LOUTAO 119
119
Mapao Vei Chikha
1Mahmo lia soupfü moa
Mapao vei chikha hinou hrüa laiyu maitao hai savayu maitaore.
2Puhvei kharochi khesü züa laiyu maitao,
ae puletao vei tsüle veishi nou peia puh chi züyu maitao hai vasayu maitao-e.
3Puletao hai kaomoyu vah haso ali-a soumoe;
puletao nou Mapao vei ludu hinou ta-a baiwe.
4 Mapao, nenou Etaoye nevei chikha khesü peie,
ae sütao hai soutao soua zülo tea nenou Etao hi paopeie.
5Nenou paodou peikhai touyu khesü züloure donou Eye panou soutaosoua latou toulo.
6Enou nevei chikha khesü soutaosoua reitou tea nou züa bulouyu thaio, Eye panou hraongu daokhailai moe.
7Nenou acheche hinou chikude peiyu khesü Enou sülouyu thaio,
avei tsüle sheesha tea nou neye paosholai.
8Enou nevei chikha khesü zülai,
Eye thaokhai peiso!
Mapao vei Chikha Züyu
9Nahlemai alinou kabüa puhvei hrümamai sü sheesha tea hrülou laige?
Nevei chikha khesü züa bulouzü puhvei hrümamai hai sheesha tea hrülou süe.
10Avei hrümai veishi nou peia nevei kuvah soure donou E te-a nou bue;
Eye panou nevei chikhatao hinou tacho tarei taso.
11Nevei nghingao hinou mahmo soumore donou Enou nevei chikha khesü avei tsüle hi thoukhai toue.
12Oh Mapaowo, Enou neye paoshowe;
nevei ludu khesü Eye paodou peio.
13Nenou peikhai touyu chikha khesü Enou pai chishoa nou phoukhai phoukhai-a bue.
14Kini taoli buyu jüolouzü nevei chikhatao züa buyu nanou E jüpapue.
15Nenou paodou peikhai touyu khesü Enou licho-a nou bue;
nenou doupei khesü soutaosoua Enou zhu-a nou bue.
16Nevei chikhatao hinou E sava-a nou hrülai;
nenou peikhai touyu kharochi khesü Enou ngaikhailai moe.
Mapao vei Chikha hinou Vasayu
17Nevei kilai Eye panou nevei chipao khesü züa buloure donou ahi veisho peio.
18Khupasoua checheyu nevei chikhatao hai Eye panou ngaoloure donou anghithou souhepa peio.
19E hai deiphao hai hi teile jütou likhai bua bailai,
südonou nevei chikha khesü ahinou poku peiso.
20Nenou chikude peiyu khesü teisa nou sülou nüsho-a buyu donou ale sü buthoulou hore.
21Puhnou khaophu souyu maiye sü tudee peiwe,
nevei kharochi züba-a tayu maiye sü chaa peie.
22Puletao nou Eye ngaonghia hraongu soupeiyu hinou Eye popa peio,
daiolouzü Enou nevei chikha khesü züa bue.
23Nuh teidei khasa-a buyu maitao nou vejüloua Eye soushire donou bure,
ana Enou nevei doupei khesü licho-a bu bailai.
24Nevei paodou peiyu taonou Eye sousava peiwe,
sütao nou Eye süthaisa-a tapeie.
Mapao vei Chikha Zülai tea Lela Louyu
25Ewo veilou hoa deiphi hi kaokou dazütare;
nenou apaokhai touyu thaifüa Eye souvei souhripu peio.
26Enou soupü khaitouyu mahmo khesü paopayu thai,
nenou avei akho khesü kei peie; nevei ludu khesü Eye paodou peio.
27Nevei chikha khesü Eye panou süloure donou soukha peio,
ae Enou nevei khupayu vah haso#119.27 khupayu vah; moyuma paodou peiyu. khesü licho-a bulai.
28Ewo veahoyu khaikho dao-a bu baire;
nenou apaokhai touyu thaifüa Eye soukhou soutsü peio.
29Eye panou kaomoyu ludu hilo taso,
ae nevei aveih sünou Eye nevei chikha khesü paodou peio.
30Paoyu chi zülai tea Enou doloure;
nenou chikude peikhai touyu khesü Enou poa anghoujü hi khailoure.
31Oh Mapaowo, nenou paodou peikhai touyu khesü Enou thaifü loure;
südonou Eye panou hraongu daoso.
32Enou nevei kharochi khesü soutaosoua nou züloulai,
daiolouzü sütao nou Eye tsü veipuyu nasü peilai.
Tsüvei Loure donou Veachi Paoyu
33Oh Mapaowo, nevei chikha khesü daivanou peikhai toue touyu süloure donou
Eye paodou peio ae Enou sütao hai teisa nou züa bulai.
34Nevei chikha khesü ahi paongao peio, Enou sütao sü zülai;
Enou sütao hai avei hrümai veishi nou peia pokhai loulai.
35Nevei chikhatao hai Eye panou zülo,
daiolouzü sütao hinou savayu nasü Enou ngaoloue.
36Eye panou toungiyu jü-o nevei chikhatao züa hrüyu naye pa jüpa pulo.
37Eye panou komoyu nali hi avei tsüle hai peiso,
nenou apaokhai touyu thaifüa ahi veisho-a bupeio.
38Neye tsükhoua ne chi züa buyu mai hi nenou paokhai peiyu nasü
nevei kilai, ahi-a paohkhai peio.
39Enou ngaopi-a buyutao hinou Eye khailupa peio;
nevei chidei khesü daizhou koute khupasa!
40Enou nevei chikha khesü züyu jüpawe,
nevei checheyu nasü Eye tsü ashu thoupeio.
Mapao vei Chikha Loucheyu
41 Mapao nenou Eye daizhou koute leshiwe touyu nasü ngaopeio,
ae nenou paopeikhai touyu thaifüa Eye khailupa peio.
42Süthaisü Eye paoshi-a buyu maitao hi Enou chila peilai,
daiolouzü Enou nevei chipao sü louchewe.
43Teisa panou acheche chi paoloure donou Eye soukha peio,
daiolouzü avei areih hai nevei chipao hinou bua baie.
44Enou teisa nou nevei chikha züa bukoute-a bailai.
45Enou lahdo soua hrüa bulai,
daiolouzü nenou paodou peikhai touyu khesü Enou züre donou te-a bue.
46Enou nevei chikha khesü veo maitao hi paongao peilai,
ae E hraokhai toulai moe.
47Nevei chikhatao züa buyu hinou E savayu sü ngaowe,
daiolouzü Enou sütao hai leshi-e.
48Enou nevei chikha khesü tsükhouwe ae leshi-e,
nenou paodou peikhai touyutao hai Enou teisa licho-a bulai.
Mapao vei Chikha Lüloucheyu
49 Mapao kilai ahi nenou paopeikhai touyu nasü licho peio,
sünasü vuzhi poa nou Esü bua baie.
50E veaho sho-a nou buyu phaki-a sava-a nou Ewo bubaie,
daiolouzü nenou apaokhai touyu nasü nou Eye ahri sü peie.
51Khaophu souyu maitao nou Eye sü teisa nou jünüa lai-a baiwe;
ana Enou nevei chikha hinou tala takhai toulai moe.
52Nenou raichoki chidei peiyu khesü Enou ngaikhai toumoa taipoa nou buwe,
ae sütao nou ahi vasayu nasü pove peie, Oh Mapaowo.
53Mai ashi maitao nou nevei chikha pfüthoyu ngaolou khaie,
ale sü rarouyu nou phoutao-a bua baiwe.
54Jüshoyu avei deiphao hrütou hinou Enou nevei chikha khesü lou hi dathou peie.
55 Mapao, Enou neye khei teile hi licho-a bue,
ae nevei chikha nasü tsücho-a nou buwe.
56Nevei chikhatao züa buyu donou E savayu sü ngaowe.
Mapao vei Chikha Licho-a buyu
57Oh Mapaowo, Enou jüpayu hai neye likhei baie,
Enou nevei chikha khesü zülai tea paochewure.
58Nenou apaokhai touyu thaifüa Eye zhuvea peio tea
avei tsüle veishi nou peia ne hinou khowe.
59Enou nevei jüpa hinou hrüwe,
ae nenou paodou peiyu khesü Enou fülai tea paochewure.
60Enou puhvei chikha khesü züa soupfüre donou ponakhai toumoa thaso-a nou soupeie.
61Mai ashi maitao nou Eye shorü southou peie,
ana Enou nevei chikha khesü ngaikhai timoe.
62Nenou acheche hinou soupfü peikhai touyu vah haso khesü
Enou khei toutsü hinou kushuloua neye paoshowe.
63Nevei kuvah soua buyu maitao ae nevei chikha züa buyu mai hrülai hai avei samai-e.
64 Mapao, deiphao hi hai nevei tobai soumoa leshi peiyu nasü nou phoutao-a bure,
nevei chikha khesü Eye doupeio.
Mapao vei Chikha hai Muh Teisho-e
65Oh Mapaowo, nenou apaokhai touyu thaifüa
ne kilai Eye veishoa nou zhuvea leshi peie.
66Eye ratsü ae tsüdo aveih nasü peio,
daiolouzü Enou nevei chikhesü louchewe.
67Nenou Eye tudee peimo jü hai, Enou kaomoyu hilonou ta-a nou bue,
ana chuo Enou ne chi sü züloure.
68Ne hai daizhou koute vei-e ae zhuvea sühshoe?
Nevei chikha khesü Eye paodou peio.
69Khaophu souyu maitao nou Eye dahrührüa paopeie,
ana avei tsüle teitei nou peia Enou nevei paodou peiyu khesü züloue.
70Mai haitao hai sükulou süyu sü ha-e,
ana Ewo louzü nevei chikha hinou vasayu sü ngaoloue.
71Eye tudee peiyu hai Eye donou vei-a baie,
daiolouzü sütao hinou Eye panou nevei chikha khesü douloue.
72Deiphao hi buyu thoudzü teitei jünou nenou Eye peikhai touyu chikhatao nou muteipu hie.
Mapao vei Chikhatao hai Kaozüe
73Nenou Eye soupeie, ae Eye panou kaozhou vei-a hrüloue;
ahi tsüdo aveih nasü peio, sükulouzü Enou nevei chikha khesü douloulai.
74Neye tsükhoua buyu maitao nou Eye ngaolouyu phaki puletao hai asalai,
daiolouzü Enou nevei paopeikhai touyu khesü louchewe.
75 Mapao, nenou chiku peiyu hai chechewe touyu Enou süwe,
ae nehai chilee checheyu donou Eye tudee peia baie.
76Nenou paokhai touyu thaifüa nevei kilai Eye nevei tobai soumoa leshi peiyu nasü nou sousava peio.
77Eye zhuvea leshi peio, sükua Eye panou hrüa bulo;
daiolouzü Enou nevei chikha hinou vasa-a buwe.
78Khaophu souyu maitao panou hrao ngaotheo,
daiolouzü puletao nou dakhokhoa nou Eye mah paoka peiwe;
Ewo louzü nenou paodou peikhai touyu khesü licho-a nou bua bailai.
79Neye tsükhoua buyu maitao ae nevei chikhatao züa buyu maitaoye sü panou ahi velo.
80Eye panou nevei chikha khesü soutaosoua zütou toulo,
sübüa Eye panou hraongu nasü ngaoso.
Khailupa Peio tea Veachi Paoyu
81Oh Mapaowo, Ewo nevei khailupa peiyu nasü vukho-a buyu donou veaho chekhore;
Enou nevei chipao khesü louche-a vuzhia bue.
82Nenou apaokhai peiyu khesü vuzhia buyu donou anghithou hai veare;
Enou chi noue, “Ne dukinou Eye sousava peilai?”
83Daiolouzü komoa nou laikhai touyu lekhabvü ali büa Ewo bua baire;
ana Enou nevei chikha khesü ngaikhai toumoe.
84Eye panou teile kasho kho-a nou bukoulai hige?
Eye souvea-a laiyu maitaoye nenou daisouyu teile hinou tudee peilai?
85Khaophu souyu maitao, nevei chikha zümoa buyu maitao nou
Eye panou deloure donou deibvü rao-a bure.
86Nevei chikha teitei sü veichekho toua baie;
maikhe mainou da-a nou Eye souvea-a bure, Eye soukha peio.
87Puletao nou Eye sü southa nore,
ana Enou nevei chikha khesü ngaophou moyu sü soumoe.
88Nevei tobai soumoa leshiyu nou avei hrirai sü khailupa peio,
sükulouzü Enou nevei chikha khesü züa bulai.
Mapao vei Chikha Lüloucheyu
89Oh Mapaowo, nevei chipao hai teisa nou akhai ha-a bukou telai,
haina sü raki vanou teisa sü bulai.
90Nevei chilee checheyu nasü vere khaphao veishi hia bukou telai,
nenou deiphao sü soupeie, ae hainasü sübüa bukoulai.
91Nenou kharochi peikhai touyu thaifüa na veishi hai zhou teithe hi koute sübüa buwe,
daiolouzü sütao teitei hai nevei kilai baie.
92Nevei chikha sünou Eye sousava peimoyu thaio,
E sounou soua veahoa buyu hinou thaita laire.
93Nenou paodou peiyu khesü Enou ngaophou moyu sü soukhai toumoe,
daiolouzü sütao vanou E hria bubaie.
94E hai nevei baie— Eye khailupa peio!
Enou nevei chikha khesü züre donou te-a nou bue.
95Mai ashi maitao nou Eye southare donou da-a nou bue,
ana Enou nevei chikha khesü licho-a bulai.
96Na veishi hai akhai bue touyu sü Enou süloure;
ana nevei chikhatao hai lichekho toua bubaie.
Mapao vei Chikha Leshiyu
97Nevei chikha hai Enou daizhou koute leshi-e!
Enou sütao hai teile busasü licho-a bue.
98Nevei chikha hai ahinou teisa bua baiwe,
ae süna nou Eye ngaobayu maitao jünou avei tsü sü souveipu peie.
99Eye dou-apei mai hrülai jünou E-a tsüdo veipue,
daiolouzü Enou nevei paodou peiyu khesü licho-a nou bua baiwe.
100Tsümai jünou Enou ratsü sü süpu hie,
daiolouzü Enou nevei chikha khesü züwe.
101Veimoyu zhaidou veishi sü Enou thaokhaiwure,
daiolouzü Enou nevei chipao khesü züyu hai jüpa-e.
102Enou nevei paodou–apei khesü ngaophou moyu sü soumoe,
daiolouzü ne hai Eye dou-apeio nasüe.
103Nevei chipao khesü daizhou koute jühsa,
sütao hai laivoudzü jünou jühpu hie.
104Nevei chikhatao hinou E ratsü sü ngaoloue,
südonou hrümamai ashi nasü Enou ngaora-e.
Mapao vei Chikha hi Ava
105 Mapao chipao hai avei meivabvüe
ae aludu hi ava nasüe.
106Nevei checheyu kharochi khesü Enou zülai tea chaachou souchewure.
107Oh Mapaowo, E hai haohao soumoa veaho shore,
nenou apaokhai touyu thaifüa Eye panou hria bulo.
108Oh Mapaowo, Enou kalo pao-a veachi paoyu sü popeio,
ae nevei chikha khesü Eye paodou peio.
109Kaozhou ashi daore khesü Enou ngaopi moe;
Enou nevei chikha khesü ngaikhai timoe.
110Mai ashi mainou Eye shorü southou peie,
ana Enou nevei chikha khesü zübayu sü soumoe.
111Nevei chikhatao hai teisa nou avei kaalo soure nasüe,
sütao vanou E lesa-a bue.
112E thaitamo koute nevei chikha khesü zülai tea lela chewure.
Mapao vei Chikha hinou Kaozhou Aveih
113Tsüle ahaisü souyu maiye Enou ngaora-e,
ana Ewo louzü nevei chikha nasü leshi-e.
114Ne hai Eye vupa-apeio nasüe;
avei areih hai nevei apaokhai touyu hisü bue.
115Mahmo souyu maitao, ahinou tavai talo.
Ewo louzü Ramai vei chikha khesü züa bu bailai.
116Nenou paokhai touyu thaifüa Eye pfüchi sü peio,
sükulouzü E hria bulai, avei areih khesü panou vete moyu sü soupeiso!
117Eye panou kaozhou vei-a hrüloure donou Eye moupeio,
ae Enou nevei chikha khesü teisa nou lenoua soupü peilai.
118Nevei chikhatao zü moyu mai hrülaiye sü nenou malai khaiwure,
puletao vei tsüdo ashi khesü hamako baie.
119Mai ashi mai hrülaiye sü nenou nghoushi laikhai touyu büa powe,
südonou Enou nevei doupei khesü jüpa-e.
120Enou neye sü ngaopi-e;
nenou chikude peiyu khesü Enou ngaopie.
Mapao vei Chikha Züyu
121Enou kaozüyu ae veiyu nasü souwe;
Eye ngaobayu mai bah hi thoupeiso!
122Nevei kilai Eye soukha peilai tea paohpeio,
zhaipou shiyu maiye panou Eye souvea peiso!
123Nevei khailupa peiyu nasü vuzhia buyu donou Ewo veare,
ae nevei checheyu hinou apaokhai peiyu khesü dukinou vepalaisa tea kholou hosoua bure.
124Nevei tobai soumoa leshiyu hinou Eye zhupeio,
ae nevei chikhatao sü Eye doupeio.
125E hai nevei kilai baie, Eye tsüveiyu nasü peio,
sükulouzü nevei dou-apei khesü Enou süloulai.
126 Mapao, vah soure teile sü chude,
daiolouzü maikhe mainou nevei chikha khesü zübare.
127Enou nevei chikha hai sana jünou leshipu hie,
veikayu sana jünou jüpapu hie.
128Südonou nevei dou-apei teitei sü Enou thaifüwe,#119.128 Hebrew hi haina hai sheesha moe.
kaomoyu vah veishi sü Enou ngaorae.
Mapao vei Chikha Jüpashoa Zhiyu
129Nevei dou-apeitao hai daizhou koute khupasa;
Enou sütao hai avei tsüle veishi nou peia züwe.
130Nevei chipaotao hai soutaosoua hupakhaie ava nasü peiwe,
ae tsüvei moa buyu maiye tsüsüyu peie.
131Nevei chikha khesü Enou jüpa shopoa nou amü hepaloua ssü paodou doupoa bue.
132Nenou neye leshi-a buyu mai hi soupeiyu büa
ahi dakhai vepeio ae Eye zhuvea peio.
133Nenou apaokhai touyu thaifüa Eye panou kaodu taso,
ashi naye panou ajünou veilouyu sü soupeiso.
134Eye souvea buyu maitao hinou Eye khailupa peio,
sükulouzü Enou nevei chikhatao sü züa buloulai.
135Nenou Eye kozho-a bupeiyu nasü nou Eye ha peio,
ae nevei chikha nasü Eye doupeio.
136Maikhe mainou nevei chikha khesü sümoyu donou reidzü küyu büa anghidzü sü kükoua bure.
Mapao vei Chikha hi Kaozüyu
137Oh Mapaowo, checheyu nasü ne-e,
ae nevei chikhatao hai kao-e.
138Nenou chikha peikhai touyu teitei hai
veikhai toubaie ae zükhai toua baie.
139Eye ngaobayu maitao nou nevei chikha khesü ngaophou moyu donou, mei tao-a buyu büa Ewo lekha sho-a bubaire.
140Nenou apaokhai touyu khesü vete vuzüa baiwe!
Enou sütao hai leshi-e!
141Ewo mainou komoyu ae zhojüyu mai ali baie,
ana Enou nevei chikha khesü ngaophou moyu soumoe.
142Nevei acheche nasü akhai bulai moe,
ae nevei chikha khesü teisa nou cheche-a bulai.
143Ewo veahoyu ae leveayu nou phoukha nou bua baie,
ana nevei chikhatao nou Eye savayu nasü pove peie.
144Nenou paodou peiyu khesü teisa nou vei-a baiwe,
Eye tsüveiyu nasü peio, sükulouzü E hria buloulai.
Vupa peio tea Veachi Paoyu
145Avei tsüle teitei nou peia Enou neye kuwe;
Eye chila peio, Mapao, ae Enou nevei chikha khesü zülai.
146Enou neye kua nou bue; Eye khailupa peio,
ae Enou nevei chikha khesü züa bulai.
147Shona teinghei pamo jünou Enou nevei soukha peiyu nasü kho-e;
nenou apaokhai touyu khesü Enou vureih-a nou bue.
148Nenou paodou peiyu khesü Enou khei mathe zhaihea nou licho-a bue.
149Oh Mapaowo, nevei tobai soumoa leshiyu nanou avei paila sü kei peio;
nevei zhuveayu nasü Eye ngaopeio, ae avei hrütou hai kiko peio.
150Zhaipou shishoa Eye souveayu maitao nou ahi nghitei poa koure,
puletao hai nevei chikha khesü zü moe.
151Ana nenou Eye nghitei tea bue, Oh Mapaowo,
ae nevei chikha khesü teisa nou cheche-a bulai.
152Nenou paodou peiyu khesü Enou raichoki nou süloure;
teisa panou bure donou nenou sütao hai soukhai peiwure.
Soukha Khoyu
153Enou sounou soua buyu sü zhupeio, ae Eye khailupa peio,
daiolouzü Enou nevei chikha khesü ngaophou moyu soumoe.
154Avei zü nasü vu peio, ae Eye panou lahdo soulo,
nenou apaokhai touyu thaifüa Eye khailupa peio.
155Mai ashi maitao hai khailu louyu sü ngaolai moe,
daiolouzü puletao nou nevei chikha khesü zü moe.
156Ana Mapao, nevei leshi zhuveayu hai dusho-e;
nevei zhuvea peiyu nasü Eye ngaopeio ae Eye khailupa peio!
157Eye ngaobayu mai ae souvea peiyu mai hai alaosou nou bue,
ana Enou nevei chikha khesü zü moyu sü soumoe.
158Enou shodo ashi souyu maitaoye ngaolouyu phaki,
ale hai rarouyu nou phoutao-a baiwe,
daiolouzü puletao nou nevei chikha khesü züpei moe.
159 Mapao, Enou nevei paodou-apei khesü daizhou koute leshiwe touyu sü zhukhaio.
Nevei leshiyu hai dakhai toumoe, südonou Eye khailupa peio.
160Nevei chikha hai checheyu nasüe,
ae nenou cheche hinou chikude peiyu teitei sü teisa nou bu bailai.
Mapao vei Chikha hi Hrümai Peithouyu
161Khouko buyu maitao nou zü ali-a ha-a nou Eye souvea peie,
ana Enou nevei chikha sü tsükhou peie.
162Mai alinou nangi alao ngaolouyu phaki lesa shoyu büa
Ewo nevei apaokhai touyutao hinou sava shoa nou bue.
163Enou dayu hai ngaora-e ae jüpa moe,
ana nevei chikha hai Enou leshi-e.
164Nenou checheyu hinou chiku peiyu donou Enou teithe ali hinou bakha anai hai neye paoshowe.
165Nevei chikha leshiyu mai hai kaonayu sü bue;
hatara linoua puletaoye sü soushi louhoe.
166 Mapaowo, Enou nevei khailupa peiyu nasü vureih-a nou bue,
ae nenou chikha peikhai touyu nasü Enou soupfüwe.
167Nevei chipao khesü Enou züwe;
Enou sütao hai avei tsüle teitei nou peia leshi-e.
168Enou nevei chikhatao ae paodou peiyu khesü züwe,
Enou soupfüyu veishi sü nenou ngaowe.
Soukha Khoyu Veachi
169Oh Mapaowo, Enou kra-a soukha khoyu nasü panou ne hi khetelo!
Nenou apaokhai touyu thaifüa Eye tsüvei nasü peio.
170Enou veachi paoyu sü kei peio,
ae nenou apaokhai touyu thaifüa Eye khailu peio!
171Nenou Eye nevei chikha khesü doupeiyu donou Enou neye teisa nou paosholai.
172Nevei kharochitao hai checheyu thaifüa Enou nevei chikha nasü lou nou sousholai.
173Enou nevei chikha khesü züa buyu donou Eye soukha peire donou teisa nou souda-a bupeio.
174Oh Mapaowo, nevei khailupa peiyu nasü Enou kholou hosoua nou bure!
Nevei chikhatao hinou E savayu sü ngaoloue.
175Eye ahri nasü peio, sükoulouzü Enou neye paosholai,
nevei paodou peiyu nasü nou Eye soukha peio.
176Ewo hakhai touyu zhaotu ali büa moa laire;
südonou nevei kilai Eye tave zhupeio,
daiolouzü Enou nevei chikha khesü ngaophou moyu sü soumoe.
Currently Selected:
LOUTAO 119: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
