ROMMAI 9
9
Ramai ea Puh Maitao
1Khrista hinou Enou acheche nasü paowe, Ewo damoe, Rako Mashi hinou, Avei lekhe tsü nanou Eye koa zhopaoh peiwe, 2süolouzü Alethou hi pfüpailou hoyu veayu ea thaokhaimoa souyu sou bue, 3daiolouzü vasou thaifüa Atarai souyu, Athaihou jürai maitao donou lah Ehai Ramai cha ngaoa, Khrista hinou soukupa khaiyu Enou daizhou züpasa. 4Puletao hai Ramai vei maitaoe; puhnou puletaoye puh nahpoutu maitao soupeire ea puletao hisü puhvei khouko ava nasü ngaopeie, puhnou puletaoye koa Vo nasü souloue ea puletao hi razhai nasü peie; puletao hi cheche rathoyu nasü bue; puletao nou Ramai vei apaopeiyu nasü ngaoloure; 5puletao hai zhih tashoyu Ebria puo-paomaitao hilonou ve; alia Khrista hai emai ali soua puletao vei tahrüh hinou ve. Ha teitei pei hi khoa buyu Ramai puhye teisanou paosholou khaio! Amen.
6Ramai vei apaopeiyu nahai vetemore tea Enou paomoe; daiolouzü Israelmai hrülainou Ramai vei maikhaimoe. 7Moa Abraham tyaonah hrülai sü Ramai nah khaimoe. Ramai nou Abraham hi paoe, “Enou nehi apaopei khaitouyu tyaonah taosü nenou Isak vanou ngaoloulai.” 8Süvei kowo louzü Ramai nahtao hai vasou vei nahmaitao moe, ana Ramai nou apaopeiyu thaifüa nalouyu puletaoye nou chekhaoyu tyaonah maitao tea pobaie. 9Daiolouzü Ramai vei apaopeiyu chipao sünanou haibüa paoe, “Kao-züyu teile hinou Esü khaivelai, alia Sarah nou nahpoutu mai ali ngaolai.”
10Alia hai likheibai mohie. Daiolouzü Rebeka nahpoutu ahai-a puo alikhei baie, puhsü Eh puopao Isak süe. 11Alia nah sühaiye namo jühinou ea veiyu, shiyu touyu hatalia soumo jühinou, vah vanou moa ana Ramai nou kulouyu vanou Puhnou dopayu vei lichoyu süsü thaokhaimoa takoure donou, 12haikua Ramai nou Rebeka hi paoe, “Tsü nanou nana kuvah soulai.” 13Haisü haibüa rüthouyu kue, “Enou Jakob ye leshie, ana Esau ye Enou ngaorawe.”
14Sükulouzü Eletao nou Ramai hai chechemoe tea paolaiwu? Süsü movuzüe. 15Daiolouzü puhnou Moses hi paoe, “Enou zhuveapei nüyu puh hisü Enou zhuvea peilai; Enou leshipei nüyu puh hisü Enou leshi peilai.” 16Südonou ha teitei sü emai züpa mo-a emai nou souyu pei bumoe, ana Ramai vei zhuvea pei hi bubaie. 17Daiolouzü sheeyu larübvü nou Pharaoh hi paowe, “Nenou Akhouko pongaore donou ea deiphao teitei hi Azhih hai paongao peire donou Enou neye panou veo souloue.” 18Südonou Ramai nou zhuveapei nüyu maitali hisü puhnou zhuvea peie, alia puhnou le soukhoupei nüyu maitali hisü puhnou le soukhou peiwe.
Ramai vei Lekha ea Zhuvea
19Ana neletao hronou kamainou Ahi paolai, “Haibüyu thaisü Ramai nou kakua maitali vei mah phoupa loulai? Ramai vei leli nasü thaohnou nulousüe?” 20Ana Asawo, Ramaiye chi veiva-a buyu ne sü thaohwe? Nailee alinou sünaye soupeiyu pao nahi, “Daidonou nenou Eye haikuyu zhai hinou soupeiwe?” tea chi nou tamoe. 21Lee souyu pao nanou puh züpa thaifüa naike ali vanou lee ahai souloua lee alinou khonühki seire donou ea kukhe alinanou teisa seire donou souyu hai puhvei zü hawu?
22Alia Ramai nou soukhai touyu hia sükheihao-a chekhaobaie. Puhnou puhvei lekhasü pongao nüwe ea puhvei khouko sü panou sülou nüwe. Ana souhare donou likhei soukhai touyu puhvei lekha vei leetaoye sü puhnou alaosou shamea-a khopeie. 23Alia puhvei khouko ava ngaoloure donou soudapei khaitouyu süolouzü puhvei zhuvea lee Eletao pei hi lakou thoupei khaitouyu puhvei alao souyu khouko ava nasü puhnou panou pongaoyu sü züpae. 24Daiolouzü puhnou kulouyu Eletao hai Jihudimai hrohinou likhei baimoe ana tahrüh kukhemai hrohinou-a kuloue. 25Hosea vei larübvü hinou haibüa puhnou paoe:
“Amai moyu maitaoye nou ‘Amaitao’ tea Enou kulai.
Enou leshimoyu tahrühyenou ‘Aleshipai’ tea Enou kulai.
26Alia puletao hi ‘Neletao Amai moe,’
tea paoyu buh süna hinou puletaoye sü hriyu Ramai vei nahpoutu maitao tea kuloulai.”
27Alia Isaiah nou Israel mai vanou haibüa shapae: “Israel maitao hai pouthou zaihi vünai zhoukhaia, puletao daotu likhei khailulou bailai; 28daiolouzü Mapaowo nou thala-a deiphao hainaye koa puhvei palouchi teitei sü kuchelai.” 29Alia haisü Isaiah nou raia paopayu kue, “Khoukhoulai Mapaowo nou Eletao hi tyaonahmai shodai peimore toulouzü, Eletao sü Sodom bübailai ea Gomorrah büa soupeiwu bailai.”
Israel mai donou Paul nou Veachi Paoyu
30Südonou Ehnou paowe süolouzü Ramaiye koa souzü loure phoumoyu tahrüh kukhemai taosü lü vanou puhye koa souzü loure. 31Ana Ramaiye koa souzü loure razhaiye phouta-a buyu Israel maitaowo louzü süsü ngaolou more. 32Daidonou ngaolou moe? Daiolouzü puletao nou süsü lü vanou phoumoa puletao nou sou-pfüyu vah sünaye lüa phouyu donoue. Alia südonou puletao hai “Phisü loure chuh” süna vanou phisü loure. 33Haisü haibüa rüthouyu kue,
“Zhukhaio, maikhe maiye panou phisü loure chuh,
puletaoye soukaore chuhdu ali Enou Zion hi pokhai khaitoue.
Ana puhye loucheyu mai taliye sü panou ahrao ngaolaimoe.”
Currently Selected:
ROMMAI 9: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
