1 KINṘÖTNGÖ 11
11
Rācha Israĕl Tö Yūtā Ang Tāvit
(2 Sam 5.1-10)
1Hamūlöre ngaich yik aṅ Israĕl nö in Tāvit nö i Hepròn, ngaich ngö ṙô, Yĕh meuk, tangëḵ meh in īhö alaha meh inrē. 2I tö misī pòrô hē Sôl nö rācha, ngaich më-eṅ mahachōnyen Israĕl kamëhĕtnen ò inrē: ngö ṙô inrē ngam Mā Tēv tö meh ngam Tēv meh, Më-eṅ man min yōm yip tarik chu Israĕl, ngaich më-eṅ min inrē rācha i kui yip tarik chu Israĕl. 3Lökten nö ṙòkhöre yik minṙöinylen aṅ Israĕl, nö yih nö ik rācha i Hepròn; kilēḵngôre ngaich Tāvit nö in cha nö i Hepròn nö i kūö ngam Mā Tēv, ngaich cha-a ngö hacham kui Tāvit nö rācha nö i kui Israĕl, sā ṙô ngam Mā Tēv nö lökten in Samuĕl.
4Ngaich Tāvit tö yik Israĕl nö ṙòkhöre inrē nö chuh Yērusalem, angū-ö an Yepus, elyöngö yik aṅ Yepus, yik aṅ ngam panam. 5Ngö ṙô yik aṅ Yepus tö Tāvit, Hö-ö man hōḵ yihtökūö ihih. Ngaich pöri Tāvit nö kē ök töngëḵ Sīyôn, angū-ö an elpanam Tāvit. 6Ngö ṙô ang Tāvit, Öp famëlngö yip aṅ Yepus min ngaich anga-aṅ min nö mu-urĕh nö yöngkūö kumyung. Ngaich Yô-ap ök kikōnyö kūön Sēruyā nö urĕhlö nö yônlö, lökten ò ngaich nö yöngkūö kumyung. 7Iyöng ël ngam töngëḵ chūök ngaich Tāvit; lökten e nö kaheūkö nö elpanam Tāvit. 8Ngaich anga-aṅ nö vīlö ök elpanam nö vinngö tī löktökūö Millō nö chuvī taptöre kūö; vītit nup tahëng im elpanam inrē ang Yô-ap. 9Ngaich Tāvit nö kiröng kirönglöre, pò ngam Mā Tēv yik tömaṙôngö nö in ò.
Nangnyi Kumkēḵ Tāvit
(2 Sam 23.8-39)
10Vē yin yöngkūö yik tökalēḵ tarik Tāvit, yik hamòltökūö ò nö im pūlngö ò, nö holre tö yik aṅ Israĕl, nö vīlen ò nö rācha, sā ngam ṙô ngam Mā Tēv nö in Israĕl. 11Ngih ön yih ineūkö yik tökalēḵ tarik Tāvit: Yasopĕ-am, aṅ Hakmön, yöngkūö yik tölūöi tak; aṅtī tök vöi re anga-aṅ nö lā-al yik tölūöyòng töhĕng tum nyahāṅ nö fëli.
12Ṙanët ò in yik tölūöi tak tökalēḵ tarik ang Ēliēsör kikōnyö kūön Tōtō, aṅ Ahoh. 13In Tāvit anga-aṅ nö i Pestammim hē yik, aṅ Filistain nö hamūlöre nö hòṅ kiyung. Hĕng kamnāchö ök umuh tumlat tölööklö aṅ tö pārlī, ngaich yik tarik nö falngöre nö ṙā-ang in yik aṅ Filistain. 14Haköp röön re pöri anga-aṅ nö ellōn öp kamnāchö, nö laklö e, ngaich fëlngö yik aṅ Filistain; ngaich ngam Mā Tēv nö hayööken cha nö lökten im yöng minhôinyö.
15Lūöi tak yik tölūöi anāi yöngkūö yik tarik chu ik ihong nö in Tāvit ik kinluhu Atulam, hē yik kumyung aṅ Filistain nö i yöng el ök achārö Rifēm. 16Ngaich ngöh Tāvit nö el ök töngëḵ chūökre; ngaich yik kumyung aṅ Filistain nö kē-ĕ i Petlihem. 17Ngaich ngö ṙô Tāvit nö yīkölōn, Ō hĕng tak öp öre kamëtö òk chu tö mak tö aṅ ök tö-ūlö mak Pētlihem ngam mi-ikūö inkūp! 18Ngaich yik tölūöi tak tökalēḵ tarik nö tufunngöre nö ik elyöngö yik aṅ Filistain fòklö mak ngaich nö ṙā-ang el ök tö-ūlö mak i Petlihem ök mi-ikūö inkūp ngaich kēten e nö in Tāvit. Sōḵ pöri Tāvit nö ôkö e: ṙöstö e ngaich anga-aṅ nö im Mā Tēv, 19Ngaich ngö ṙô, Marôvat an yēḵ tö chu nö i kūö ngam Tēv chu tö chu ngatī. Òk mahām nômö vē tarik ṙöng öich? Pò cha nö kētö e. Lökten ò nö sōḵ nö ôkö e. Anū-ö nun në tī vē tökalēḵ tarik.
20Ngaich Apīsai, ök hol maneuk Yô-ap, nö yöngkūö yik tölūöi anāi, Aṅtī tö vöi re anga-aṅ nö lā-al yik tölūöyòng tarik ngaich fëlngen cha, teunglö minë-eny ngaich nö i yik tölūöi tak. 21Anga-aṅ öku töyahlö ineūnyö nö in yik tölūöi anāi, anga-aṅ ngaich yöngkūö cha, hö-ö pöri nö söllö nö in yik tölūöi tak.
22Penyā inrē ök kikōnyö kūön Yehōiatā töt pinhë-eṅvkūö nö tarik aṅ Kapsīl, tökiröngö vahīṙen; nët tak fahël anga-aṅ tö Ariĕl aṅ Mô-ap, kiröönngöre ang-aṅ inrē ngaich hĕng höiny nö fël lāyön nö el kinluhu nö hĕng heuh hē tökënngöre tacham nö paṙōngköti. 23Hĕng höiny anga-aṅ inrē nö fëlngö aṅ Aikup öt tarik tömarôlòng taneui sumkôngö rôlö. Aṅhaṅv eltī ök aṅ Aikup tö vöi tö sā ṙôngòng yöng kinpāt hilā; chuh in ò pöri Penayā nöng tinkūngu, ngaich kichötngö ök vöi nö ṙā-ang eltī ök aṅ Aikup, fëlngen ò ngaich nö aṅtī tök vöi re. 24Anū-ö nun tī Penayā ök kikōnyö kūön Yēhōyāta, ngaich teūngen tö minë-enyre nö hol yik tölūöi tak tökalēḵ tarik. 25Tö-eūnyu anga-aṅ nö hol yik tölūöi anāi, hö-ö pöri anga-aṅ nö söllö nö in yik tölūöi tak. Ṙāten ò ngaich Tāvit nö i kui yik amahten ò.
26Vē tökalēḵ tarik aṅ in yik kumyung, Asahel hol maneuk Yô-ap, Elhanan kikōnyö kūön Tōtō aṅ Petlihem, 27Sammòt aṅ Haròt, Hēles ök aṅ Pĕlòn, 28Ira kikōnyö kūön Ikhes aṅ Tekō-a, Apī-ēsör aṅ Anatòt, 29Sīpĕkai aṅ Husat, Ilai aṅ Ahòh, 30Maharai aṅ Nētōfāh, Helet kikōnyö kūön Pe-anā aṅ Nētōfāh, 31Itai kikōnyö kūön Ripai aṅ Kīpī-a i Penyamin, Penāya aṅ Piraton, 32Hurai aṅ i nuk kun töhëm mak i Kā-as Apī-ĕl aṅ Arpat, 33Asmavet aṅ Paharum, Elipā aṅ Sa-alpòn, 34Hāsem aṅ Kīson, Yônatan kikōnyö kūön Sakō aṅ Harar, 35Ahīyam kikōnyö kūön Sakar aṅ Haras, Elifal kikōnyö kūön Ör, 36Hīför aṅ Mekarāt, Ahiyā aṅ Pēlòn. 37Hesrō aṅ Kārmel, Nē-arai kikōnyö kūön Ispai, 38Yô-el ök hol maneuk Nātan, Mīphar kikōnyö kūön Hakrī, 39Sēlek aṅ Amön, Nahārai aṅ Pi-eròt, kamëktö lanaklö Yô-ap ök kikōnyö kūön Serūyā, 40Ira aṅ Itar, Kārep aṅ Itar, 41Urayā aṅ Hītait, Sapāt kikōnyö kūön Ahlai, 42Atina kikōnyö kūön Sīsa aṅ in yik Rūpön, yöngṙen yik Rūpön, lūöi anāi yik hol ò inrē, 43Hanan kikōnyö kūön Mēaka, Yôsafāt inrē aṅ Mītin, 44Usī-a aṅ Astarat, Samā Yē-i-ĕl inrē kikōnyö kūön Hōtam aṅ Arō-er, 45Yētīya-el kikōnyö kūön Simrī, Yôha inrē hol maneuk ò, aṅ Tis, 46Ĕli-el aṅ Mahav, Yërīpai inrē Yôsavīya inrē yik kikōnyö kūön Elnā-am, Itma inrē aṅ Mô-ap, 47Eli-el Opĕt inrē Yē-asī-el inrē aṅ Mēsōpa.
Currently Selected:
1 KINṘÖTNGÖ 11: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
