LOUTAO 115
115
Checheyu Ramai hai Ali Baie.
1Oh Mapaowo, nevei tobai soumoa leshi peiyu donou,
ae nevei chilee checheyu donou nevei zhih aveih nasü paosholai,
Etao hi paolai moe, neye likhei kathe aveih nasü pao-a bailai.
2Daisounou tyahrü kukhe maitaoye panou,
“Neletao vei Ramai sü daiki nou bue?” tea noulai?
3Etao Ramai hai raki vanou bue;
puhnou jüpayu nasü souloua baiwe.
4Puletao vei rahtao hai shahu ae sana nou souloua baie,
ae deiphao mai bah nou souloua baie.
5Puletao hai mü louzü bue, ana raolou hoe,
nghithou pfüwe, ana ngaolou moe.
6Puletao hai noubei bue, ana choulou moe,
nghou bue, ana kaingi chamoe.
7Puletao hai bah bue, ana deiyu sümoe,
phi bue, ana talou chamoe,
puletao hai kho ali-a soupa louhoe.
8Puletaoye soupeiyu maitao ae puletaoye loucheyu maitaoye sü panou basharatao bütou peie.
9Israel maitaore, Mapao ye louchelo.
Puhnou neletaoye sü soukha peie ae neletaoye vupa peie.
10Ramai vei napao maitaore, Mapao ye louchelo.
Puhnou neletaoye soukha peie ae vupa peie.
11Puhye thoyu mai hrülai, Mapao ye louchelo.
Puhnou neletaoye soukha peiwe ae neletaoye vupa peie.
12 Mapao nou Etaoye licho peilai ae Etaoye shiha peilai,
puhnou Israel maitaoye ae Ramai vei napao maitaoye ha peilai.
13Puhnou puhye tsükhouyu mai hrülai,
taidu souku moa nou ha peilai.
14 Mapao ye panou neye ae nevei nahmaitaoye tou-dzü alao peiyu sü soulou theo.
15Raki ae deiphao soupeiyu Mapao ye sü panou neye shiha peiyu sü soulou theo.
16Raki hai Mapao vei baie,
ana puhnou deiphao hai mai hi peiwure.
17 Mapao ye sü thaitayu mainou ae zei tea buyu teidei#115.17 zei tea buyu teidei: Athai maivei deiphao (phoure 6.5 hia zhukhaio). hi hotayu maitao nou paosho peimoe.
18Ana hria buyu Etao nou puh kalo sü paowe,
chu-a ae teisa nou puh kalo sü paolai.
Mapao ye paosholo!
Currently Selected:
LOUTAO 115: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
