LOUTAO 94
94
Ha Veishi Pei hi Ramai nou Chiku-apeio Nasüe
1 Mapao, ne hai khüngu phou peiyu Ramai nasüe;
nevei lekha rarou nasü popa ngaopeio.
2Ne hai deiphao mai hrülai vei chiku-apeio nasüe;
tashuloua nou khaophu souyu maitaoye sü puletao nou ngaozü nasü peio.
3Mai ashi maitaoye panou teile kasho sava-a nou bukou laihie?
Teile kasho panou puletaoye bukou laihige, Mapao?
4Mahmo soua laiyu maitaoye sü panou teile kasho khaophu soua bulaige?
5Oh Mapaowo, puletao nou nevei maitaoye sü soushi khaipeiwe;
ae puletao nou nevei kikaa thaore maitaoye sü souvea souchoro peiwe.
6Puletao nou mimea maipfü ae rounahtou taoyesü southa peie,
ae Etao teidei hi ve buyu shetumaiye sü taitha datha peiwe.
7Puletao nou haibüa paoe, “Mapao nou Etaoye ngaolou hoe;
Israel maivei Ramai nou haisü sülou hoe.”
8Avei maitaore, neletao daisounou haizhou koute vowe?
Neletao dukinou tsü veipa laige?
9Ramai nou Etao vei noubei sü soupeie— puh sü choulou hovu?
Puhnou Etao nghithou soupeie— puhnou halia ngaolou horevu?
10Puhnou tyahrütaoye tuzü peiwe— puhnou puletaoye sü tudee peilou hodou?
Puhnou mai hrülaiye sü paodou peiwe— puh hi tsülia hazei baidou?
11 Mapao hai puletao nou tsü choyu nasü süwe;
puletao hai daizhou koute tsü chemosa touyu sü puhnou süwe.
12Oh Mapaowo, nenou paodou peiyu maitao,
ae nenou nevei chikha khesü doupeiyu maitao hai
daizhou koute savayu maisa!
13Mai ashi maitaoye donou deibvü heloumo koute nenou puletao sü veahoyu hinou sochao louyu sü peie.
14 Mapao nou puhvei maitaoye sü thaongai peilai moe;
puhnou puletaoye thaokhaia talai moe.
15Kaozü nasü chikuyu ki hisü dakhai veloulai,
ae acheche mai hrülai nou sünasü jüpa-a thaifü talai.
16Thaonou Eye donou mai ashi maiye dulaige?
Thaonou amü poa vah ashi souyu maitaoye dure donou la peilai?
17 Mapao nou Eye soukha peimoyu thaio,
Ewo louzü zei tea buyu teidei hisü tabai laire.#94.17 zei tea buyu teidei: Athai maivei deiphao (phoure 6.5 hi zhukhaio).
18Enou paoe, “Esü kaodu talaire;”
ana nevei tobai soumoa leshi peiyu sünou Eye soukha peie, Oh Mapaowo.
19Enou tsü tyatyali cho-a levea-a buyu phaki,
nenou Eye sousava peie.
20-21Shee moyu chiku apei maitao,
kaozü moyu khesü veiwe tea chikha soupeiyu maitao,
mai aveih maiye soushi peire donou do ashi phouyu maitao
ae mah hayu maiye southare donou chidei peiyu maitaoye koa neletao nou vah souzholou veiyu sü halia hae.
22Ana Mapao nou Eye vupa peie;
avei Ramai nou Eye kho peie.
23Puhnou puletaoye sü vah ashi souyu donou tudee peilai,
ae puletao nou mahmo souyu donou puletaoye sü souhawulai;
Etao Ramai Mapao nou puletaoye sü souhakhai bailai.
Currently Selected:
LOUTAO 94: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
