ROMMAI 6

Mah hinou Thaiyu ea Khrista hinou Hriyu

1Sükulouzü Ehnou dai paokhailai? Ramai zhuvea panou pukhe loure donou Eletao nou mah hinou hrüa bupu laiwu? 2Süsü movuzüe! Eletao sü mah hinou thaire, südonou kakua Eletao nou mah hinou hrüa bukhailai? 3Daiolouzü neletao nou süvuzüe süolouzü Eletaoye Jisu Khrista hinou puhye koa dzükhao dayu kisü Eletaoye sü puhvei athai hinou koa lou dzükhao dare. 4Südonou Eletao vei dzükhao dayu hinou Eletaoye sü puhye koa povure ea puhvei athai nasü koa zha ngaozho loure, sübüa Puovei dushoyu khoukonou Khristaye athai hinou sou hrishu peiyu kua, Eletao-a hrü ashuna hinou hrüloure donoue.

5Daiolouzü puhvei athai hinou Eletao nou puhye koa ali souloure toulouzü, veikhaimoa Eletao-a puhvei hrishuyu hinou puhye koa ali souloulai. 6Alia Eletao nou süwe süolouzü mah pfüphao vei khouko naye sü souhawu loure donou ea sübüa Eletao hai mah kilai soupukhai more donou Eletao vei hrü akuna hai Khristaye koa puh kros vanou datheare. 7Daiolouzü mai alinou thaiyu kisü, puh sü mah hinou do souloure. 8Eletao-a Khristaye koa thaiyu donou, Eletao hai puhye koa hrilai touyu sü louche. 9Daiolouzü Khrista hai athai hinou hrishu loure ea thaipu khai khailaimoe touyu sü Ehnou süwe. Athainou puh pei hisü tukha sahrüpu khailaimoe. 10Alia puhnou thaiwuyu donou, mah nanou puh pei hisü khouko hare; alia puhnou chu hria buyu sü, puhnou Ramaiye koa hrizhowe. 11Süzhaibüa, lah neletao hai mah hinou thaire ana Khrista Jisu vanou Ramaiye koa hriwe tea cholo.

12Südonou puletao nou neletao pfüphao züpa vei chi zümore donou mahye panou nelevei halouvei pfüphaoye tukha sahrüwuso. 13Moa neletao vei pfüphao zha tali hai ashi vah soure basei kua mah hi thoupeiwuso, ana athai hinou ahri hi popa peiyu puletao kua lah neletao hrümai hai Ramai hi peio, alia neletao vei pfüphao zhatao sü poa acheche vah souloure donou puh hi thoupeio. 14Daiolouzü mahye panou neletao vei paopu souwu laimoe, daiolouzü neletao hai razhai khehi bukhai more, ana Ramai zhuvea khehi bue.

Acheche vei Qilatao

15Sükulouzü dailai? Eletao mah soulaiwu, daiolouzü Eletaowo razhai khehi bumoa Ramai zhuvea khehi bubaiyu donou? Süsü movuzüe! 16Haisü neletao nou süvuzüe süolouzü lah neletao nou maitali qila soua puh chi züre donou thoupeiyu kisü, süolouzü athai hi süthou loure mah vei qila souho, molouzü acheche hi süthaipa peiloure paoyu züyu qila sousa, chechenou neletao sü neletao nou züa buyu paopu sünavei qila soutare. 17Ana Ramai kalo paowe! Daiolouzü teile lihi neletao hai mah qila soukhaia, neletao nou neletao hi peikhai touyu doupei zhai sünasü le teiteinou züloure. 18Südonou neletaoye mah hinou do soupeiwu-a panou acheche vei qila souloure. 19Haisü Enou emai zhai hinou paowe daiolouzü neletao vei kezhe hai lelouhoe. Teile lihi hai neletao nou neletao hrümai hai vahshi soure donou sheemoyu ea ashivei qila soua thoupeie. Süzhaibüa chuo neletao nou lah neletao hrümai hai sheeyu vah soure donou acheche vei qila kua thoupei vuzülai.

20Neletao nou mah qila soubu kisü, neletao sü achechenou tukha-a buyu hinou do soua bue. 21Neletao nou chu ahrao ngao-a buyu na sütao souyu hinou teile süki hisü dai zhiyu ngaoloue? Na sütaovei thousü athaibaie! 22Ana chuo neletaoye sü mah hinou do soupeire ea Ramai qila souloure. Neletao nou zhiyu süolouzü hrümai teiteinou Ramai hi popeiyu süsüe, alia süna thousü teisa ahri nasüe. 23Daiolouzü mah vei zhosü athai baie, ana Eh Mapao Jisu Khrista vanou Ramai vei sapeina hai teisa ahri baie.

Currently Selected:

ROMMAI 6: POUMBSI

Highlight

Copy