ZEKARIA 5
5
Ajeikeitsün Thsamlai Atsangshei Eptsün
1Loüh ngü thapsan nai, maou nai thsamlai tsak jeikü yanlükhuntsün ep. 2Ngü ti epküla ta hong nou ngü tü sangh, nungaih ngü thalan, “Thsamlai tsak atheng nai ak-e lükao apun nai ak-e püle küta ayantso maou nai jeikeitsün ngü ep.”
3Nungaih apaüh ngü tü ngiom, “Nunghko goumchi athum chiai pengpun au noitsün athesan satkü noin. Nung thsamlai etsak ai goum- chi ainou kau hai apem louwane; naiuso etsakai lüko ngiomong shingkü sauhaiüh yaang ngio chite nungso louwane ta satkü noiküla. 4Apaou Akongting nou ngioji: apaüh nung athesan nou hongkü, nungh kauhoi pungkü, naiuso ngiomong shingkü yaang ngio chitetsünso pungkü tsamai nappe. Nungh athesan ngüso tsamai noiküta ngüso thathekü le-ane.”
Menyiu Tsak Kim Mongai Noikü Eptsün Atsangshei
5Loühjam hong nou shiküta ngiom, “Athaplu! Loüh amao tso tsak shiji!”
6Ngü sangh, “Nungh ti in noin?”
Apaüh thalan, “Nungh kim tsak noin, naiuso nung kim goumchi apem angei thaiutha tsatsün noin.”
7Nung kim son alethsang nou shantsün akap tsak pokü noiküla. Ngü thapkü noitsün ko, nung akap sopan, naiuso nung kim mongko menyiu tsak mokkü noiküla!
8Hong nou ngiom, “Nung menyiu tsümeikün liko tsatsün noin.” Nungaih apaüh nung menyiu kim mongai thoithio naiuso akap nou phiai ngao-ikü taiu. 9Ngü thapsan nai menyiu nime khiam waio ekuk khekkü ekuk akongting pokü jüdongai jeikü shitsün ep. Nungneüh nung kim loklou küta jeikü khuwan.
10Ngü hong nou tü sangkü ngiom, “Ngüsoüh nung tiai kankü khuji?”
11Apaüh thalakü ngiom, “Ngüsoüh nung thaiutha Babilon nai amkham tsam tsak lahtsün nai kankü khuji. Tilai nung amkham tsam nou shakheme, nungaih nung kim nou nungko amkhamau taiu-e.”
Currently Selected:
ZEKARIA 5: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
