Psonm 145
145
En Kantik Louanz
Psonm David.
1Mon pou proklanm ou grander,
Bondye mon lerwa.
Mon pou loue ou non
pour touzour e touzour.
2Mon pou loue ou tou le zour.
Mon pou loue ou non
pour touzour e touzour.
3SENYER i gran; i merit ganny tou louanz.
Son grander i san limit.
4Zenerasyon apre zenerasyon
pou loue ou bann mervey;
zot pou rakont ou bann aksyon merveye.
5Mon pou medit lo splander,
ou laglwar ek ou mazeste
e bann gran mervey ki ou'n fer.
6Ou pwisans formidab pou ganny proklanmen
e mon pou rakont ou bann mervey.
7Zot pou selebre ou gran labonte.
Zot pou sant byen for ou lazistis.
8SENYER i bon e i pran pitye;
i pasyan e son fidelite i gran.
9SENYER i bon anver tou dimoun.
I montre son labonte pour tou sa ki i'n kree.
10Tou sa ki ou'n fer pou loue ou SENYER.
Tou dimoun ki reste fidel pou remersye ou.
11Zot ava koz lo laglwar ou renny
e rakont ou pwisans.
12Zot ava fer tou dimoun konn ou bann mervey
ek splander laglwar ou rwayonm.
13Ou renny pa pou zanmen fini
e ou pouvwar i dire pour touzour.
SENYER i tenir tou son promes.
I montre son labonte dan tou sa ki i fer.
14SENYER i soutenir tou sa ki pe tonbe;
i redres tou sa ki kourbe.
15Zot tou, zot lev zot lizye ver ou;
ou ki donn zot manze kan fodre.
16Ou ouver ou lanmen
e ou satisfer dezir tou kreatir.
17SENYER i zis dan tou sa ki i antreprann;
i fidel dan tou sa ki i fer.
18SENYER i pre avek tou dimoun
ki apel li;
tou dimoun ki apel li avek senserite.
19I realiz dezir tou dimoun
ki annan respe pour li.
I osi ekout zot kan zot apel son sekour
e i sov zot.
20SENYER i vey lo tou dimoun
ki kontan li;
me i pou detri bann malfeter.
21Mon pou loue SENYER avek mon labous
e tou kreatir pou loue son non sen
pour touzour e touzour.
Currently Selected:
Psonm 145: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
