JOSHUA 14
14
Jordan vei Teinghi Loulo Teideitao Zhipeiyu
1Napao Eleazar, Nun nahpoutu Joshua alia Israel mai khü pei hinou khoa buyu maitao nou Kanaan teidei tao Israel mai ye zhipeiyu sü haitaoe. 2Mapao nou Moses hi kharochi peiyu thaifüa khü akü-a dahli hi rako nou zhua#14.2 rako nou zhua: Zhai veitoua soukhai touyu chuh nou poa Ramai vei leli sü zhue. kaalosü zhipeie. 3Daiolouzü Moses nou khü ahai-a dah tao hai teinghi palovatha buyu Jordan sü peiwure; ana Levi mai yesü kaalo peimohie. 4Daiolouzü Josef khü hinou chuo khü ahai pare, sühai sü Manasseh alia Ephraim ye; Levi mai yesü teidei ali-a peimoe, ana hriloure donou nuhdu alia puletao vei chokhaorü ye panou buloure donou heiphao sü peie. 5Mapao nou Moses hi kharochi peiyu büa Israel mainou teidei haitao hai zhiloue.
Kaleb Maiye Hebron vei Teidei Peiyu
6Süthaisü Gilgal hinou Judah mainou tave Joshua ye daoe; Keniz kihikha hinou Jephunneh nahpoutu Keleb nou puh hi paoe, “Mapao nou Kadeshbarnea hinou Moses hi kabüa ne alia Eye donou paoyu ne-a süe. 7Mapao kilai Moses nou Eye Kadeshbarnea hinou reikeih poloure donou seitayu phaki E hai mapo raidai pare; alia Enou puh hisü checheyu ko aveih nou ve paopeie. 8Ana Eye koa satamaio louzü dakhai ve ko ashi nou maisou le souvea peie; ana Ewo louzü ahrümai teitei nou peia Mapao Ramai ye lülouche-e. 9Moses nou süzhou haibüa nou chaachou soua paoe, ‘Nenou talou phiheayu teideitao hai teisa nou nevei alia ne tyaonahtao vei kaalo souwulai, daiolouzü nenou hrümai teitei nou peia Mapao Ramai ye lüyu vanou.’ 10Südonou chuo, ne-a zhukhaio, Mapao nou paohpei khaitouyu vanou E-a hria bu hie, sühai Israel mainou rekounou ta-a bukinou Mapao nou Moses hi paokhaiyu mapo raidai-ngou pare; alia zhou-wo E hai mapo raicha-angou pare, alia haihi bure. 11Chu koutea raichoki Moses nou Eye seitayu phaki avei khouko buyu büa buhie, avei pfühchi hai chua raiki büa reih soulaiyuma mokhaia hatarali soulaiyuma khouko buhie. 12Südonou chuo Mapao nou paohkhai touyu thaifüa deichi hi buyu nuh taosü Eye peio; daiolouzü Anakim mainou kabüa bue touyu ne-a süwe, puletao nou nuh fühao hai veishoa soukhaitouyu, ana Mapao nou Etaoye kozo peishulai, sütoulouzü Eh nou puletaoye sü hulailou süe.”
13Süthaisü Joshua nou puh yesü ha peiwure, alia puhnou Hebron teidei taohai Jephunneh nahpoutu Keleb hi peiwure. 14Hebron teidei hai Kenizz mai Jephunneh nahpoutu Keleb hisü kaalo soua peiwure, daiolouzü puhnou Israel Ramai Mapao ye hrümai teitei nou peia thaifü louyu vanoue. 15Hebron zhih hai raikio louzü Kiriath-arba touwe, Arba hai Anakim mai hrohinou dukhayu na-e.
Süthaihai teidei sütao hinou reih soumoa sode.
Currently Selected:
JOSHUA 14: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
