Nonm 22
22
Lerwa Moab I Anvoy Balaanm
1Pep Izrael ti al kanp dan laplenn Moab, kote Les larivyer Zourden, vizavi Zeriko.
2Balak, lerwa Moab, garson Sipor, ti'n war sa ki pep Izrael ti'n fer avek bann Amorit. 3Moab ti per kan i ti war sa pep avek en si gran kantite dimoun. 4I ti dir bann sef Madyann: Sa pep pou devor tou sa ki otour nou, parey en bef ki manz tou zerb dan laplenn.
Sa lepok, Balak, garson Sipor, ti lerwa Moab. Alor, lerwa Balak 5ti anvoy bann mesaze kot Balaanm, garson Beor, ki ti pe reste Petor obor larivyer Efrat, pour dir li: I annan en pep ki sorti Lezip. Zot kouver pei antye e zot reste vizavi avek mwan. 6Vini e modi zot pour mwan, akoz zot pli for ki mwan. Petet mon ava kapab bat zot e pous zot lwen avek mon pei. Mon konnen ki sa ki ou beni, i ganny beni; sa ki ou modi, i ganny modi.
7Bann sef Moab ek bann sef Madyanit ti anmenn kado pour Balaanm. Ler zot ti ariv kot Balaanm, zot ti donn li mesaz sorti kot Balak. 8Balaanm ti dir zot: Pas lannwit isi; demen mon ava donn zot en larepons dapre parol ki SENYER ava dir mwan. Alor, bann sef Moab ti pas lannwit kot Balaanm.
9Bondye ti vin kot Balaanm e demann li, “Lekel sa bann zonm ki kot ou?”
10Balaanm ti reponn Bondye, “Balak, garson Sipor, lerwa Moab, in anvoy zot avek mesaz pour dir mwan: 11En pep ki sorti Lezip i kouver pei antye. I oule mon vini pour modi sa pep, pour li ganny laviktwar e sas zot lwen avek son teritwar.”
12Bondye ti dir Balaanm, “Ou pa pou al avek zot. Ou pa pou modi sa pep, akoz i en pep beni.”
13Balaanm ti leve lannmen bomaten. I ti dir avek bann mesaze Balak, “Ale, retourn kot zot. SENYER in refize les mwan al avek zot.”
14Alor, zot ti retourn kot Balak. Zot ti dir li, “Balaanm in refize vin avek nou.”
15Balak ti anvoy en pli gran delegasyon bann sef pli enportan ki avan. 16Ler zot ti ariv kot Balaanm, zot ti dir li, “La sa ki Balak, garson Sipor i dir: Pa les nanryen anpes ou vin kot mwan. 17Mon pou byen rekonpans ou. Mon ava fer tou sa ki ou dir mwan fer. Vin modi sa pep pour mwan.”
18Balaanm ti reponn bann serviter Balak, “Menm si Balak ti pou donn mwan tou son lor ek son larzan, mon pa pou kapab fer nanryen kont lord SENYER, mon Bondye. 19Me zot, pas lannwit isi. Mon ava konnen si SENYER i annan ankor keksoz pour li dir mwan.”
20Dan lannwit, Bondye ti vin kot Balaanm. I ti dir li, “Si sa bann zonm in vin apel ou, leve, al avek zot; me fer zis sa ki mwan, mon dir ou fer.”
21Alor, son lannmen bomaten, Balaanm ti leve. I ti sel son bourik e al avek bann sef Moab.
Balaanm ek Son Bourik
22Bondye ti ankoler akoz Balaanm ti'n ale. Dan semen, pandan ki i ti pe ale lo son bourik, akonpannyen par de serviter, lanz SENYER ti debout dan milye semen pour bar son semen. 23Bourik ti war lanz SENYER debout lo semen avek en lepe dan son lanmen. Alor, i ti kit semen pour al dan laplenn. Balaanm ti bat son bourik pour fer li retourn lo semen.
24Apre sa, lanz SENYER ti pozisyonn li dan en semen etrwat dan plantasyon rezen kot ti annan en miray lo sak kote. 25Ler bourik ti war lanz SENYER, i ti koste avek miray. Lipye Balaanm ti kwense kont miray e Balaanm ti fwet son bourik ankor.
26Lanz SENYER ti al devan zot. I ti plas li dan en landrwa etrwat kot i ti enposib tourn ni adrwat ni agos. 27Bourik ti war lanz SENYER. I ti afese anba Balaanm e tonm ater. Balaanm ti pran lakoler e i ti bat son bourik avek son baton. 28Alor, SENYER ti ouver labous bourik e fer li koze. I ti dir Balaanm, “Ki mon'n fer ou pour ou bat mwan? Sa i fer deza trwa fwa?”
29Balaanm ti reponn bourik, “Akoz ou'n foud mwan? Si mon ti annan en lepe dan mon lanmen, mon ti'n fini touy ou.”
30Bourik ti reponn li, “Eski mon pa sa menm bourik ki ou abitye monte tou ou lavi ziska ozordi. Eski i mon labitid fer konmsa anver ou?”
I ti reponn, “Non.”
31SENYER ti ouver lizye Balaanm. I ti war lanz SENYER debout dan semen avek son lepe dan lanmen. I ti prosternen lafas ater. 32Lanz SENYER ti demann li, “Akoz ou'n bat ou bourik? La i fer trwa fwa. Mon'n vin pour anpes ou fer sa vwayaz, akoz sa semen pou anmenn maler lo ou. 33Ou bourik in war mwan trwa fwa. Si i pa ti'n sanz semen, mon ti'n fini touy ou e les ou bourik vivan.”
34Balaanm ti reponn lanz SENYER, “Mon'n fer pese; mon pa ti konnen ki ou ti dan semen devan mwan. Aprezan, si ou pa kontan, mon ava retourn kot mwan.”
35Me lanz SENYER ti dir li, “Non, al avek zot. Me ou ava repet zis parol ki mon ava dir ou.” Balaanm ti kontiny son semen avek bann sef Balak.
Balak I Akey Balaanm
36Kan Balak ti tande ki Balaanm pe vini, i ti al rankontre li ziska lavil Moab ki obor larivyer Arnon, ki lo frontyer son teritwar. 37Balak ti dir Balaanm, “Akoz ou pa ti vini ler mon ti anvoy sers ou premye fwa? Ou krwar mon pa ase ris pou rekonpans ou?”
38Balaanm ti dir li, “Mon'n vin kot ou. Me pa krwar mon kapab dir nenport kwa. Mon pou repet zis parol ki Bondye ava met dan mon labous.”
39Alor, Balaanm ti al avek Balak e zot ti ariv Kiryat-Housot. 40Balak ti ofer en sakrifis bef ek mouton e partaz avek Balaanm ek sa bann sef ki ti la.
41Lannmen bomaten, Balak ti pran Balaanm e mont avek li ziska Bamot-Baal kot i ti war selman en parti pep Izrael.
Currently Selected:
Nonm 22: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
