Levitik 2
2
Lofrann Vezetal
1Si en dimoun i oule ofer SENYER en lofrann vezetal, i ava ofer son meyer lafarin. I ava vers delwil e met lansan lo la. 2I ava anmenn sa lofrann kot bann pret, bann garson Aaron. En pret ava pran en ponnyen sa lafarin melanze avek delwil ek lansan, e bril lo lotel koman sa porsyon rezerve pour SENYER. Sa i en lofrann brile dan dife, ki anvoy en loder ki fer plezir SENYER. 3Sa ki reste dan sa lofrann vezetal, ava vin pour Aaron ek son bann garson. I en porsyon tre sakre sa sakrifis ki'n ganny brile dan dife pour SENYER.
4Si ou ofer en lofrann vezetal kwi dan four, i devre en gato fer avek lafarin meyer kalite, san lelven, petri avek delwil, ek en galet san lelven, aroze avek delwil.
5Si ou ofer en lofrann vezetal kwi lo plak, i devre ganny fer avek lafarin meyer kalite, san lelven, petri avek delwil. 6Ou ava kas li an morso e vers delwil lo la; sa i en lofrann vezetal.
7Si ou ofer en lofrann vezetal ki'n ganny kwi dan en pwalon, i devre ganny fer avek lafarin meyer kalite ek delwil. 8La koman ou devre anmenn en lofrann vezetal pour SENYER: Ou ava anmenn sa lofrann kot pret ki ava prezant li devan lotel. 9Sa pret ava pran en porsyon sa sakrifis rezerve pour SENYER e bril li lo lotel. Sa i ava en sakrifis brile dan dife, ki anvoy en loder ki fer plezir SENYER. 10Sa ki reste dan sa lofrann ava vin pour Aaron ek son bann garson. I en porsyon tre sakre sa lofrann ki'n ganny brile dan dife pour SENYER.
11Tou lofrann vezetal ki ganny ofer devan SENYER pa devre annan lelven. Ou pa devre servi ni lelven, ni dimyel dan sakrifis brile pour SENYER. 12Ou kapab ofer SENYER lofrann premye fri, me fodre pa bril li lo lotel pour li donn en loder ki fer plezir. 13Ou ava azout en pe disel dan tou lofrann vezetal ki ou ofer SENYER. Pa zanmen oubliy disel dan lofrann, akoz i reprezant lalyans ki Bondye in fer avek ou. Alor, avek tou lofrann ou devre azout disel.
14Kan ou ofer SENYER en lofrann bann premye prodwi ou propriyete, ou ava ofer legren ki ou'n kraze, sorti dan zepi ki ou'n griye dan dife. 15Ou ava azout delwil e met lansan lo la. Sa i en lofrann vezetal. 16En pret ava bril en parti sa legren kraze avek delwil ek lansan. Sa i en lofrann brile dan dife pour SENYER.
Labib An Kreol Seselwa © Seychelles Bible Society, 2013.