Psonm 77
77
Rekonfor dan Letan Maler
Psonm Asaf.
1Mon kriy for ver Bondye;
mon apel Bondye avek tou mon lafors
pour li antann mwan.
2Kan mon dan maler,
mon tourn ver SENYER.
Dan lannwit, mon reste lanmen anler, san repo;
mon refize ganny konsole.
3Mon mazin Bondye, mon plennyen devan li.
Plis mon reflesir, mon perdi kouraz.
4Ou anpes mon lizye fermen.
Mon telman trakase ki mon pa kapab koze.
5Mon mazin letan lontan;
mon rapel bann lannen pase.
6Aswar, mon reflesir atraver mon lanmizik;
mon mazinen, mon demann dan mwan menm:
7Eski SENYER pou rezet nou pour touzour?
Eski i pa pou montre nou son faver ankor?
8Eski son fidelite anver nou
in disparet pour touzour?
Eski son promes in fini pour debon?
9Eski Bondye in oubliy son konpasyon anver nou?
Eski dan son lakoler,
i nepli annan okenn konpasyon pour nou?
10Mon dir dan mwan menm:
Sa ki bles mwan,
se ki Bondye Treo in sanz son fason fer.
11Mon pou rapel tou bann gran mervey
ki SENYER in fer;
mon pou mazin son bann mervey letan pase.
12Mon pou medit lo tou sa ki ou'n fer;
mon pou mazin tou ou bann gran mervey.
13Mon Bondye! Tou sa ki ou fer i sen.
Lekel bondye ki osi gran ki nou Bondye?
14Zis ou sa Bondye ki fer bann mervey.
Ou'n montre ou pwisans devan tou bann pep.
15Par ou lafors, ou'n sov ou pep,
bann desandan Zakob ek Zozef.
16Mon Bondye! Bann delo ti war ou.
Ler zot ti war ou, zot ti tranble;
menm fon lanmer ti per.
17Bann nyaz ti devers lapli;
loraz ti kriye dan lesyel;
zekler ti klate dan tou direksyon.
18Tapaz ou loraz ti roule dan en tourbiyon;
ou zekler ti alim lemonn;
later ti tranble e sekwe.
19Ou ti pas atraver lanmer;
ou ti fer en semen atraver fon lanmer.
Me personn pa'n war ou lepa.
20Par lanmen Moiz ek Aaron,
ou'n gid ou pep parey en troupo.
Currently Selected:
Psonm 77: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
