LOUTAO 7
7
Cheche Zü vanou Paoyu Veachi
1Oh Mapaowo, avei Ramai, Eye vupeio tea ne hi vewe;
athaihua laiyu maitao hinou Eye vupapeio alia khailupa peio,
2sübümo louzü khaosouveo büa puletao nou Eye poa ta-a bailai,
mai linoua Eye tave khailu peilou hoyu buh hi pota-a balai,
ae puletao nou Eye paidesa sawu bailai.
3-4Oh Mapaowo, a Ramai, Enou maitali hi soumahyu bulouzü,
Enou asamai aliye shodo souwu louzü,
moa hali donou-a moa ngaoba zhubamai hi azhaipou shiwu louzü,
haibüyu paitya ali koute-a Enou souwure touyuo—
5sübüyu thaio Eye ngaobayu maitaoye panou athai ngoutheo,
ae Eye nülou theo,
alia puletaoye panou Eye soukao theo,
alia ahri hayu thaiphao ali soua deiphao khaiwu theo!
6Lekha soupoa tashu peio, Oh Mapaowo!
Eye ngaobayu maitao vei lekha rarou nasü tashu dupeio;
lah ne kaishuloua Eye soukha peio!
kaozü nasü nenou jüpayu nasüe,
7südonou neye sühao-a buyu mai hrülaiye pove jülo,
alia ratei hinou puletaoye khosa-a hrüpeio.
8Mai hrülai vei chikure nasü ne-e.
avei jüpa hinou chiku peio, Oh Mapaowo;
E mah hae touyu sü nenou süwe.
9Newo acheche Ramai-e,
ae Etao tsüle alia jüpa pei hinou chiku peiwe.
Mai ashi maitao nou vahshi souyu khesü souha peio
ae mai aveih maiye buu peio.
10Ramai hai Eye vupa-apeio nasüe;
puhnou puh chi züyu maiye khailupa peie.
11Ramai hai checheyu hinou chiku-apeio nasüe,
ae ashi maiye teisa nou rarouwe.
12Puletao vei ahrü dalou molouzü,
Ramai nou puhvei khoche hei roulai.
Puhvei louka paipalai alia süsü souda-a bulai;
13puhnou puhvei thailou veiyu basei polashulai,
alia mei kei-a buyu puhvei louthou nou poshu teloulai.
14Zhukhaio, maishiyu mainou kabüa hashi khesü chopa louwe;
Puletao nou soubüre roloua la-luyu vah souwe.
15Ana maiye donou rüh southou khaitouyu rüh hisü lah puletaoye muloua bailai.
16Südonou lah puletao vei ashi nanou puletaoye tudee-a souvea peiwe,
ae lah puletao vei zhaipou shiyu nanou puletaoye zhipeiwe.
17 Mapao vei acheche na vanou Enou puhye kalo paowe;
Akukulai hi buyu Mapao hisü Enou lou soushowe.
Currently Selected:
LOUTAO 7: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
