Matye 5
5
Sermon lo Montanny
1Kan Zezi ti war lafoul ki ti vin kot li, i ti mont lo en montanny. I ti asiz e son bann disip ti vin otour li. 2I ti konmans donn zot sa lansennyman:
Vre Boner
(Lk 6.20-26)
3Byennere bann ki konnen zot pov,
akoz Rwayonm lesyel i pour zot!
4Byennere bann ki dan latristes,
akoz zot pou ganny konsole!
5Byennere bann ki dou,
akoz zot pou posed later!
6Byennere bann ki lafen
e swaf lazistis,
akoz zot pou rasazye!
7Byennere bann ki annan konpasyon pour lezot,
akoz Bondye pou annan konpasyon pour zot!
8Byennere bann ki annan leker pir,
akoz zot pou war Bondye!
9Byennere bann ki fer lape,
akoz zot pou ganny apele bann zanfan Bondye!
10Byennere bann ki ganny persekite pour lazistis,
akoz Rwayonm lesyel i pour zot!
11Zot byennere, kan zot ganny ensilte, persekite akoz mwan;
kan dimoun i koz dimal
kont zot, akoz mwan!
12Rezoui e santi zot ere,
akoz annan en gran rekonpans
pe esper zot dan lesyel!
Konmsa menm ki zot bann zanset
ti persekit bann profet avan zot.
Disel Later ek Lalimyer Lemonn
(Mrk 9.50; Lk 14.34-35)
13Zezi ti kontinyen dir: Se zot disel later. Me si disel i perdi son gou, avek kwa ou pou redonn li son gou sale? I pa bon pour nanryen; i ganny zete deor, pour dimoun mars lo la.
14Se zot lalimyer lemonn. En lavil ki'n ganny konstri lo en montanny pa kapab ganny kasyet. 15Personn pa alim en lalanp pour met anba en bol, me i met li anler lo en portlanp pour ekler tou dimoun ki dan lakaz. 16Konmsa ki zot lalimyer i devre klere devan tou dimoun, pour ki zot war byen zot bann bon aksyon e loue zot Papa ki dan lesyel.
Lansennyman lo Lalwa
17Pa krwar ki mon'n vin pour fer disparet Lalwa Moiz ek lansennyman bann profet. Mon pa'n vin pour detri, me pour akonplir. 18Mon dir zot, sa i laverite: Osi lontan ki lesyel ek later i egziste, pa menm en pli pti let, ni en pli pti detay Lalwa pou ganny detri, ziska ki tou sa bann lansennyman i ganny akonpli. 19Alor, sa enn ki kas en pli pti komannman e ansenny lezot pour fer parey, i pou ganny deklare pli pti dan Rwayonm lesyel. Me sa enn ki met mon bann komannman an pratik e ansenny lezot pour fer parey, i pou ganny deklare gran dan Rwayonm lesyel. 20Mon asir zot: Si zot fidelite anver lavolonte Bondye pa depas fidelite bann profeser Lalwa ek bann Farizyen, zot pa pou kapab antre dan Rwayonm lesyel.
Lansennyman lo Lakoler
21Zot in tande ki nou zanset ti ganny demande: Pa fer krim#5.21 Egz 20.13; Det 5.17.; sa enn ki fer krim pou ganny zize. 22Me mwan mon dir zot: Sa enn ki pran lakoler kont son frer, pou ganny zize. Sa enn ki ensilte son frer, pou ganny zize devan tribinal. Sa enn ki tret son frer: Fou, pou ganny pini dan dife lanfer.
23Si alor, ou pe al prezant ou lofrann devan lotel, e ki ou rapel ki ou frer i annan keksoz kont ou, 24kit ou lofrann la, devan lotel, e al fer lape avek ou frer avan. Apre, retournen e prezant ou lofrann avek Bondye.
25Si ou annan en zafer an kour kont en dimoun, depese fer zanmi avek li letan zot ankor dan semen; sinon, ou ladverser ava anmenn ou devan ziz. Ziz ava met ou dan lanmen gard e ou ava ganny met dan prizon. 26Mon dir ou, sa i laverite: Ou pa pou sorti la ziska ki ou'n fini pey ou det ziska sa dernyen sou.
Lansennyman lo Size Adilter
27Zot in tande ki i'n ganny dir: Pa komet adilter#5.27 Egz 20.14; Det 5.18.. 28Me mwan mon dir zot: En dimoun ki get en fanm avek lanvi, i'n deza komet adilter avek li dan son leker. 29Si ou lizye drwat i fer ou tonm dan pese, aras li e zet li lwen. Vomye ou perdi en parti ou lekor, plito ki ou lekor antye i ganny zete dan lanfer. 30Si ou lanmen drwat i fer ou tonm dan pese, koup li e zet li lwen. Vomye ou perdi en parti ou lekor, plito ki ou lekor antye i ganny zete dan lanfer.
Lansennyman lo Divors
(Mat 19.9; Mrk 10.11-12; Lk 16.18)
31I'n ganny osi dir: En dimoun ki divors son fanm i bezwen donn li en let divors#5.31 Det 24.1..
32Me mwan mon dir zot: En zonm ki divors son fanm, sof dan ka ki son fanm in tronp li, i pe pous li pour komet adilter. En zonm ki marye avek en fanm divorse, i osi komet adilter.
Lansennyman lo Serman
33Zot in osi tande ki i'n ganny dir avek nou bann zanset: Pa kas ou serman, me akonpli bann ve ki ou'n promet par serman devan Senyer#5.33 War Lev 19.12; Nm 30.3; Det 23.22-24..
34Me mwan mon dir zot: Pa fer okenn serman ni par lesyel, akoz lesyel i tronn Bondye; 35ni par later, akoz later i landrwa kot i poz son lipye; ni par Zerizalenm, akoz i lavil gran Lerwa.
36Pa ni fer serman lo ou latet, akoz ou pa kapab fer en sel bren seve vin blan oubyen nwanr.
37Kan ou koze, dir wi, kan fodre dir wi; oubyen non, kan fodre dir non. Tou sa ki zot azoute, i sorti kot dyab.
Lansennyman lo Vanzans
(Lk 6.29-30)
38Zot in tande ki i'n ganny dir: Ey pour ey, dan pour dan#5.38 Egz 21.24; Lev 24.20; Det 19.21..
39Me mwan mon dir zot: Pa tir vanzans lo en dimoun ki'n fer ou ditor. Si en dimoun i donn ou en kalot lo ou lazou drwat, prezant li lazou gos osi.
40Si en dimoun i anmenn ou ankour pour ou semiz, les li pran ou palto osi.
41Si en dimoun i fors ou mars en kilomet avek li, fer de kilomet avek li.
42Si en dimoun i demann ou keksoz, pa refiz li. Pa refiz en dimoun ki demann ou pret li en keksoz.
Kontan ou Lennmi
(Lk 6.27-28, 32-36)
43Zot in tande ki i'n ganny dir: Kontan ou prosen#5.43 Lev 19.18. e ay ou lennmi. 44Me mwan mon dir zot: Kontan zot bann lennmi e priy pour bann ki persekit zot.
45Alor, zot ava vin bann vre garson zot Papa ki dan lesyel. Annefe, i fer son soley leve lo bann ki move e lo bann ki bon; i fer tonbe lapli lo bann ki zis e lo bann ki pa zis.
46Si zot kontan zis bann ki kontan zot, ki rekonpans Bondye pou donn zot? Menm bann kolekter taks zot fer parey.
47Si zot dir bonzour zis zot bann frer, kwa ki ekstraordiner? Menm bann non-Zwif i azir konmsa.
48Zot alor, zot devre parfe parey zot Papa ki dan lesyel i parfe.
Currently Selected:
Matye 5: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.