DOPFÜYU 2
2
Mapao nou Jerusalem ye Tudeiyu
1 Mapao nou puhvei lekha rarou
hinou Zion sü teimai teizhi sünou hongilure.
Puhvei haveih khesü deiphi hi soushikou khaipeiwure.
Puhnou lekha payu teithe sü puhvei Rathoki koute-a thaokhaiwua tare.
2 Mapao nou zhuveayu aliro ha-a nou Judah vei nuh teidei khesü souhawure,
ae puhvei lekha hinou teidei vupeiyu reihkhaobu khesü soushi laiwure.
Puhnou vedei nasü ae sühi süthai-apei maitaoye sü hraongu soupeiwua deiphi laikhai peiwure.
3Puhvei lekha rarou hinou Israel maivei khouko veishi sü souphe soupho khaiwure;
Ngaoba maitao nou Etaoye tave soushi-a buyuma puhnou Etaoye soukha peibare.
Puhnou mei taoyu büa Etao vei buyu na veishi sü deihakhai toupeire.
4Puhnou Etaoye sü ngaobamai ali büa puhvei voulouthou sü paipa Etaoye kare donou buloure,
Etao vei asah souyu ae jüpa-a buyu hrülai sü puhnou souhakhai toupeire.
Jerusalem hai hinou Etao hai puhvei lekha rarou nanou dei-a nou bue.
5 Mapao nou Israel maiye sü ngaobamai ali büa souhawure;
Puhnou veo vei ki fühao ae reihkhaobu khesü soushiwure;
Puhnou Judah hi maitaoye sü veahoyu ae dopfüyu hai soupoupu papeie.
6Etao nou puhye thoyu Rathoki nasü puhnou souphe soupho sasare;
Puhnou sheeyu teithetao ae Soteithe sü souhawure.
Puhvei lekha rarou hai veo hi ae napao maitao hi raibütoua vere.
7 Mapao nou puhvei posheelabu sü malaiwure ae puhvei sheeyu Rathoki sü thaokhaiwure;
Puhnou ngaobayu maitaoye panou kivo sü daphe dakhowure.
Raichoki Etao nou asah soua rathoyu buh nasü puletao nou veiloure tea sha-a nou bure.
8 Mapao nou Zion vei kivo sü soushire donou lela chewure;
Puhnou sütao hai soushikhai toure donou douche khaiwure.
Chuo kipeitaoh ae kivo khesü soushikhai toua bure.
9Rokhubomü khesü pepo takhaire, sütao vei tyayu hu khesü sousasawure.
Veo alia peikhoyu maitaoye sü hukhamai soua vakou nüpoa tare.
Chikha sü chuo doupeipu more,
ae rachipaola peiyu maitao hai Mapao hinou zho sü ngaomore.
10Jerusalem hi tsümaitao hai zei tea nou deiphi hinou bua baire,
Puletao vei pei hisü naihü nou bosho loure ae soukousah nou banoua bure.
Jerusalem hi loumainahtao hai deiphi hi puletao vei pei sü pfüa nakou bure.
11Avei nghithou hai krapouleyu donou ha ngaotou more; Ale sü veashore.
Avei maitaoye soushi souhayu donou dopfüa E sü shaloure.
Nahmaitao ae nahmaitou khesü nuhdu vei duva hinou shatare.
12Puletao nou houre ae reire tea puletao vei pfü hinou kra-a nou bure;
Puletaoye zhizhu khaitouyu büa ludu kinou kaodu tare,
ae pfü vei bah hinou sososoua thaitare.
13Oh Jerusalem, leshi shoa buyu Jerusalem,
Enou neye donou dai-e paolaige?
Enou neye kabüa sousava peilai? Mailia neye büa veayu sü hahie.
Nenou veahoyu sü zaidu büa akhai sü hare; neye donou areih sü halia hazei toure.
14Nevei rachipaola peiyu maitao hai dayu deinou hachi kukhe paore halia hazei toure;
Neletaoye süthai mah peire donou puletao nou neletao vei mahmo khesü paopa peimore.
Puletao nou neletaoye panou ledayu hai komoe tea licho loure.
15Ludu tacho tayu mai hrülai nou ne hisü bah taongaore.
Puletao nou pei züpoa Jerusalem kaodutayu sü konüa haibüa paore:
“Hai nahai veisho-a buyu nuhdu nasüvu?
Deiphao mai hrülai thainüa buyu nuhdu nasüwu?”
16Neye ngaobayu mai hrülai nou neye sü konüre ae neye ngaorade.
Puletao nou mütai tupoa nou haibüa neye jünüa paore,
“Etao nou puhye sü soushi peiwure!
Haibüyu teithe nasü Etao nou kho-a nou bue!”
17 Mapao nou soulai tea paopi peia buyu nasü soupeiwure:
Puhnou Etaoye sü zhuveayu aliro ha-a raichoki nou puhnou paopi peiyu büa soushi souhawure.
Puhnou Etao vei ngaoba maitaoye panou veiloure,
Etao nou kaodu tayu nasü panou puletao vei asah sü soure.
18Oh Jerusalem, nevei kivo khesü panou shusoua Mapao hi kra khaio!#2.18 Hai nanou kaoyu phae Oh Jerusalem...kra khaio; Hebrew Puletao vei lethou sünou Mapao hi kra-e, Oh Jerusalem vei kivo.
Nevei nghidzü sü panou reidzü büa hea-khei sü kü khaio:
Sokhai timoa kra-a dopfü loukhaio!
19Kheimathe kushu zhazhaloua kra-a Mapao hi paokhaio;
Nevei tsüle veishi nou peia Mapao hinou nevei nahmaitaoye zhuvea peio tea kholo—
Nahmaitao hai ludu veishi hinou khüzüa thai-a nou bure.
20Zhukhaio, Oh Mapao! nenou souvea peia buyu maitaoye sü zhupei khaio!
Naotumaitao nou leshi sho-a buyu lah puletao vei nahmaitao vei vasou sü toua nou bure!
Napao maitao ae rachipaola peiyu maitao sü Rathoki hinou southa peia nou bure!
21Nahmai tsümai sümoa ludu hinou thai-a nou bure,
Nahle maitao hai ngaoba maivei khoche hinou kaodu tare.
Nevei lekha payu teithe hi nenou puletaoye sü zhuveayu ha-a nou southawure.
22Eye ngaobayu maitaoye sü nenou khonüh nülaiyu büa kupove peie,
avei pehao veishi hisü ngaopiyu nou phoutao-a buloure,
ae nevei lekha payu teithe sü mai linoua tureipa louho-e.
Enou leshi sho-a kikopa khaitouyu avei nahmaitaoye sü puletao nou southawure.
Currently Selected:
DOPFÜYU 2: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
