, Opētiyā innëtö, Ēli-āp linūöyö, 10Mismana finënö, Yarimiā tinneūyö, 11Attai tinfūölö Ēli-ĕl sinātö, 12Yōhanan hinëvhöre, Ēlsapāt minchūötöre, 13Yarimiā sinömö, Makpe-anai kinhuk sīönö. 14Yöngkūö kumyung yin vē aṅ Kāt, öp tökūönö i kui töhēngòng öp tökiröng inrē i kui töhĕng köṅny. 15Cha-a yin vē tarik mahavāngngö kui Yôtön ik raneh chingëṅt, hē e nö taṙēchi kui, pāngö tī ngaich tö yik el achāṙö nö ṙòkhöre, lā chuhöt lā sūng inrē.
In Ò Ellōn Yik Penyamin Tö Yūtā
16Rīkre yik tarik Penyamin Yūtā inrē yamih nö ik töngëḵ chūök Tāvit. 17Kunyī-inyre ngaich Tāvit nö höngkūö cha ngaich ngö ṙô tö cha, Yē yīö holrevöṙô yih in chu öi holṙen chu, mūlta min öp ellōn chu nö in yīö; yē e pöri nö inchīlngövah chu in yip lā-al chu, öich tö pòrô öt aṅhaṅv eltī tö tövach, ngam Tēv yik yöng hī an yēḵ mameūkö e vëken yīö inrē. 18Yih ngaich ngam Töhet Fanöinylö nö i kui Amāsai, yöngkūö yik tölūöi anāi, ngaich ngö ṙô anga-aṅ.
ʽʽŌ Tāvit, më-eṅ meh in;
Ō kūön Yēsī, hol meh in!
Lanāmö, lanāmö in meh,
Lanāmö inrē in yip hamòlṙen
meh!
Pòn holṙen meh ngam Tēv
meh.ʼʼ
Ngaich Tāvit nö kē-ĕ cha, vīlen cha ngaich nö yöngkūö yik kumyung in ò.
In Ò Ellōn Manasē
19Rīkre yik tarik Manasē ṙāmā-angre nö chuh in Tāvit hē ò nö yih nö holtö yik aṅ Filistain nö ik kinyūngö nö lā-al Sôl. (Hö-ö pöri anga-aṅ nö holṙen cha, pò yik mā aṅ Filistain nö vë-ekūöre ngaich tīnngörit ò, nö ngö ṙô, Kihten elkui in min ayī-ö yē ò nö ṙāngen hī nö chuh in Sôl.) 20Isāha ò nö chuh Siklek vē yin tarik Manasē mahavāngtöre nö in ò: Atnah, Yōsapat, Yatiya-el, Maiköl, Yōsapāt, Ēlihū, Siletai inrē yöngkūö tököṅnyu in Manasē. 21Holṙen Tāvit cha-a nö lā-al yik töng kamiltöre tö inlānen holre; pò cha nö ṙòkhöre nö tö-eūnyuvö tökalēḵ inrē nö tarik, yöngṙen inrē nö in yik kumyung. 22Örhĕng hang sumkam yanīhih yik tarik nö in Tāvit nö holṙen ò, hanöng saha yik kumyung nö kiröngen, sā kumyung aṅ im Tēv.
Minënyö Yik Kumyung In Tāvit
23Në nun tum miyöngö yik tö-aṅhāṅv tī kumyung yik yamih nö in Tāvit nö i Hepròn nö kamëtö ngam pūlngö Sôl nö in Tāvit sā ngam ṙô ngam Mā Tēv. 24Tarik aṅ Yūtā kamëkö lanaklö vöi inrē tafūöl köṅny hëvhörṙòng tö-aṅhāvṅvti kumyung. 25Aṅ in Sīmōn, tö-eūnyu tökalēḵ tarik inrē nö i kinyūngö, sat köṅny hēngòng. 26Aṅ in Lēvī fën köṅny tafūölòng. 27Ök kūön rācha Yēhōyata, aṅ patī Āròn, hol ò inrē lūöi köṅny sātòng 28Sētòk ṙal tarik tö-eūnyu nö tökalēḵ, nët anāi nët tak yik yöngṙen aṅ patī ök yöng ò, 29Aṅ in Penyamin, mak alaha Sôl lūöi köṅny pōyen yik aṅ in cha mahaköpngöre nö i patī Sôl. 30Aṅ in Ifrēm nët anāi köṅny hëvhöre ṙòng, tökalēḵ tarik, tö-eūnyu nö i patī yik yöng cha. 31Ròngti aṅ miyöngö Manasē hëvhör sīön köṅny, yik töminënyu nö yih nö vīlen Tāvit nö rācha. 32Aṅ in Isakār tarik yik tö-akaha elmat tö nuk ṙētak, tö-akahalōn tök töhōtu la-en Israĕl, nëtòng yöngkūö, ṙòkhöre yip mak alaha cha inrē nö el katòh chöngö cha. 33Aṅ Sepulön taneui anāi köṅny tö-ulòhten nö ngaich nö kumyung, tökētuṙen aṅtī nö i kinyūngö tö nup taṙòkhöre chehetī i kinyūngö, nö holṙen Tāvit nö hēngòng ellōn. 34Aṅ in Naftalī hĕng köṅny yöngṙen yik töhōlu tö yik tölūöi anāi sat köṅny tarik töchehevti tö lanaklö vöi inrē. 35Aṅ Tën nët anāi hëvhöre köṅny tafūölòng tarik tö-aṅhavtī nö i kinyūngö. 36Aṅ Asēr fën anāi köṅny tö-ulòhten kumyung lēn nö i kinyūngö. 37Aṅ in Rūpön Kāt inrē ròngti inrē miyöngö Manasē nö ṙeū-eung lāmuh tö Yôtön, hēngòng nët anāi köṅny tarik tö aṅhavin tö nup taṙòkhöre chehetī i kinyūngö.
38Ṙòkhöre vē, tarik kumyung, töhatöökö nö i kinyūngö, yih vīlen Tāvit nö rācha i kui Israĕl nö ṙòkhöre; ngatī inrē yik Israĕl nö ṙòkhöre nö hēngòng ellōn nö vīlen Tāvit nö rācha. 39Ngaich umuh cha-a nö in Tāvit lūöi sumkam, nyā-aṅvkūö òk inrē, pò yik hol cha nö halēn mineukṙen cha. 40Ngaich inrē yik hol cha, marôvat löktökūö Isākār, Sepulön, Naftalī inrē yih nö kumtö nyā-aṅkūö i uk köttö, ūṅt miūl kōiny nuā inrē, pōyen nup töfaṙëcha atra, ṙòng anychīr kēk tövī-i, tötumre tönyô angkūr, vāin tavī-i inrē, kōiny nuā sīṅp inrē, pòn ṙanāmölōn ök umuh in Israĕl.
Currently Selected:
1 KINṘÖTNGÖ 12: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
