MALAKI 3
3
1 #
Mat 11.10; Mrk 1.2; Luk 1.76; 7.27 Akohba Abüdongba-nü lalingre, “I lang rungnümnung Ihnü I yusi hirü müthehnung. Hütsüde nührünü yingba Abüdongba dhrongyengnü Abi amübükuh la ronung. Nührünü nahmürahba yusi hirü ronung ko I azengtacho sobhonung.”
2 #
Joel 2.11; Mis 6.17 Ta Abi roba nyümong sünü rangchonung? Abi rode sünü yachehnung? Abi idhse tahchehba michang kyo apho atsa kyo linung. 3Abi taripi mülurü ko müdhsengchehrü kyo yukhanung ronung. Idhse nguchirünü taripi ko hon müdhsengchehcho kyo, Abüdongba yusi hirünü bebürüti müsachehjünung, ko arühnü Abüdongba khyang athsalang amübü jünung. 4Hütsüde Judarü ko Jerusalemrünü papade hiroba roh-i amübü tsü Abüdongba-nü khyüchochehba thsanung.
5Akohbong Abüdongba-nü yore, “Nührü yukhanung Ih ronung, ko Ihnü amongrü, nahtranahxengrü, arahkheh yuzi jürü, shehsherü amii kihyochürü, chomilarü, mürürü ko shuparü nyüpmüsehrü, ko I jengreng müdrürü atümung nyüm Ihnü mülangjünung.
Dhüre Nohlüm Jüba
6“Ih Abüdongba, ko Ih mümülichire. Hütsüeko, nührü Jakob trah sehseh lü müchang. 7Nührü jümürü kyo, nührü I yuzeng lanü ximüla tsiko ko mübichi. Ih yang thali rung, ko Ih nührü yang thalinung. Ta nührünü tsingdhingre, ‘Nü yanglang thali ronung ihrünü tu nguchinung?’ 8Ihnü nührü te tsingdhingre, Nyüh khüdunü Tsingrangba chahnü kengchonung athsalang do? Mah, ta nührünü I chahnü kengchore, ‘Khütapü?’ Ko nührünü yore. Dhüre nohlüm ko amübüla. 9Nührü atümung chokehcholako, tunüo yucho apümnü I chahnü kengchoko. 10#Lev 27.30; Khi 18.21-24; Azk 12.6; 14.22-29; Neh 13.12Amübükuh la tsuyongnung kükyo linungthsa, nührü dhüre nohlüm ajeng hirung. Akohbong Abüdongba-nü yore, Ih thsadsüdhing, Ihnü ninglang kukhang khangthrupü amüwa thangchi jo a müjünang. 11Ihnü nührü tsahma kangzahnü müthsangnyangsohnung ko shükusishü mütsenglüp sihsohnung. 12Hütsüde lihküprünü nührü te akünyang pü dsinung, tunüo nührü lih tsü alinung atsa thsanung.
Tsingrangba-nü Yanglilümnung Nyengchocho
13“Abüdongba-nü yore, “Nührünü Ih nyümra choko. Ta nührünü tsingdhingrü, ‘Ihrünü nüh nyüm tu chocho?’ 14Nührünü yocho, ‘Ih Tsingrangba dikehnung müdhsütah. Abinü yocho nguchinung mahkhang ihrü thsamehcho nengdang mülang pehjüng pü ngusohnung tu dhsütahro? 15Ihsanü ngucho roh-i amüthseh nyitsarü künyang lire. Amütsarü tsü amüwa ngurü du mah, ta arüh nguchi amütsanü Tsingrangba thsadsüre, ta tu müthsare.’”
16Hütsüde Abüdongba drürünü arüh-e arührü chotare, ko arüh chotacho Tsingrangba-nü nyire ko yuchire. Abi bete Abüdongba drürü ko jengreng jürü lümkehba vakha khüdula arüh neng thrahyohcho. 17Abüdongba-nü yore “Arüh I nyitsarü thsanung.” “Ihnü nguchi nyümong arüh Ipu yo thsanung. Aunü abi dikehba atsudhre müicho roh-i Ihnü arüh müinung. 18Hütsüde anyüpili, amüsarü ko amünyirü kahla, I dikehrü ko Ih müdikehrü kahla tu tikehnang I nyitsarütinü ngunung.”
Currently Selected:
MALAKI 3: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.