Nonm 34
34
Frontyer Pei
1SENYER ti koz avek Moiz. I ti dir li: 2Donn sa lord bann Izraelit: Kan zot ava antre dan pei Kanaan, later ki mon'n donn zot, la son bann balizaz ek son bann frontyer:
3Dan Sid, zot teritwar ava baliz avek dezer Sin, kontinyen avek teritwar Edonm. Dan Les, i ava konmans depi Sid avek lanmer Mor. 4Apre, i ava desann dan Sid e kontourn ver montanny Akrabim; i ava travers dezer Sin, pour fini dan Sid, Kades Barnea. Apre sa, i ava kontinyen ziska Hasar-Adar e al ziska Asmonn. 5Kitan Asmonn, i ava kontinyen ziska frontyer Lezip e fini dan lanmer Mediterane.
6Lanmer Mediterane ava zot frontyer Was; i ava form zot frontyer lo kote Was.
7Zot frontyer dan Nor ava konmans avek lanmer Mediterane e mont ziska Montanny Hor. 8Depi Montanny Hor, ou ava fer li pas par Sedad, ziska lantre Hamat. 9Apre, i ava pas par Zifronn e fini Hasar-Enann. Sa ava ou frontyer Nor.
10Zot balizaz dan Les ava konmans kot Hasar-Enann ziska Sefanm. 11Apre, sorti Sefanm, i pou desann Ribla, Les avek Ain; apre, i pou al ziska Les Lak Zenezaret. 12I pou redesann Sid tou dilon larivyer Zourden e fini dan lanmer Mor. Sa pou zot teritwar avek tou son bann frontyer.
13Moiz ti transmet sa lord avek bann Izraelit: Sa i pei ki SENYER in donn sa nef tribi ek sa demi tribi, par tiraz osor. 14Tribi Riben, Gad ek demi tribi Manase in fini ganny zot patrimwann dapre zot fanmir, 15lo lot kote larivyer Zourden dan Les, vizavi Zeriko.
Bann Sef Responsab Partaz Pei
16SENYER ti koz avek Moiz. I ti dir li: 17Pret Eleazar ek Zozye, garson Noun, pou fer partaz pei. 18Ou ava osi pran en sef dan sak tribi, pour ed zot fer sa partaz.
19La zot non: Pour tribi Zida: Kaleb, garson Zefoune.
20Pour tribi Simeon: Samyel, garson Amihoud.
21Pour tribi Benzamen: Elidad, garson Kislonn.
22Pour tribi Dan: Bouki, garson Yogli.
23Pour desandan Zozef, pour tribi Manase: Hanyel, garson Efod.
24Pour tribi Efraim: Kemouel, garson Siftann.
25Pour tribi Zabilon: Elisafann, garson Parnak.
26Pour tribi Isakar: Paltiel, garson Azann.
27Pour tribi Aser: Ahihoud, garson Selomi.
28Pour tribi Neftali: Pedael, garson Amihoud.
29Sa ti bann sef tribi ki SENYER ti'n swazir pour fer partaz later dan pei Kanaan, posesyon pep Izrael.
Labib An Kreol Seselwa © Seychelles Bible Society, 2013.