DOPFÜYU 3
3
Tudeeyu, Ledalouyu, ae Areih
1E hai Ramai nou tudeeyu sü kabüwe touyu süyu mai nasüe.
2Puhnou Eye azhi hisü huthou leikhai leikhai peiwure.
3Ae puhnou Eye zhuveayu lia ha-a nou dapeiyu thainou dapei khaikhaire.
4Puhnou avei souke ae souhee sü soushi peiwure,
ae avei rao khesü souchawure.
5Puhnou Eye shishoyu ae veahoyu hukhaki hinou thou bekhai peiwure.
6Puhnou Eye raichoki nou thaiyu mai ali büa teimai teizhi hinou pa bue.
7Puhnou Eye hurai nou phumu loure,
E hai hukhaki hinou tupa loure areih lia hade.
8Enou shusoua nou Eye soukha peio tea kra-e,
ana Ramai nou avei pai sü keipei bare.
9Puhnou avei ludu khesü chuh nou khokhawure;
Puhnou avei ludu sü soukhirukao laiwure.
10Puhnou Eye vukü ali büa kholoure;
Puhnou souveo ali büa Eye tutsüloua daloure.
11Puhnou Eye ludu hinou hulaiwure,
Eye paide paisasa peiwure, ae thaokhai peiwure.
12Puhnou puhvei vouloushu sü paipa loua Eye kavure donou teloure.
13Puhnou puhvei voulouthou sü avasou hi leisho-a kathou peiwure.
14E sü maivei jünü soure,
avanou puletao nou lou dapaloua soua nou bure.
15Puhnou khayu, veahoyu hai nou avei touso soua peie.
16Puhnou apah hai deiphi hinou poa nou roupeie,
ae avei hutao sü chuh rao hinou sousha peie.
17Enou pfüphao veiyu ae kaonayu alia savayu khesü ngaiwure.
18E hai teile so-a nou hrilou hore;
Enou Mapao hinou vuzhi-a buyu nasü hatare.
19Enou avei veahoyu ae avei ki hayu sü licholoua
sünasü khashoyu kaithapou ali büre.
20Enou hai nasü tobai soumoa licho veloua chathai tare.
21Ana Enou hai nasü licho louyu phaki areih nasü ahi dakhai ve-e:
22 Mapao vei tobai soumoa leshi peiyu ae zhuvea peiyu nasü chukoute-a buhie.
23Süsü veishoyu shona bütoue,
ae teinghi pavuzü laiyu bütou tea bue.
24 Mapao hai avei soulai,
ae Enou avei areih nasü puh hi bulai.
25 Mapao hai puhye lüa loucheyu mai hrülai hi veisho-e.
26Südonou Etao hai heameapoa puhvei vu kholouyu haina-a veika-e,
Etaoye khailupa peiloure donou puhvei vu kholo.
27Heameayu haina hai nahle-a bukinou doulouyu-a veiveilai nasüe.
28Etao nou veahoyu phaki,
chobuloua nou zei tea shameapoa buyu pha-e;
29Etao nou nakoulou-a puh hi peithou louzü,
sühisü areih hai bulou vei-e.
30Taida peia ae hraongu soupeiyuma,
Etao nou süsü pfüyu kaobaie.
31 Mapao hai maiye zhuvea sühsho-e ae puhnou Etaoye teisa sü malaiwulai moe.
32Puhnou Etao hi veahoyu hai pove peia mala-e,
ana puhnou Etaoye leshiyu hai dusho-e.
33Puhnou Etaoye panou veahoyu ae souyu haisü ngaoloua puh-a lesa moe.
34 Mapao nou hukhaki hi buyu maitaoye phi nou taikya peiyu hai ngaowe;
35Etao nou ngaozütao hai Etao hi peimore touyu sü puhnou süwe.
36Chikubuh hisü kaozü nasü porei laiwure touyu hai puhnou süwe.
37 Mapao vei leli loumoa nou mai linoua halia soupfü louhoe.
38Havei-a moyuma hashiro puhvei kharochi thaifüa vepa-a bubaie.
39Etao nou soumah pfümah khaitouyu vanou Etaoye tudee peiyu phaki,
Etao daisounou nolealea bulaige?
40Etao nou Etao ludu sü soutaosoua zhuloua nou
Mapao hi dakhai veloua bailaikhe.
41Eletao vei tsüle veishi hai rakiva buyu Ramai hi peilaishe ae veachi paolaikhe,
42“Etao nou mahmo souwure ae khaityawure,
alia Oh Mapaowo, nenou Etaoye sü khaipei more.
43“Nenou Etaoye sü thaingouho southawure,
ae nevei zhuvea leshi nasü nevei lekha rarou nanou pokure,
44Teihao nou chaotei touloua Etao nou veachi paoyu sü loute louhore.
45Nenou Etaoye sü tyahrütao hrohinou sheemoyu ae nghoushi ali büa soupeiwure.
46“Etaoye ngaobayu maitao nou ngaophou moa konüpeia nou bure.
47Etao hisü veahoyu ae hakayu sünou veloure;
Etao hai kaozhou ashi ae ngaopiyu hinou hrüa bubaire.
48Avei maitaoye soushi soukanghi peiyu donou anghithou hai reidzü büa nghidzü nou küa bure.
49“Avei nghidzü hai reitou ali büa thaokhai timoa küa nou bua bailai,
50 Mapao nou rakiva nou Etaoye zhukou ngaoloumo koute hai.
51Nuhdu hinou hrüyu naotu maitao hi vepayu khesü Enou ngaoloua ale hai veashore.
52“Eye ngaobayu maitao nou kaozü ali-a hayuma Eye sü raohou ali büa thaihure.
53Puletao nou Eye sü hria nou deibvü hi laithou peiwua chuh nou mü sü khungi peiwure.
54Dzü nou apei hi kükhere,
ae E hai thaire nghitei loure tea tsüchoe.
55“Deibvütei akhai hinou, Oh Mapaowo, tea Enou puh hi kra-a kuwe,
56ae Enou kuyu avei pai sü keipeio tea paoyu phaki puhnou apai hai keipeie.
57Nenou Eye chila peie ae Eye ngaopiso tea ahi paopeie.
58“Nenou Eye sü tave vupa peie, Oh Mapao,
ae avei hrü sü khailupa peie.
59Oh Mapaowo, ahi soumah peiyu khesü nenou ngaowe,
südonou kaozü thaifüa chilou sü kupeio.
60Eye ngaobayu maitao nou kabüa Eye ngaorawe ae kabüa puletao nou ahi shodo ashi sü soupeie touyu khesü nenou süwe.
61“Oh Mapaowo, puletao nou Eye ngaophou moa paoshiyu sü nenou chouloure,
ae puletao vei do ashi khesü nenou ngaowe.
62Puletao nou heamajü sü Eye soushi peire donou chi phawe ae shodo ashi khesü tsüchoda-a nou bue.
63Shona nou poa koukhe koute hai puletao nou Eye ngaohia nou konüa bue.
64“Oh Mapaowo, puletao nou soupfüyu thaifüa puletaoye tudee peio;
65Puletaoye chaa peio ae puletao hisü veahoyu hai peio!
66Nevei lekha rarou hinou puletaoye thaihuloua puletaoye nevei deiphao hinou souhalai peio!”
Currently Selected:
DOPFÜYU 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
