Nonm 1
1
Premye Resansman Pep Izrael
1SENYER ti koz avek Moiz dan dezer Sinai, dan Latant Temwannyaz, lo premye zour, dezyenm mwan, dezyenm lannen, apre ki zot ti'n sorti dan pei Lezip. I ti dir li:
2Fer en resansman lo kominote pep Izrael, par klan e par fanmir; pran zot non enn par enn. 3Kont bann ki annan 20 an, an montan, tou sa bann ki pare pour servi dan larme Izrael. Ou ek Aaron ava kont zot tou, klan par klan. 4Pran avek ou, en zonm dan sak tribi, sef dan fanmir son klan.
5La non sa bann zonm ki pou asiste ou: Dan tribi Riben: Elisour garson Sedeour; 6dan tribi Simeon: Seloumiel, garson Sourisadai; 7dan tribi Zida: Nasonn garson Aminadab; 8sorti dan tribi Isakar: Netaneel garson Souar; 9dan tribi Zabilon: Eliab garson Helonn; 10dan tribi Efraim garson Zozef; Elisama garson Amihoud, e sorti dan tribi Manase: Gamalyel garson Pedasour; 11dan tribi Benzamen: Abidann garson Gidoni; 12dan tribi Dann: Ahiezer garson Amisadai; 13dan tribi Aser: Pagiel garson Okrann; 14dan tribi Gad: Eliasaf garson Deouel; 15dan tribi Neftali: Ahira garson Einann.
16Sa ti non bann ki ti'n ganny swazir parmi kominote Izrael, bann dirizan dan zot tribi; zot ti sef dan zot klan. 17Moiz ek Aaron ti pran sa bann zonm ki ti'n ganny nonmen. 18Lo premye zour, dezyenm mwan, zot tou ti rasanble pour fer anrezistre zot non, enn par enn, dapre zot klan e par fanmir. Zot ti anrezistre tou bann zenn garson 20 an, an montan. 19Parey SENYER ti'n ordonn Moiz, i ti kont zot tou dan dezer Sinai.
20Dan tribi Riben, premye ne Izrael, son desandan par sak klan ek fanmir, tou zonm ki'n ganny 20 an, an montan, tou sa ki kapab servi pour lager dan larme: 21An tou, 46,500 zonm ti ganny resanse dan tribi Riben.
22Dan tribi Simeon, son desandan par klan ek fanmir, tou zonm ki'n ganny 20 an, an montan, tou sa ki kapab servi pour lager dan larme: 23An tou, 59,300 zonm ti ganny resanse dan tribi Simeon.
24Dan tribi Gad, son desandan par klan ek fanmir, tou zonm ki ti'n ganny 20 an, an montan, tou sa ki kapab servi pour lager dan larme: 25An tou, 45,650 zonm dan tribi Gad.
26Dan tribi Zida, son desandan par klan ek fanmir, tou zonm ki'n ganny 20 an, an montan, tou sa ki kapab servi pour lager dan larme: 27An tou, 74,600 zonm dan tribi Zida.
28Dan tribi Isakar, son desandan par klan ek fanmir, tou zonm ti'n ganny 20 an, an montan, tou sa ki kapab servi pour lager dan larme: 29An tou, 54,400 zonm dan tribi Isakar.
30Dan tribi Zabilon, son desandan par sak klan ek fanmir, tou zonm ti'n ganny 20 an, an montan, tou sa ki kapab servi pour lager dan larme: 31An tou, 57,400 zonm dan tribi Zabilon.
32Dan tribi Efraim garson Zozef, son desandan par klan ek fanmir, tou zonm ki'n ganny 20 an, an montan, tou sa ki kapab servi pour lager dan larme: 33An tou, 40,500 zonm dan tribi Efraim.
34Dan tribi Manase, son desandan par klan ek fanmir, tou zonm ki'n ganny 20 an, an montan, tou sa ki kapab servi pour lager dan larme: 35An tou 32,200 zonm dan tribi Manase.
36Dan tribi Benzamen, son desandan par sak klan ek fanmir, tou zonm ti'n ganny 20 an, an montan, tou sa ki kapab servi pour lager dan larme: 37An tou 45,400 zonm dan tribi Benzamen.
38Dan tribi Dann, son desandan par klan ek fanmir, tou zonm ti'n ganny 20 an, an montan, tou sa ki kapab servi pour lager dan larme: 39An tou 62,700 zonm dan tribi Dan.
40Dan tribi Aser, son desandan par klan ek fanmir, tou zonm ki'n ganny 20 an, an montan, tou sa ki kapab servi pour lager dan larme: 41An tou 41,500 zonm dan tribi Aser.
42Dan tribi Neftali, son desandan par klan ek fanmir, tou zonm ki'n ganny 20 an, an montan, tou sa ki kapab servi pour lager dan larme: 43An tou 53,400 zonm dan tribi Neftali.
44Sa i lakantite zonm ki Moiz ek Aaron ti konte avek led sa 12 sef ki sorti dan sak tribi. 45Tou pep Izrael, resanse par fanmir, tou zonm aze 20 an, an montan ki kapab al dan larme Izrael 46ti fer en total 603,550 zonm. 47Me bann Levit pa ti ganny konte dapre lezot tribi. 48Annefe, SENYER ti'n dir avek Moiz, 49“Pa bezwen kont tribi Levi, e pa bezwen fer resansman lo zot parmi bann tribi Izrael. 50Plito apwent zot pour pran ansarz Latant Temwannyaz e lo tou son bann lobze ek tou lezot propriyete Latant. Zot bezwen pran swen avek Latant e otour kan. 51Sak fwa ki Latant i ganny deplase, bann levit ava bezwen demont li, e sak fwa ki zot arete pour kanpe, bann levit ava remont li. Si en dimoun i aprose, i devret ganny met anmor. 52Bann tribi Izraelit i bezwen diviz zot par klan ler zot enstal zot latant, sakenn dan son prop klan anba bannyer son fanmir. 53Me bann levit ava pik zot latant toultour Latant Temwannyaz pour anpes maler tonm lo bann Izraelit. Bann levit i responsab pour pran swen avek Latant Temwannyaz.”
54Bann Izraelit ti fer tou parey SENYER ti'n ordonn Moiz.
Labib An Kreol Seselwa © Seychelles Bible Society, 2013.