LOUTAO 118
118
Veilouyu donou Kalo Paoyu Veachi
1 Mapao ye kalo paopei khaio, daiolouzü puh hai veisho-e,
ae puhvei leshi hai akhai ha-e.
2Israel maitaoye panou haibüa paolo,
“Puhvei leshiyu hai akhai ha-e.”
3Ramai vei napao maitaoye panou haibüa paokhaio,
“Puhvei leshiyu hai akhai hae.”
4Puhye thoyu mai hrülaiye panou haibüa paolo,
“Puhvei leshiyu hai akhai hae.”
5E veahoa buyu phaki, Enou Mapao ye ku-e;
puhnou Eye chila peie ae Eye lahdo soupeie.
6 Mapao nou Eye koa bupeiwe, Enou hataralia ngaopi laimoe,
thaonou Eye souloure sü bue?
7 Mapao nou Eye sü soukha peiwe,
südonou Eye ngaobayu maitao nou hakatayu sü Enou ngaolai.
8Maiye loucheyu jünou Mapao ye loucheyu na-a veipu hie.
9Süthai-apei maitaoye loucheyu jüo Mapao ye loucheyu-a veipu hie.
10Ngaobayu maitaoli nou Eye sü sühao loure,
ana Enou puletaoye Mapao vei khouko sünou souha peiwure.
11Puletao nou Eye sü sühao loure;
ana Enou puletaoye sü Mapao vei khouko sünou souha khaiwure.
12Puletao nou Eye sü laivoutu büa zhaoh sühao loure;
ana puletaoye sü poube shube khenou mei taopa peikhaie thashoa nou deihayu büa Mapao vei khouko sünou Enou puletaoye sü souhawure.
13Eye sü puletao nou soutaosoua nou due,
ae Esü kaodu tare, ana Mapao nou Eye soukha peie.
14 Mapao nou Eye soukhouchi peie;
puhnou Eye khailupa peie.
15Ramai vei maitao nou sashoa nou puletao vei sahpao hinou veilouyu vei shura soua shayu paisü kei khaio:
“Mapao vei khouko sünou haisü soupeie!
16Puhvei khouko sünou soureih sü soupeie,
ae Etaoye veilouyu nasü pove peie!”
17E hai thailai more, hria bulaire,
ae Mapao nou soupeikhai touyu vah haso khesü shapaolai.
18Puhnou Eye shisho-a nou tudee peie,
ana puhnou Eye panou thai moe.
19Rathoki vei kikhu sü Eye houthou peio,
Enou talou loua nou Mapao ye sü kalo paopeilai!
20Hai nasü Mapao vei kikhubomü-e;
checheyu mai likhei taloua bailai.
21Oh Mapaowo, Enou neye paoshowe,
daiolouzü nenou avei veachi nasü keipeie,
nenou Eye veilouyu nasü peie.
22Ki souyu mainou veimoe tea polaiyu
chuh nasü matsü kayu chuh ali souloure.
23Hai sü Mapao nou soupeiyu vah haso-e;
haisü zhuposhu khupa shore!
24Zhou hai Mapao nou veilouyu teithe-e;
Eletao nou asa-a khonüh nülai khe!
25Etaoye khailu peio, Mapaowo, Etaoye khailupa peio!
Oh Mapaowo, Etaoye veilouyu sü peio!
26 Mapao vei zhih hinou taveyu maiye sü Ramai panou hapeiyu sü soulo!
Mapao vei Rathoki hinou neletaoye sü Etao nou shiha peiwe.
27 Mapao hai Ramai-e, puhnou Etao hi veih sho-e.
Neletao bah hinou süübo khesü poloua khonüh nüre donou
posheelabu nasü tasühao khaio!
28Ne hai avei Ramai-e, ae Enou neye kalo paopeilai;
Enou nevei aduso nasü shapao peilai.
29 Mapao hi kalo paopei khaio,
daiolouzü puh hai veisho-e, ae puhvei leshiyu hai akhai ha-e.
Currently Selected:
LOUTAO 118: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
