Matye 15
15
Lansennyman bann Zanset
(Mrk 7.1-13)
1Apre sa, bann Farizyen ek bann profeser Lalwa ti sorti Zerizalenm e zot ti vin demann Zezi, 2“Akoz ou bann disip i dezobei lansennyman ki nou bann zanset in transmet avek nou? Annefe, zot pa lav zot lanmen avan zot manze.”
3Zezi ti reponn zot, “Me zot, akoz zot dezobei komannman Bondye pour swiv zot prop tradisyon? 4Annefe, Bondye i dir: Onor ou papa ek ou manman; sa enn ki dir dimal lo son papa oubyen son manman i merit lanmor#15.4 War Egz 20.12; Det 5.16; Egz 21.17; Lev 20.9.. 5Me zot, zot ansennyen ki si en dimoun i dir son papa oubyen son manman: Sa ki mon ti devre donn ou mon'n konsakre pour Bondye. Alor sa zonm pa bezwen ed son papa ek son manman. 6Dan sa fason, zot detri valer Parol Bondye, pour swiv zot prop tradisyon. 7Bann ipokrit! Ezai ti annan rezon profetiz lo zot, kan i ti dir:
8Sa pep, i onor mwan avek labous,
Me zot leker i lwen avek mwan.
9Zot ladorasyon i initil.
Zot ansenny bann komannman
ki'n ganny fer par zonm#15.9 Eza 29.13.!”
Sa ki Rann En Dimoun Enpir
(Mrk 7.14-23)
10Apre, Zezi ti apel lafoul kot li. I ti dir zot:
“Ekoute e zot ava konpran: 11Pa sa ki antre dan labous en dimoun ki fer li enpir, me sa ki sorti dan son labous; sa, ki rann en dimoun enpir.”
12Alor, bann disip ti vin kot Zezi. Zot ti dir li, “Eski ou konnen ki ou'n ofans bann Farizyen par sa ki ou'n dir?”
13Zezi ti reponn, “Tou plant ki mon Papa dan lesyel pa'n plante pou ganny derasinen. 14Les zot! Zot en bann aveg ki pe kondwir bann aveg. Ler en dimoun aveg i kondwir en lot aveg, tou le de i tonm dan rigol.”
15Pyer ti dir li, “Eksplik nou sa parabol.”
16Zezi ti dir zot, “Zot osi zot pa konpran? 17Eski zot pa konnen ki tou sa ki antre dan labous en dimoun, i pas dan son lestoma avan ki i sorti dan son lekor? 18Me sa ki sorti dan son labous, i sorti dan son leker. Sa, ki rann en dimoun enpir. 19Annefe, dan leker i sorti tou bann move panse: Mert, adilter, lavi imoral, vole, fer kalonmni, ek medizans. 20Se sa bann keksoz ki rann en dimoun enpir. Me manze san lav lanmen, pa rann en dimoun enpir.”
Lafwa En Fanm Kananeen
(Mrk 7.24-30)
21Zezi ti kit sa landrwa e i ti al dan rezyon Tir ek Sidon. 22En fanm Kananeen ki ti reste dan sa rezyon, ti vin kot Zezi. I ti konmans kriye, “Senyer, Garson David pran pitye pour mwan. Mon fiy pe ganny tourmante par en demon.”
23Me Zezi pa ti dir li nanryen. Son bann disip ti apros li e sipliy li, “Akord li sa ki i demande. I pa pe arete fer tapaz deryer nou!”
24Zezi ti reponn, “Mon'n ganny anvoye zis pour bann brebi perdi parmi pep Izrael.”
25Me sa fanm ti vini e azenou devan li, i ti dir, “Senyer, ed mwan!”
26Zezi ti reponn, “I pa byen pour pran manze zanfan e zet avek bann lisyen.”
27Sa fanm ti reponn, “I vre, Senyer. Pourtan bann lisyen i manz bann myet ki tonm anba latab zot met.”
28Alor Zezi ti reponn li, “Fanm, ou lafwa i gran! Ou dezir i ava ganny akonpli!”
Dan sa moman menm, son fiy ti geri.
Zezi I Geri Bokou Malad
29Zezi ti kit sa landrwa e i ti al dan bor lanmer Galile. I ti mont lo en montanny kot i ti asize. 30En kantite dimoun ti vin kot li. Zot ti anmenn bann dimoun bwete, envalid, aveg, kozpa e en kantite lezot malad. Zot ti depoz bann malad devan Zezi; i ti geri zot. 31Dimoun ti etonnen kan zot ti war sa bann kozpa koze, bann dimoun bwete marse, bann envalid vin byen, e bann aveg war kler. Zot tou, zot ti loue Bondye Izrael.
Zezi I Nouri Kat Mil Zonm
(Mrk 8.1-10)
32Zezi ti apel son bann disip. I ti dir zot, “Sa lafoul i fer mwan pitye: Zot avek mwan depi trwa zour e zot napa nanryen pour manze. Mon pa kapab fer zot ale, vant vid; zot kapab tonm feb dan semen.”
33Bann disip ti demann li:
“Kote nou pou ganny dipen dan sa dezer pour nouri sa kantite dimoun?”
34Zezi ti demann zot, “Konbyen dipen zot annan?”
Zot ti reponn, “Set dipen ek detrwa pti pwason.”
35Alor, Zezi ti ordonn lafoul pour asiz ater. 36I ti pran sa set dipen ek sa bann pwason; i ti remersye Bondye. I ti kas an morso e donn bann disip, ki ti partaz avek lafoul. 37Tou dimoun ti manze e zot ti rasazye. Apre, bann disip ti ranmas set pannyen plen avek bann morso ki ti reste. 38Ti annan 4,000 zonm ki ti'n manze, san kont bann fanm ek bann zanfan.
39Apre ki i ti'n ranvoy lafoul, Zezi ti mont dan en kannot e al dan rezyon Magadan#15.39 Magdala dan serten ansyen maniskri..
Labib An Kreol Seselwa © Seychelles Bible Society, 2013.