Nonm 2
2
Plasman bann Tribi dan Kan
1SENYER ti dir avek Moiz ek Aaron: 2Bann Izraelit ava kanp par tribi, sakenn anba bannyer son fanmir. Zot ava enstal zot latant en bon distans e vir li dan direksyon Latant Rankont.
3Tribi Zida ava kanp anba son bannyer, lo kote Les, dan direksyon soley leve avek son sef: Nasonn, garson Aminadab. 4Son larme: 74,600 zonm.
5Tribi Isakar ava kanp obor li avek son sef: Netaneel garson Souar. 6Son larme: 54,400 zonm.
7Tribi Zabilon avek son sef: Eliab, garson Helonn. 8Son larme: 57,400 zonm.
9Total zonm ki'n ganny resanse dan kan Zida avek son bann vwazen: An tou 186,400 zonm. Zot ava sorti premye.
10Lo kote Sid, i vin tribi Riben avek son sef: Elisour, garson Sedeour. 11Son larme: 46,500 zonm.
12Obor li, i vin tribi Simeon avek son sef: Seloumiel, garson Sourisadai. 13Son larme 59,300 zonm.
14Apre, i vin tribi Gad avek son sef: Eliasaf, garson Reouel. 15Son larme: 45,650 zonm.
16Total zonm resanse dan kan Riben ek son bann vwazen: An tou 151,450 zonm. Zot ava sorti dezyenm.
17Apre, bann levit ava sorti dan milye bann kanpman avek Latant Rankont; zot ava kanp dan menm lord, sakenn anba son bannyer.
18Lo kote Was, ava vin kan Efraim anba son bannyer, avek son sef tribi: Elisama, garson Amihoud. 19Son larme: 40,500 zonm.
20Akote li, ava vin tribi Manase avek son sef tribi: Gamalyel, garson Pedasour. 21Son larme 32,200 zonm.
22Apre, i vin tribi Benzamen avek son sef: Abidann, garson Gidoni. 23Son larme: 35,400 zonm.
24Total zonm resanse dan kan Efraim: 108,100 zonm. Zot ava sorti trwazyenm.
25Lo kote Nor, ava vin tribi Dann avek son sef tribi: Ahiezer, garson Amisadai. 26Son larme: 62,700 zonm.
27Tribi Aser ava kanp akote li, avek son sef tribi: Pagiel, garson Okrann. 28Son larme: 41,500 zonm.
29Apre, i vin tribi Neftali avek son sef: Ahira, garson Einann. 30Son larme: 53,400 zonm.
31Total zonm resanse dan kan Dann: 157,600 zonm. Zot ava sorti dernyen, dapre lord zot bannyer.
32Total larme Izrael resanse e kanpe fanmir par fanmir: 603,550 zonm an tou.
33Bann levit pa ti ganny resanse parmi bann Izraelit, dapre lord ki SENYER ti'n donn Moiz.
34Bann Izraelit ti fer parey SENYER ti'n ordonn Moiz. Zot ti kanp par group, sakenn dan son klan, dapre son fanmir.
Labib An Kreol Seselwa © Seychelles Bible Society, 2013.