Nonm 35
35
Lavil pour bann Levit
1SENYER ti koz avek Moiz dan laplenn Moab, obor larivyer Zourden, vizavi Zeriko: 2Donn lord bann Izraelit pour ki dan zot par, zot donn en lavil bann levit kot pour zot reste. Zot devre osi donn laplenn otour sa bann lavil. 3Sa bann lavil ava pour zot reste ladan, bann laplenn pour zot troupo, pour zot byen ek lezot zannimo ki zot annan. 4Later ki zot pou donn bann levit ava mezir 500 met depi miray lo sak kote otour miray lavil. 5Ou ava mezir 1,000 met sak kote lavil: 1,000 met dan Les, 1,000 met dan Sid, 1,000 met dan Was, 1,000 met dan Nor; lavil pou dan milye.
6Ou ava donn zot osi, sis lavil refiz, kot bann kriminel ava kapab al reste. Zot ava azout 42 lezot lavil. 7Zot ava donn bann levit 48 lavil an tou, avek bann laplenn ki otour. 8Kantite lavil ki bann tribi pou donn bann levit pou ganny determinen par grander zot teritwar, par propriyete ki zot in gannyen. Sa enn ki'n ganny pli bokou ava donn plis; sa enn ki'n ganny mwens ava donn mwens.
Bann Lavil Refizye
9SENYER ti koz avek Moiz. I ti dir li: 10Dir bann Izraelit: Ler zot ava travers larivyer Zourden e antre dan pei Kanaan, 11zot ava swazir bann lavil kot bann kriminel ava kapab al rod refiz, si zot in touy en dimoun par aksidan. 12Sa bann lavil pou en landrwa sekirite, pangar bann fanmir sa viktim i touy li avan ki i ganny zize devan kominote.
13Swazir sis lavil refiz: 14Trwa lavil lo kote Les larivyer Zourden; e trwa lavil dan pei Kanaan. 15Sa sis lavil ava servi koman en landrwa pour bann refizye Izraelit e bann etranze rezidan tanporer ki parmi zot. Sa enn ki'n komet en krim envolonterman, ava kapab al pran refiz dan sa bann lavil.
Konsernan Mert ek Revanz
16Si en dimoun i tap son prosen avek en feray e i mor, sa dimoun i en kriminel e devret ganny kondannen anmor.
17Si i'n tap en dimoun avek en ros ki kapab koz son lanmor, sa kriminel devret ganny met anmor.
18Si i'n tap en dimoun avek en lenstriman an bwa ki kapab donn lanmor, sa kriminel devret ganny met anmor. 19Vanzer disan ava touy sa mertriye kan i ava zwenn li.
20Si en dimoun, i pous son prosen ki i deteste; si par mesanste, in zet keksoz lo li, e ki sa dimoun i mor; 21si par mesanste, i'n tap li koudpwen e sa dimoun i mor; sa dimoun ki'n tap li i merit lanmor; i en mertriye. Vanzer disan sa viktim ava annan drwa met li anmor; i ava fer sa ler i zwenn li.
22Me si i'n pous li par azar, san mesanste; si i'n anvoy en lobze lo li non pa par mesanste; 23si i les tonm lo en dimoun, en ros ki kapab touye; si sa ros i touy sa dimoun ki pa ti son lennmi e ki i pa ti pe rod fer li dimal, 24alor, kominote ava baz zizman dapre sa bann regleman ant sa enn ki'n tape ek son vanzer disan. 25Kominote ava protez sa dimoun kont vanzer disan e retourn li dan lavil refiz. I ava reste la ziska lanmor Gran-Pret ki ti ganny konsakre avek delwil sen.
26Me si sa kriminel i oze sorti dan lavil refiz, 27e ki vanzer i zwenn li an deor teritwar sa lavil e i touy li, sa vanzer pa pou koupab okenn krim. 28Sa zonm ki'n komet sa mert ava reste dan sa lavil refiz ziska lanmor Gran-Pret. Apre lanmor Gran-Pret, i ava kapab retourn kot li.
29Sa i bann lalwa ki zot devre garde toultan e partou kot zot ava reste.
30Dan tou bann ka mert, fodre depozisyon plizyer temwen avan ki en kriminel i ganny kondannen anmor. Zis en temwen pa ase pour fer pas en santans lanmor.
31Ou pa pou aksepte larzan pour sov lavi en kriminel ki koupab; i devret ganny met anmor.
32Ou pa devre aksepte larzan pour les en dimoun al refizye dan en lavil refiz oubyen sorti pour al reste dan pei, avan lanmor Gran-Pret.
33Ou pa pou profann pei kot ou pe reste. Annefe, disan i rann enpir pei. Zis disan sa dimoun ki'n touye ki kapab lav disan ki'n rann pei enpir. 34Pa bezwen rann enpir later kot ou reste, e kot mon reste, akoz mwan SENYER mon reste parmi pep Izrael.
Labib An Kreol Seselwa © Seychelles Bible Society, 2013.