LOUTAO 30
30
Kalo Paoyu Veachi
1Enou neye paosholai, Oh Mapaowo,
daiolouzü nenou Eye khailupa peie,
ae ngaobayu maitaoye panou Eye jünüa asah soua bumoe.
2Oh Mapaowo, avei Ramai,
Enou kra-a ne hinou soukha peio tea khowe,
ae nenou Eye souvei peie.
3Nenou Eye athai hinou khailupa peie.
E sü athai maivei teidei hi hota laire tea tapare,
ana nenou avei hrümai sü thoupu peie.
4 Mapao ye louche-a buyu mai hrülai,
puhye lou sousho khaio.
Mashee-o nou daidai soupei khaitoue touyu khesü licholoua puhye kalo paokhaio.
5Puhvei lekha rarou hai phajütou baie,
puhvei aveih nawo louzü akhai ha-e.
Kheiki nghidzü koua buyuma thainesho shona louzü savayu ve-a bailai.
6E kaozhou veia bubaie ae haibüa E lah ahi paoe,
“E hraongu daokhai toulai more.”
7Oh Mapaowo, nevei zhuvea leshi hinou Eye deichi ali büa southou khousho-a nou khaipeie.
Ana ne zhu ahinou pfüku pfüvai tayu phaki Esü ngaopi-a baiwe.
8Oh Mapaowo, Enou neye kra-a nou kuwe,
ae nevei soukha apei nasü khowe:
9E thaiyu sü neye donou dai-e veiyu buge?
E khü hi loutayu hai neye donou dai-e veiyu bue?
Thaiyu mai nou neye paosho lousüvu?
Puletao nou nevei acheche nasü paoshapa peilou süwu?
10Oh Mapaowo, Enou khoyu avei akho nasü keipeio,
ae Eye zhuvea peio! Eye soukha peio, Mapao!
11Enou vea-a dopfüa buyu hinou nenou Eye vasho-a cho-a buyu hisü soudapa peie,
nenou avei veahoyu nasü polai peiwua Eye panou savayu sü ngaoloue.
12Südonou E ngasoua bulai moe;
Enou neye lou sousholai.
Oh Mapaowo, ne hai avei Ramai-e,
Enou neye teisa nou kalo pao-a bulai.
Currently Selected:
LOUTAO 30: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
