LOUTAO 25
25
Süthai peire donou ae Khopeire donou Veachi Paoyu
1Oh Mapaowo, ne hi Enou veachi paowe:
2Oh avei Ramai, Enou neye louchewe.
Eye panou hraongu ngaoso,
ae Eye ngaobayu maitaoye panou ajünou ngalouso.
3Neye louche-a ne vuzhia buyu maitaoye panou hraongu ngaoso,
ana neye khaitya-a duyu maiye sü panou hraongu ngaotheo.
4Oh Mapaowo, nevei ludu khesü Eye ngaopeio,
ae sütao hai Eye doupeio.
5Nevei acheche na thaifüa Eye panou hrüloure donou doupeio,
daiolouzü ne hai Eye khailupa peiyu avei Ramai-e.
Enou neye teisa nou louche-a bue.
6Oh Mapaowo, nevei zhuvea ae tobai soumoa leshi peiyu nasü licho peio.
daiolouzü hainasü raichoki nou nenou soungao peikhaitoue.
7Enou nahle-a buki soumah pfümah khaitouyu mahmo khesü khaipeio.
Nevei tobai soumoa leshi peiyu ae zhuvea peiyu nasünou Eye licho peio, Oh Mapaowo!
8 Mapao hai cheche-e ae veisho-e,
südonou puhnou mah maiye ludu daiki nou talai touyu hai doupeiwe.
9Puhnou tainoutou soua laiyu maikheye sü acheche ludu hi süthai sa-a tapeie,
ae puletao hi puhvei leli nasü doupeie.
10Acheche hinou ae leshiyu hinou puhnou puhvei chikha ae kharochi züa buyu maitaoye sü süthaisa-a tapeiwe.
11Oh Mapaowo, nenou apaopei khaitouyu thaifüa avei mahmo khesü khaipeio,
daiolouzü amah hai pousho-a buloure.
12 Mapao ye tsükhoua buyu maitao hai
puh hinou puletao nou tare ludu nasü douloulai.
13Puletao hai teisa nou sava-a nou hrüloulai,
ae puletao vei nahmaitao nou teidei nasü poloulai.
14 Mapao hai puhvei chi züa buyu maitao vei samai khamai-e,
ae puhnou koa vo soukhai touyu nasü puletao hi süngao peie.
15Enou Mapao vei soukha peiyu nasü teisa nou vurei-a nou bue,
ae puhnou Eye kaozhou ashi hinou vupa peie.
16 Mapaowo, ahi reidakhai vepeio, ae Eye zhuvea peio,
daiolouzü E hai lah likhei baire ae lülou hore.
17Enou levea buyu hisünou Eye sousava peio,
ae Eye veahoyu hinou khailupa peio.
18Enou veaho-a buyu ae sounou-a buyu nasü licho peio,
ae amah veishi sü khaipeio.
19Zhukhaio, Eye ngaobayu maitao sü kazhou bue;
puletao nou Eye daizhou koute ngaora-a bue.
20Eye vupeio ae khailupa peio,
Eye panou hraongu daopeiso,
E ne hinou baisho loure donou vewe.
21Avei veiyu ae ale sheeyu nasü nou Eye poku povai peio,
daiolouzü Enou neye louchewe.
22Oh Mapaowo, puletao nou veahoyu teitei hinou,
nevei Israel maitaoye sü khailupa peio.
Currently Selected:
LOUTAO 25: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
