ROMMAI 8

Rako hilovei Ahrü

1Südonou chuo Khrista Jisu hinou hrüa buyu maitao donou mah dukhaiyu hare. 2Daiolouzü Khrista Jisu hinou ahri Rakovei razhai nanou Eye sü mah ea athaivei razhaina hinou do soupeire. 3Emai kezhenou lelou hoyu vanou razhainou soulou hoyu nasü Ramai nou souloure. Puhnou lah puhnah poutuye seikou peiwu-a mahye souhare donou mahmai zhaido hinou panou veloua mahye sü kezhe hinou mah dukhaire. 4Haisü kezhe zhaido thaifümoa Rako thaifüa hrüyu Eletao hinou razhainou cheche-a khoyu sü ngaochekhou loure donou Ramai nou souwure. 5Kezhe züpa thaifüa hrüyu puletao nou puletao vei tsü hai kezhe züpa hi pokhaitei khaitoua bue, Rako züpa thaifüa hrüyu puletao nou puletao vei tsü hai rako züpa hi pokhaitei khaitoua bue. 6Kezhe züpaye panou tukha-a sahrüyu sünanou athai povewe; Rako züpaye panou tukha-a sahrüyu sünanou ahri ea kaonayu povewe; 7Daiolouzü kezhe züpa thaifüa choyu sünanou Ramaiye motouwe; sünasü Ramai vei razhai khakhe hi bumoe, acheche nou sünanou bua bulouhoe. 8Südonou kezhe züpa thaifüa hrüyu mainou Ramai züpa sousha louhoe.

9Ana Ramai Rakonou neletao lekhe hi cheche-a bue toulouzü, neletao hai kezhe hi bukhai more anou Rako hi buloure. Khrista vei Rako hayu maita lisü puhvei moe. 10Ana Khrista hai neletao hi bue toulouzü, neletao pfüphao hai mah vanou thaikhaia neletao rako hai achechena vanou hriwe. 11Jisu ye athai hinou souhrishu peiyu Ramai vei Rakonou neletao hi bue toulouzü, süthaisü Khristaye athai hinou souhrishu peiyu puhnou neletao hi buyu puhvei Rako vanou thailouvei neletao pfüphao hisü ahri peilai.

12Südonou Athaihou jürai khemai, Eletao nou soumo shilaiyu vah bue, ana süsü Eletao vei kezhe züpa thaifüa hrüre sünamoe. 13Daiolouzü neletao nou neletao vei kezhe züpa thaifüa hrülouzü, neletao sü thailai; ana Rako vanou neletao vei mah vah taosü neletao nou southeawu louzü, neletao sü hrilai. 14Daiolouzü Ramai Rakonou süthaipeia buyu maitao sü Ramai nahpoututaoe. 15Daiolouzü Ramai nou neletao hi peikhai touyu Rako sünanou neletaoye panou qila soutamoe ea neletaoye panou pimoe. Süjüwo Rako sünanou neletaoye panou Ramai nahtao souloue, alia Rako sünavei khouko hinou Eletao nou Ramai hi, “Puo! Apuo!” tea shapae. 16Ramai Rako puh lahnou Eletao rakoye koa lou Eletao hai Ramai nahtaoe touyu sü zhopaoh souwe. 17Eletao hai puh nahmaitao baiyu donou puhnou puh maitao donou khaidakhai touyu hatao sü Eletao nou ngaolai, alia Ramai nou Khristaye donou khaidapei khaitouyu süna-a Eletao nou puhye koa ngaozholai; daiolouzü Eletao nou Khrista vei veahoyu sü koa zha ngaozho louzü, Eletao nou puh khouko avana-a koa zha ngaozholai.

Thaikhai vei Khouko Ava

18Enou chowe süolouzü chu teile haina hi Eletao nou veahoyu haina hai Eletao hi ngaopei laiyu vere khouko ava sünaye hakia paokha louhoe. 19Soukhai touyu basha teiteinou Ramai hinou zhishopoa puhnah poutu maitaoye ngaopeire sü khoa bue. 20Daiolouzü soukhai touyu bashaye sü hako khakhehi panou hrüloure, süsü lah süna vei züpa hinou moe, ana sübüa soure sü Ramai vei leli nasüe. Sütoukhaia sühisü areih bue. 21Süolouzü lah basha puhye-a teitheli hisü raitayu vei qila soutayu hinou do soupei vuzülai ea Ramai nahtao vei do soulouyu dusho sünasü koa zha ngaozho vuzülai. 22Daiolouzü chu koute hai soukhai touyu basha hai nah nareki khya souyu sou sübüa soua le-a bue touyu sü Eletao nou süwe. 23Alia soukhai touyu basha likheinou baimoe, ana Rako vei raikaiyu shithou ngaolouyu lah Eletao-a Eletaoye Ramai nahtao soupei loure ea Eletao vei pfüphao teiteiye do soupei loure khoa bua Eletao lekhe hinou le-a bue. 24Daiolouzü areih nanou Eletaoye khailuloue; ana areih sünaye Eletao nou ngaowe toulouzü, süthaisü süsü areih achechena more. Daiolouzü ngaoa buyu hatali donou thaohnou rei-a bulai? 25Ana ngaomoyu süna donou Eletao nou rei-a bulouzü, Eletao nou sünaye shamea-a khowe.

26Süzhaibüa Eletao nou lelouhoyu ki Rakonou Eletaoye soukha peiwe; daiolouzü kabüa veachi paozüwe touyu sü Eletao nou sümoe; Rako lahnou chipaonou paopalou hoyu lanou le-a Eletaoye donou Ramai hinou khowe. 27Alia Eletao lekhe koute zhingao-a buyu Ramai nou Rako vei tsü nasü süwe; daiolouzü Rakonou Ramai vei maitao süh soua ea Ramai leli thaifüa puh hinou khowe.

28Eletao nou süwe süolouzü ha teitei hinou Ramaiye leshiyu puletaoye donou süolouzü puhvei leli thaifüa kulouyu puletao hisü Ramai nou avei donou vah soubaie. 29Ramai nou raia sülouyu puletaoye sü puhnah poutuye raibüyu zhu nasü-a koa panou zha ngaozhore donou puhnou raia do-a dochere. Sübüa Nahpoutu naye panou thaihou jüraimai alao hrohinou raikaina soulai. 30Alia sübüa Ramai nou docheyu maitaoye sü puhnou kua kuloue; alia puhnou kulouyu maitaoye sü lah puhye koa souzüpeie; alia puhnou puhvei khouko ava nasü puletaoye koa zha ngaozhoe.

Khrista Jisu hinou Ramai Leshi

31Süthaisü, haitao teitei zhuloua, Eletao nou dai paolai? Ramai hai Eletao donoue toulouzü, thaohnou Eletaoye duloulai? 32Lah puhnah poutuye-a phapei moa Eletao hrülai donou puhye thoupeiyu puhnou puhnah poutuye koa Eletao hi ha teitei sa-a peilai mowu? 33Ramai nou dolouyu maitao pei hi sü thaohnou mah dukalai? Lah Ramai puhnou puletaoye sü mah hae tea paopare! 34Sübüyu thaisü, thaohnou puletao hi mah dukhailai? Khrista nou laiwu? Moe! Daiolouzü puhwo thailoua hrishu loure ea Ramai bah zhoulo vanou bua Eletaoye donou Eletao süh soua khoa bue! 35Sükuyu thaisü Eletaoye Khrista vei leshina hinou thaohnou soukupa khaipei lousüe? Souvea souchoyu nou laiwu moa veahoyu nou laiwu? Moa souvea souhoyu nou molouzü tokaayu nou laiwu? Moa baitouyu nou laiwu molouzü ha kayu moa khochenou laiwu? 36Haisü haibüa rüthouyu kue,

“Neye donou Ehye teithe tsünou southeawe;

datheare zhaotutao kua Ehye chopeire.”

37Moe, haitao teitei hinou Eletaowo Ehye leshi peiyu puh vanou reih koloumai jünou kouhie! 38Daiolouzü Enou süvuzüe süolouzü hatalinoua Eletaoye puh leshi hinou soukupa peilou hoe: athainou-a, ahrinou-a, rakivamainou-a, meizai pei hi khouko teiteinou-a, chuchuvei nataonou-a, vere nataonou-a, 39akuhi buyu deiphao nou-a, naphi buyu deiphao nou-a moa soukhai touyu basha teitei talinou-a Eletaoye Eletao Mapao Khrista Jisu hi buyu Ramai vei leshi süna hinou soukupa peilou hoe.

Currently Selected:

ROMMAI 8: POUMBSI

Highlight

Copy