Egzod 9
9
Senkyenm Fleo: Lepidemi dan Troupo
1SENYER ti dir Moiz: Al kot Faraon e dir li: La sa ki SENYER, Bondye bann Ebre i deklare: Les mon pep ale pour zot servi mwan. 2Si ou refize les zot ale, si ou gard zot ankor, 3SENYER pou poz son lanmen lo ou troupo ki dan lakanpanny, lo ou bef, ou seval, ou bourik, ou samo. 4Me SENYER pou fer en distenksyon ant troupo bann Izraelit ek troupo bann Ezipsyen. Napa en sel zannimo bann Izraelit ki pou mor. 5SENYER in fikse en letan: Demen, mon pou azir lo pei antye.
6Lannmen, SENYER ti fer arive sa ki i ti'n dir: Tou troupo bann Ezipsyen ti mor, me dan troupo bann Izraelit, ti napa en sel zannimo ki ti mor. 7Faraon ti fer verifye: Dan troupo bann Izraelit pa ti annan en sel zannimo mor. Malgre sa, leker Faraon ti reste andirsi e i pa ti les pep Izrael ale.
Sizyenm Fleo: Boubou Enkirab
8SENYER ti dir Moiz ek Aaron: Pran detrwa ponnyen lasann dan four; Moiz ava anvoy dan ler devan lizye Faraon. 9Lasann pou vin lapousyer ki pou kouver Lezip; i pou anmenn boubou enfekte lo dimoun e lo zannimo dan Lezip antye.
10Alor, zot ti pran lasann dan four e prezant zot devan Faraon; Moiz ti anvoy sa lasann dan lezer e bann boubou enfekte ti leve lo dimoun e lo bann zannimo. 11Bann mazisyen ti nepli kapab debout devan Moiz, akoz bann boubou. Annefe, sa bann boubou pa ti zis lo bann mazisyen, me osi partou lo lezot Ezipsyen. 12SENYER ti andirsi leker Faraon ki pa ti ekout zot, parey SENYER ti'n dir Moiz.
Setyenm Fleo: Gro Lagrel
13SENYER ti dir Moiz: Leve granmaten, e prezant ou devan Faraon. Dir li: La sa ki SENYER, Bondye bann Ebre i deklare: Les mon pep ale pour zot al servi mwan. 14Safwasi, mon pou anvoy tou kalite fleo lo ou, lo ou bann serviter e lo ou pep, pour ki ou ava konnen ki lo later antye, napa enn parey mwan. 15Aprezan, si mon ti'n lev mon lanmen kont ou, e si mon ti'n anvoy lepidemi, ou ti ava'n fini disparet lo later. 16Me si mon'n les ou viv, se pour montre ou mon pouvwar e fer mon non ganny konnen partou lo later. 17Ou ankor pe met lobstak kont mon pep e refize les zot ale. 18Demen sa menm ler, mon pou anvoy en lapli lagrel terib: En lagrel ki zanmen in deza tonbe lo Lezip depi son fondasyon ziska ozordi. 19Aprezan, fer met an sekirite tou ou troupo e tou sa ki ou annan dan lakanpanny; lagrel pou tonm lo tou dimoun ek tou zannimo ki deor dan lakanpanny e ki pa'n ganny anmennen dan bann landrwa kouver e zot pou mor.
20Bann dimoun dan lantouraz Faraon ki ti annan respe pour parol SENYER ti fer met zot bann serviter ek zot troupo an sekirite dan lakaz. 21Me bann ki pa ti port atansyon parol SENYER, ti les zot lesklav ek zot troupo deor dan lakanpanny.
22SENYER ti dir Moiz, “Lev ou lanmen ver lesyel pour ki lagrel i tonm partou dan Lezip, lo tou dimoun, zannimo ek plant.”
23Moiz ti lev son baton ver lesyel e SENYER ti anvoy loraz, lagrel ek dife lo later. SENYER ti fer en lapli lagrel tonbe lo Lezip. 24Lagrel, melanze avek dife ti tonbe; sa ti pli terib ki'n deza tonbe dan Lezip antye, depi ki sa nasyon i egziste. 25Lagrel ti afekte tou keksoz ki ti dan lakanpanny, dimoun koman zannimo, partou dan Lezip. Lagrel ti afekte osi zerb e kas tou pye dibwa dan lakanpanny. 26Zis dan teritwar Gosenn kot pep Izrael ti reste, ki lagrel pa ti tonbe.
27Faraon ti fer apel Moiz ek Aaron. I ti dir zot, “Mon'n fer pese safwasi; SENYER ki zis; mwan avek mon pep, nou an tor. 28Sipliy SENYER pour ki i fer arete loraz ek lagrel. Mon pou les zot ale; nou pa pou gard zot pli lontan.”
29Moiz ti dir li, “Ler mon pou kit lavil, mon pou lev mon lanmen ver SENYER. Tapaz loraz pou arete e pou nepli annan lagrel. Konmsa, ou ava konnen ki later i pour SENYER. 30Me mon konnen ki ou ek ou bann serviter, zot pa pou annan ankor respe pour SENYER Bondye.”
31Bann plantasyon len avek lorz ti ganny detri. Lorz ti ankor dan zepi e len ti ankor an fler. 32Me bann sereal koman dible pa ti gate akoz zot pare plitar.
33Alor, Moiz ti sorti kot Faraon dan lavil. I ti lev son lanmen ver SENYER e loraz ek lagrel ti arete. Lapli osi ti arete. 34Me kan Faraon ti war ki lapli, lagrel, ek loraz ti'n arete, i ti fer menm fot ankor. Son leker ek leker son bann serviter ti andirsi ankor.
35Alor, leker Faraon ti reste andirsi e parey SENYER ti'n dir par lentermedyer Moiz, i pa ti les pep Izrael ale.
Currently Selected:
Egzod 9: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
