LOUTAO 5
5
Vupeire donou Veachi Paoyu#HEBREW: David vei Lou.
1Avei chipaotao keinou peio, Oh Mapaowo;
alia Enou lichoyu khesü aetou peio.
2Enou ne hi soukha peio tea shayu avei paila sü keipeio,
avei Ramai ae avei Veo!
Enou ne hi veachi paowe, Oh Mapao;
3nenou shona-a avei veachi keipeie,
teinghi payu phakia Enou veachi#5.3 veachi; moa posheela. pao-a khoe,
alia nevei chila nasü Enou khoa bue.
4Newo vah ashi souyu hi jüpayu Ramai moe;
ne nghingao hi hashi ali-a nenou aetou moe.
5Khaophu souyu maitao hai ne nghingao hinou la-a buthoulou hoe;
mai ashimai hrülaiye nenou ngaorae.
6Dayu chi paoyu mai hrülai hai nenou souhawulai,
ae zhaipou shimai alia la-lu süyu maiye nenou ngaorae.
7Ana nevei dushoyu lesha vanou nevei ki hisü Enou tave loulou veie;
Nevei sheeyu Rathoki hinou ve Enou ratho louveie,
ae neye khuhao-a thora louveie.
8Oh Mapaowo, Eye zhuba ngaobayu mai alao bue!
Nevei leli soure donou Eye bo ngaopeio;
Eye panou nevei ludu hi taloure donou nevei ludu souzü peio.
9Puletao vei chipao hai louchelou veiyu hae,
puletao hai souha peire likhei jüpa-a bubaie.
Puletao vei raoqulu hai thaimai khü ali kheihaoe;
puletao mali hai maiye thao-a jüyu khaikho baie.
10Puletaoye nenou souha peio, Oh Ramai;
lah puletao vei ashi kheido hinou pa hakata theo.
Puletao vei mahtao donou ae puletao nou neye hraiyu vanou puletaoye ne nghingao hinou hulai peio.
11Ana neye lüa louche laimai hrülaiye panou salo;
puletaoye panou teisa sa-a lou soukhaio.
Neye leshi-a buyu maiye sü vupa peio;
daiolouzü ne hinou pa puletaoye sayu sü ngaolo.
12Ne chi züyu maiye nenou hapeie, Oh Mapao;
nevei leshi nou rü ali büa puletaoye vupeilo.
Currently Selected:
LOUTAO 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
