LOUTAO 34
34
Ramai vei Aveih naye Paoshoyu
1Enou Mapao kalo pao-a bukou telai,
Enou puhye teisa nou paosholai.
2Puhnou soupeikhai touyu vah hasotao donou E puhye paosholai;
mainou souvea hoyu maitaoye panou chouloua asalai.
3Eye koa nou Mapao vei aduso nasü shapao khaio,
puh zhih sü koa nou paosho laikhe.
4Enou Mapao hi veachi paoe, ae puhnou Eye chila peie;
Enou ngaopi-a buyu veishi hinou puhnou Eye vupa peie.
5Mainou souvea hoyu maitao nou puhye zhuloua asayu sü ngaoloua;
puletao hai hraongu ngaokhai toulai moe.
6Lülou hoyu maitao nou puhye kuyu phaki, puhnou puletao hi chila sü peie;
puletao nou veahoyu teitei hinou puhnou puletaoye khailupa peie.
7 Mapao ye tsükhoua buyu mai hrülaiye sü rakivamai nou kho peiwe,
ae kaozhou ashi veishi hinou puletaoye vupa peiwe.
8 Mapao hai daizhou koute veiwe touyu sü neletao lah phoupalou khaio.
Puh hinou baiyu buh soua bulouyu maitao hai asayu maitaore.
9 Mapao ye tsükhoulo, puhvei mai hrülai;
puh chi züa buyu mai hrülai hai puletao nou jüpayu khesü ngaoche loulai.
10Souveo koute-a pouzüa laiwe,
ana Mapao vei chi züa buyu mai louzü chelujüyu sü soulai moe.
11Nahle maitaore, ahi tavelo, ae Enou paoyu avei chi sü keilo,
Enou neletao hi kabüa Mapao ye tsükhou loulai touyu sü doupeilai.
12Sava nou hrüyu sü jüpa homoe?
Hrümai so-a nou vasho-a buyu sü jüpaho jüpa moge?
13Sütao hai jüpawe toulouzü, chi la ashi paoso,
ae dayu chi paoso.
14Ashi vah souyu khesü thaokhaiwua vah aveih soulo,
nevei tsüle teitei nou pei-a kaonayu nasü phoulo.
15 Mapao nou acheche maiye sü zhu peiwe,
ae puletao nou kra-a khoyu pai sü keinou peiwe.
16Ana ashi vah souyu maitao hinou puhvei zhu sü pfüvai ta-a baiwe,
südonou puletao hai thaita baiwe ae deiphao mai nou puletaoye ngai-a baie.
17Acheche mainou Mapao ye kuyu phaki, puhnou keinou peiwe;
puletao nou veaho-a buyu teitei hisünou puhnou puletaoye vupa peiwe.
18Le pepoa buyu mai hisü Mapao nou nghitei-a bupeiwe;
dongai pfüa areih lia hayu maiye sü puhnou khailupa peiwe.
19Acheche mainou veahoyu sü alao sou ve daowe,
ana sütao teitei hinou Mapao nou puletaoye sü khailupa peie.
20 Mapao nou puletaoye sü soutaosou-a kiko peiwe,
puletao vei rao ali koute-a panou chata moe.
21Ashi nasünou mai ashi maiye sü southa bailai;
acheche maiye ngaora-a paoshiyu maiye sü tudee peilai.
22 Mapao nou puhvei maitaoye sü khailupa peilai,
puh hinou tave bailoulai tea veyu maiye sü puhnou vupa peilai.
Currently Selected:
LOUTAO 34: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
