Levitik 3
3
Sakrifis Lape
1Si en dimoun i ofer en sakrifis lape, i ava ofer en zannimo ki sorti dan son troupo bef. I ava ofer SENYER en mal oubyen en femel ki san defo. 2I ava poz son lanmen lo latet sa zannimo e i ava egorz li devan Latant Rankont. Bann pret, bann garson Aaron, ava asperz disan otour lotel. 3Pour sa sakrifis lape, i ava ofer en lofrann brile dan dife devan SENYER: Lagres ki kouver trip ek tou lagres ki lo trip, 4son de ronnyon avek lagres ki anvlop zot, sa ki kouver son kote, ek bann morso ki avek lefwa, ava ganny detase ansanm avek bann ronnyon. 5Bann garson Aaron ava bril sa bann morso lo lotel ansanm avek sakrifis konplet ki'n ganny plase lo dibwa ki pe brile. Sa i ava en sakrifis brile par dife ki anvoy en loder ki fer plezir SENYER.
6Si en dimoun i ofer koman sakrifis lape en zannimo sorti dan son troupo mouton oubyen kabri, i ava pran en mal oubyen en femel ki san okenn defo. 7Si i ofer en zenn mouton, i ava prezant li devan SENYER. 8I ava poz son lanmen lo latet sa zannimo; i ava egorz li devan lantre Latant Rankont, e bann garson Aaron ava asperz son disan otour lotel. 9Pour sa sakrifis lape, i ava ofer koman sakrifis brile devan SENYER, tou lagres, son lake antye depi kot son kolonn vertebral, lagres ki kouver trip ek tou lagres ki anvlop trip, 10son de ronnyon avek lagres ki anvlop zot, sa ki dan son kote ek son bann morso lefwa e ki detas ansanm avek bann ronnyon. 11En pret ava bril sa bann morso lo lotel. Sa i ava en nouritir, brile pour SENYER.
12Si en dimoun i ofer en kabri, i ava prezant li devan SENYER. 13I ava poz son lanmen lo latet sa zannimo, egorz li devan Latant Rankont, e bann garson Aaron ava asperz disan otour lotel. 14Pour sa sakrifis, i ava ofer koman sakrifis brile devan SENYER: Tou lagres ki kouver trip ek tou lagres ki anvlop trip, 15son de ronnyon avek lagres ki kouver zot, sa ki dan son kote, ek son bann morso lefwa, ki i ava detas ansanm avek bann ronnyon. 16En pret ava bril sa bann morso lo lotel koman en lofrann brile par dife, ki anvoy en loder ki fer plezir. Tou lagres i ganny rezerve pour SENYER. 17Zot pa devre manz ni lagres, ni disan. Sa i en lalwa pour touzour, pour tou zot bann zenerasyon, partou dan nenport landrwa kot zot ava reste.
Labib An Kreol Seselwa © Seychelles Bible Society, 2013.