Matye 4
4
Tantasyon Zezi par Dyab
(Mrk 1.12-13; Lk 4.1-13)
1Alor, Lespri ti anmenn Zezi dan dezer, pour li ganny tante par dyab. 2Apre ki i ti'n reste 40 zour ek 40 nwit san manze, Zezi ti lafen. 3Dyab ti vin tant Zezi. I ti dir li, “Si ou Garson Bondye, donn lord ki sa bann ros i vin dipen.”
4Me Zezi ti reponn li, “Lekritir i deklare: Zonm pa pou viv zis lo dipen, me lo tou parol ki sorti dan labous Bondye#4.4 Det 8.3..”
5Alor, dyab ti anmenn Zezi ziska Zerizalenm, e met li debout lo lapwent twa Tanp. 6Dyab ti dir li, “Si ou Garson Bondye, zet ou anba. Annefe, i'n ekri:
Bondye pou donn lord son bann lanz lo ou size:
Zot pou anmenn ou lo zot lanmen,
pangar ou konny ou lipye avek en ros#4.6 Ps 91.11-12..”
7Zezi ti reponn li, “I'n osi ekri: Ou pa devre tant Senyer ou Bondye#4.7 Det 6.16..”
8Ankor en fwa, dyab ti anmenn Zezi lo en montanny byen o. I ti montre li tou bann rwayonm partou lo later ek zot splander. 9Dyab ti dir li, “Mon pou donn ou tousala, si ou met ou azenou e ador mwan.”
10Zezi ti reponn li, “Sorti la, Satan! Ale. I'n ekri: Se Senyer, ou Bondye ki ou devre adore e li tousel ki ou devre servi#4.10 Det 6.13.!”
11Alor, dyab ti kit li, e bann lanz ti vin servi li.
Zezi I Konmans Son Minister dan Galile
(Mrk 1.14-15; Lk 4.14-15)
12Kan Zezi ti tande ki Zan ti'n ganny met dan prizon, i ti al dan Galile. 13I ti kit Nazaret e i ti al reste Kapernaoum, obor lak Galile, dan teritwar Zabilon ek Neftali. 14Sa ti arive pour ki parol profet Ezai i ganny realize:
15Later Zabilon, later Neftali,
semen lo kote lanmer,
pei lot kote larivyer Zourden!
Galile, kot bann nasyon etranze
i reste!
16Lepep ki ti pe asiz dan fernwanr, in war en gran lalimyer.
Pour bann ki ti pe asiz dan pei, dan fernwanr lanmor,
en lalimyer in leve parmi zot#4.16 Eza 8.23—9.1.!
17Apartir sa moman, Zezi ti konmans prese. I ti dir: Sanz zot mannyer viv, akoz Rwayonm lesyel i pros#4.17 War not 3.2.!
Zezi I Apel Kat Peser
(Mrk 1.16-20; Lk 5.1-11)
18En zour, Zezi ti pe marse obor lak Galile. I ti war de frer ki ti peser: Simon, ki zot ti apel Pyer, ek son frer Andre. Zot ti pe pas lasenn dan lak. 19Zezi ti dir zot, “Swiv mwan e mon ava fer zot lapes zonm.”
20Deswit, zot ti kit zot lasenn e swiv li.
21En pe pli lwen, Zezi ti war de lot frer, Zak ek Zan, de garson Zebede. Zot ti dan kannot avek zot papa Zebede, e zot ti pe repar zot lasenn. Zezi ti apel zot. 22Deswit, zot ti kit zot kannot ek zot papa e swiv Zezi.
Zezi I Ansennyen e I Geri
23Zezi ti al partou dan Galile. I ti prese dan bann sinagog e anons Bonn Nouvel konsernan Rwayonm Bondye. I ti geri toudsort maladi ek soufrans parmi lepep. 24Son renonmen ti fannen partou dan Lasiri antye. Zot ti anmenn kot li bann ki ti annan toudsort maladi e ki ti pe soufer: Bann ki ti posede par demon, bann ki ti annan bebelouka ek bann ki ti paralize. Zezi ti geri zot tou.
25En gran lafoul ti swiv li sorti depi Galile, dan rezyon Dekapol, depi Zerizalenm, Zide e dan teritwar ki lo lot kote larivyer Zourden.
Currently Selected:
Matye 4: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.