MALAKI 2
2
1Akohbong Abüdongba-nü bebürüti te yore, “Yuzeng hi nührü nengdang: 2Nührü nguchinü Ih dhiching. Ihnü yocho mühnyikhang, nü chah chokehcholanung. Nührü akang linung khyübülungcho chah Ihnü chokehcholanung. Nührünü yuzeng khükhah mübichichonü nührü chokehcholapehko. 3Ihnü nührü tsurü khingchinung ko nührünü kangmübü jücho kanglungrü chühnü nührü romih la münohjünung, ko nührü I tenü khyümüinung. 4Hütsüde yuzeng hi Ihnü nührü khyang jüchoepü müdhenung, hütsü khu Levi trah bebürüti te azengtacho müthsangnyangnung.#Khi 3.11-13
5“I azengchotachola akang ko tsayeng linung Ihnü nyengchocho, ko arühnü I jengreng drünung nengdang Ihnü hi arüh khyang jücho. Amüdilü arühnü I jengreng drücho.#Khi 25.12 6Arahkheh mah, arühnü tu yuje hütsü docho. Arüh Ite kehta licho; arühnü athsalang du tsü nguchicho mah, ta aparüsü amünyi nguchinung lanü yaticho. 7Tsingrangba yuje lümlong donung tsü bebürü nguchi. I lümcho nyichonung nyitsarünü arüh yang wüng, tunüo arüh Akohbong Abüdongba yusi hirü.
8“Ta ade nührü bebürütinü yujeba lang lanü za tsiko. Nührü adobanü azengtacho thsangnyangko. 9Hütsünü Ihnü nührü Israelrü khyang münyüjüsohnung, tunüo nührünü I lümcho mükhyü ko nührünü I müyurü te dode, nührünü phülari mübichi.”
Nyitsarünü Yuje Müchocho
10Ihsa apüm au khüdu mahrü do? Tsingrang khüdunü Ihsa mükülüpcho do? Khang tuepü Ihsa kahla azengtacho müyohpüro, ko Ihsa jümürü te Tsingrangba-nü azengtacho mükhimünguro? 11Judarünü azengtacho thsangnyangpü Jerusalem ko yucho apüm la adrünung nguchi nguchiko. Abüdongba-nü müiba amübükuh arühnü münyijüko. Adhrerünü yangpirü tsingrang mübürü khingkurü khyüko. 12Hiri nguchirüti Israel hung lanü Abüdongba-nü pehnung, ko khodesü ihrü yuchonü Abüdongba khyang mübübala müzehsohnung.
13Adesü nührünü hi nguchire. Nührü nahshükih, tracho ko metrachonü Abüdongba bholu tingtisohre, tunüo nührü amübü abinü adelü mükhyüchore. 14Tuepü abinü adelü nührü mükhyüchorünang tsingdhing. Tunüo nüh dhrezade khyüba nitpü te anyengchocho nühnü thsangnyangcho abinü müdhele. Abükyü tsü nü dhrelarü ko nühnü abükyü te yuje cho linung Tsingrangba jingte nühnü nyengchonye, nühnü nyengchocho thsangnyangko. 15Tsingrangba-nü nüh abükyü te afü ko anbü khüdu mükangsohcho do? Hila abi lümcho tuo? Hütsü Tsingrangba tsurükhung sihchosohnung nengdang. Hütsüeko nührü sünüsü nitpürü te nyengchocho tüthsangnyang. 16Israel Tsingrang Abüdongba-nü yore, “Ihnü kukhi zacho thrünyire.” “Nührü nitpürü te hiroh-i mütsa nguchicho Ihnü thrünyire. Nührü nitpürü te yuje chonung nyengchocho tüthsangnyang.”
Yukhaba Nyümong Amünyeh
17Nührü yunü Abüdongba müthohsohko. Ta nührünü yore, “Ihrünü khüta müthohsohcho?” “Abüdongbanü amütsarü atümung atsaepü lümrepü yochonü; Yuje abinü arüh khyünyüre.” Mahkhang “Yuje choba Tsingrangba tsü khülo, pü tsingdhingre!”
Currently Selected:
MALAKI 2: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.