Matye 16
16
Farizyen ek Sadiseen I Demann En Siny
(Mrk 8.11-13; Lk 12.54-56)
1Bann Farizyen ek bann Sadiseen ti apros Zezi. Pour met li dan en pyez, zot ti demann li en siny sorti dan lesyel. 2Me Zezi ti reponn zot, “Letan soley pe kouse, zot dir: Pou fer botan, akoz lesyel i rouz. 3Granmaten zot dir: Pou annan movetan akoz lesyel i rouz sonm. Zot kapab predir letan an regardan lesyel, me zot pa kapab disern bann siny ki konsern sa letan#16.3 Plizyer ansyen maniskri napa verse 2 ek 3.!
4Sa zenerasyon move e adilter, i demann en siny! Me zot pa pou ganny okenn siny, eksepte siny Zonas.”
Apre, Zezi ti kit zot.
Lelven bann Farizyen ek bann Sadiseen
(Mrk 8.14-21)
5Kan bann disip ti travers lot kote lak, zot ti'n oubliye anmenn dipen. 6Zezi ti dir zot, “Fer atansyon! Vey zot kont lelven bann Farizyen ek bann Sadiseen!”
7Bann disip ti konmans diskit ant zot, “I dir sa, akoz nou pa'n anmenn dipen.”
8Zezi ti konnen ki zot ti pe mazinen. Alor, i ti dir zot, “Zot napa ase lafwa! Akoz zot pe diskit ant zot ki zot napa dipen? 9Zot pa ankor konpran? Zot pa rapel sa senk dipen ki ti nouri 5,000 zonm? Konbyen pannyen ti reste#16.9 War 14.15-21.? 10E sa set dipen ki ti nouri 4,000 zonm? Konbyen pannyen ti reste#16.10 War 15.32-38.? 11Akoz zot pa konpran ki mon pa pe koz avek zot lo dipen ler mon ti dir: Fer atansyon lelven bann Farizyen ek bann Sadiseen!”
12Alor, bann disip ti konpran ki Zezi pa ti pe dir zot fer atansyon kont lelven ki servi pour fer dipen, me fer atansyon kont lansennyman bann Farizyen ek bann Sadiseen.
Deklarasyon Pyer lo Zezi
(Mrk 8.27-30; Lk 9.18-21)
13Zezi ti ariv dan rezyon Sezare Filipi. La, i ti demann son bann disip, “Ki dimoun i dir lo Fis-de-Lonm?”
14Zot ti reponn li, “En bann i dir ou Zanbatis. Lezot i dir Eli; e lezot ankor i dir Zeremi oubyen enn bann profet.”
15Zezi ti demann zot, “Me zot, ki zot dir mon ete?” 16Simon Pyer ti reponn, “Ou menm Mesi, Garson Bondye vivan.”
17Zezi ti reponn li, “Ou ere, Simon, garson Zonas! Annefe, sa ki ou'n dir, pa en dimoun ki'n dir ou, me mon Papa ki dan lesyel. 18Mwan, mon deklare ki ou Pyer, e lo sa ros mon pou konstri mon Legliz, e pwisans lanmor pa pou ranport laviktwar kont li. 19Mon pou donn ou lakle Rwayonm lesyel. Sa ki ou anmare lo later pou ganny anmare dan lesyel; sa ki ou delarge lo later, pou ganny delarge dan lesyel.”
20Alor, Zezi ti ordonn son bann disip pour pa dir personn ki li menm Mesi.
Zezi I Anons Son Lanmor ek Son Rezireksyon
(Mrk 8.31—9.1; Lk 9.22-27)
21Apartir sa moman, Zezi ti konmans koz avek son bann disip ouvertman, “Mon bezwen al Zerizalenm. Bann ansyen, bann gran-pret ek bann profeser Lalwa pou fer mwan bokou soufer. Mon pou ganny met anmor, me trwazyenm zour mon pou resisite.”
22Pyer ti anmenn Zezi alekar e fer li bann repros. I ti dir Zezi, “Zanmen Senyer! Sa pa pou zanmen ariv ou.”
23Me Zezi ti tournen. I ti dir li, “Ale! Sorti la, Satan! Ou en lobstak dan mon semen. Sa ki ou pe mazinen pa sorti kot Bondye, me kot zonm.”
24Apre, Zezi ti dir avek son bann disip, “Si en dimoun i oule swiv mwan, fodre ki i aret mazin son prop lekor. Fodre i pran son lakrwa e swiv mwan. 25Sa enn ki oule sov son lavi, pou perdi li. Me sa enn ki perdi son lavi akoz mwan, i ava retrouv li. 26Ki pou profit en dimoun, si i ganny lemonn antye, me i perdi son lavi? Oubyen ki i kapab donnen an lesanz pour son lavi? 27Annefe, Fis-de-Lonm pou vini dan mazeste son Papa avek son bann lanz. I pou rekonpans sakenn dapre son bann aksyon.
28Mon dir zot, sa i laverite: Parmi bann ki isi, serten pa pou mor, avan ki zot war Fis-de-Lonm vini koman en lerwa.”
Labib An Kreol Seselwa © Seychelles Bible Society, 2013.