Proverb Lentrodiksyon
Lentrodiksyon
Sa liv i rasanble bokou teks ki'n ganny ekri par diferan dimoun, e dan bann lepok diferan. I annan bann lansennyman, bann konsey ek bann proverb. Bokou in ganny ekri par bann saz sorti dan bann pei Les. I posib ki sa bann teks ti konmans ganny ekri dan letan bann lerwa (900-500 avan Zezi-Kri). Me sa liv Proverb antye i ganny plase anba non lerwa Salomon, ki ganny konsidere pli gran saz dan Izrael.
Liv Proverb i fer parti literatir lo lasazes. Nou disteng lasazes popiler ek lasazes ki ganny ansennyen dan lantouraz bann lerwa.
Otrefwa dan bann pei Les, lasazes ti ganny atase avek lavi pratik. Sa enn ki saz, i kapab fer son travay korekteman e avek abilite. I osi kapab konpran koman lemonn i fonksyonnen e sa ki dimoun i devre fer pour viv anpe ansanm. Leksperyans i ansenny lasazes. Alor, bann ansyen, bann paran ek bann met ki ti ansenny lasazes, zot zanfan ek zot zelev.
Konpozizyon Liv
La koman Liv Proverb i konpoze:
Sapit 1–9 i dir rol ek lenportans lasazes
Sapit 1.20–33; 8.1-36 i prezant lasazes koman en dimoun ki envit limanite ekout li 9.3-18. Lafoli i esey opoz lasazes e detourn dimoun pour pa swiv lasazes.
Apel pour ekoute, konsey oubyen avertisman, konsekans pratik.
Liv Proverb i konmans par sa deklarasyon: Respe anver SENYER i konmansman lasazes. Zis bann fou ki napa respe pour lasazes ek lenstriksyon. (1,7)
Parti santral Liv Proverb i group bann proverb Salomon (10.1–22.16; 25.1–29.27) oubyen lezot saz (22.17–24.34). Zot tret lo lavi sosyal e moral. Zot ansennyen ki pour byen viv, fodre kondwir son lavi en konformite avek proze ek lavolonte Bondye: Sa enn ki fer sa ki byen pour ganny rekonpanse; sa enn ki mal azir ava siport bann konsekans (24.2; 28.10).
Laplipar sa bann proverb i fer lopozisyon ant bann kategori swivan: Dimoun ki azir byen e sa bann ki azir mal; sa bann ki zis ek sa bann ki tanpi tou; bann saz ek bann ki stipid. Sa enn ki saz i obei bann lalwa lanatir ek lavi sosyal e i fer lavolonte Bondye. Bann parese ek bann bwarer i legzanp dimoun ki annan en kondwit stipid. Bondye i sa enn ki gard lord sosyal e lord lemonn.
Sapit 30–31 i bann refleksyon oubyen bann konsey sorti kot bann saz
Sapit 30.1-14 i raport bann refleksyon Agour
Sapit 31.1-9 i raport bann konsey manman lerwa Lemouel anver son garson
Sapit 31.10-31 i koz lo en fanm kouraze ki reprezant lasazes
Currently Selected:
Proverb Lentrodiksyon: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.